ដោយៈសុខុម
ក្រុងរីយ៉ាដ: គម្រោងស្ពានដីគោក (Landbridge) មួយដែលនឹងតភ្ជាប់ប៉ែកខាងលិច និងប៉ែកខាងកើតនៃប្រទេសអារ៉ាប៊ីសាអូឌីត អាចនឹងមានទំហំទុនវិនិយោគឈានដល់២៦ពាន់លានដុល្លារ។ នេះបើយោងតាមសារព័ត៌មាន Arab News ចុះផ្សាយកាលពីថ្ងៃពុធ ទី២៣ ខែមីនា។
លោក Saleh Al-Jasser រដ្ឋមន្ត្រីដឹកជញ្ជូន និងភ័ស្តុភារប្រទេសនេះរំពឹងថា ការចំណាយផ្ដាច់ព្រ័ត្រក្នុងគម្រោងនេះ នឹងរាប់បញ្ចូលទាំងហេដ្ឋារចនាសម្ព័ន្ធ និងរថភ្លើងផងដែរ។
ក្នុងបទសម្ភាសន៍ជាមួយសារព័ត៌មាន Rotana Khalejia ថា រដ្ឋមន្ត្រីរូបនេះ បានលើកឡើងបានលើកឡើងថា កិច្ចសន្យាក្នុងគម្រោងនេះ នឹងត្រូវចុះហត្ថលេខាក្នុងរយៈពេលមួយឆ្នាំនេះ ហើយការអនុវត្តគម្រោងនេះ នឹងចំណាយពេលពី៥ឆ្នាំទៅ៧ឆ្នាំ។
លោកបានបន្ថែមទៀតថា “យើងបានធ្វើការជាមួយសម្ព័ន្ធក្រុមហ៊ុនអន្តរជាតិ ដែលដឹកនាំដោយក្រុមហ៊ុនចិនមួយ និងរួមទាំងក្រុមហ៊ុនជាតិអស់រយៈពេលពីរឆ្នាំមកហើយ”។
លោកបានបន្តថា “ប្លង់គម្រោងដ៏ពេញលេញមួយ ត្រូវបានគូរឡើងរួចហើយ ដែលការចំណាយ និងទីតាំងក៏ត្រូវបានកំណត់រួចហើយដែរ”។ លោកបន្តថា “គម្រោងនេះ នឹងរួមបញ្ចូលមជ្ឈមណ្ឌលដឹកជញ្ជូនចំនួន៧ ហើយនឹងលើកកម្រិតកម្ពស់នៃផ្លូវ ដែលមានស្រាប់ពីទីក្រុងរីយ៉ាដ ឆ្ពោះទៅខេត្តភាគខាងកើត (Eastern Province) ផងដែរ”។
គម្រោងស្ពានដីគោកនេះ ត្រូវបានចាត់ទុកជាគម្រោងដ៏សំខាន់បំផុតក្នុងប្រទេសអារ៉ាប៊ីសាអូឌីត ហើយវាពិតជាជួយសម្រួលវិស័យភ័ស្តុភារបានច្រើន បន្ទាប់ពីគម្រោងនេះបញ្ចប់ជាស្ថាពរ៕ Arab News៕
