ដោយ: ម៉ាលីស
រតនគីរី: សភាពាណិជ្ជកម្មកម្ពុជា គ្រោងបង្កើតការិយាល័យតំណាងសភាពាណិជ្ជប្រចាំខេត្តរតនគីរី ខណៈខេត្តនេះមានក្រុមហ៊ុនវិនិយោគជិត២០០ក្រុមហ៊ុន។
ការលើកឡើងនេះក្នុង កិច្ចប្រជុំស្ដីពីការពិនិត្យលទ្ធភាពបង្កើតសភាពាណិជ្ជកម្មខេត្តរតនគិរី និងផ្សព្វផ្សាយអំពីយន្តការភាពជាដៃគូ រវាងរដ្ឋបាលរាជធានី-ខេត្ត និងសភាពាណិជ្ជកម្មខេត្ត-ក្រុង ដែលបានប្រារព្វធ្វើឡើងនៅមន្ទីពាណិជ្ជកម្មខេត្តរតនគិរី កាលពីដើមសប្តាហ៍នេះ ក្រោមអធបតីភាពលោក ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម និងមន្រ្តីពាក់ព័ន្ឋ។
យោងលើរបាយការណ៍ របស់លោកប្រធានមន្ទីពាណិជ្ជកម្មខេត្ត បានបញ្ជាក់ថា បច្ចុប្បន្នខេត្តមានក្រុមហ៊ុន និងសាខាក្រុមហ៊ុនសរុបចំនួន១៧៩ ក្នុងនោះមានដូចជា ក្រុមហ៊ុនសេវាកម្ម ពាណិជ្ជកម្មមានចំនួន១៥០ក្រុមហ៊ុន។
ក្រុមហ៊ុនវិនិយោគលើដីសប្បទានសេដ្ឋកិច្ច២៧ ក្រុមហ៊ុនសឹក្សារុករករ៉ែមានចំនួន២ក្រុមហ៊ុន និងមានអាជីវកម្មខ្នាតតូច និងមធ្យមចំនួន២៣០៧មូលដ្ឋាន ចំពោះកសិផលសក្ដានុពល និងការវិនិយោគរួមមាន ដំណាំកៅស៊ូ ស្វាយចន្ទី ដំឡូងមី សណ្ដែកសៀង សណ្ដែកបាយ អំពៅ ល្ងរខ្មៅ ថ្នាំជក់ កាហ្វេជាដើម ។
បើតាមទិនន័យខាងលើ អាចធ្វើការវាយតម្លៃបានថា ខេត្តរតនគិរីមានលក្ខណៈសម្បត្តិគ្រប់គ្រាន់ ក្នុងការបង្កើតសភាពាណិជ្ជកម្មខេត្ត ហើយឯកឧត្តមរដ្ឋលេខាធិការ និងរាយការណ៍ជូនរដ្ឋមន្ត្រីក្រសួងពាណិជ្ជកម្ម ដើម្បីដំណើរការរៀបចំសភាពាណិជ្ជកម្មតាមនិតិវិធី ។
ជាមួយគ្នានេះ លោក បួន សារៈមុនីរដ្ឋលេខាធិការក្រសួងពាណិជ្ជកម្មបាន លើកឡើងពីយន្តការភាពជាដៃគូ រវាងរដ្ឋបាលរាជធានី-ខេត្ត និងសភាពាណិជ្ជកម្មខេត្ត-ក្រុង ដែលយន្តការនេះមានសារៈសំខាន់ណាស់ ដើម្បីជួយសម្រួលរាល់សំណូមពររបស់ពាណិជ្ជករ ដែលជួបបញ្ហាប្រឈមក្នុងការធ្វើពាណិជ្ជកម្មក្នុងខេត្ត៕
