ដោយៈគង់ សូរិយា
ឌូបៃៈ ក្រៅពីអគារខ្ពស់ជាងគេលើពិភពលោក Burj Khalifa ដែលមានកំពស់រហូតដល់៨២៨ម៉ែត្រ ពេលនេះទីក្រុងនេះ ត្រៀមបង្ហាញវត្តមានសណ្ឋាគារខ្ពស់ជាងគេលើពិភពលោកជាថ្មី។
សំណង់សណ្ឋាគារខ្ពស់ជាងគេលើពិភពលោកនេះ មានកម្ពស់រហូតដល់៣៦៥ម៉ែត្រ ដែលពេលនេះការសាងសង់បាន៥០ភាគរយហើយ ដោយវគ្រោងនឹងបញ្ចប់ការសាងសង់ ទាំងស្រុងនៅចុងឆ្នាំ២០២៣ ខាងមុខ។
សណ្ឋគារនេះ មានឈ្មោះថា Ciel ស្ថិតក្នុងទីក្រុងឌូបៃ ហើយកំពុងសាងសង់ដោយក្រុមហ៊ុន China Railway Construction Corporation។
យោងតាមការចុះផ្សាយរបស់ Construction Week កាលពីដើមខែមីនា ការសាងសង់សម្រេចបានពាក់កណ្តាលនៃគម្រោងសំណង់ទាំងមូល បើទោះជារងផលប៉ះពាល់ ដោយសារវិបត្តិកូវីដរយៈពេល២ឆ្នាំចុងក្រោយក្ដី។
សណ្ឋាគារ Ceil នេះមាន៨២ជាន់ និងមាន១ ០០០ បន្ទប់ និងសេវាកម្មប្រណីតៗជាច្រើនទៀត។
លក្ខណៈពិសេសរបស់ សណ្ឋាគារ Ceil នេះ គឺ ការរចនាដ៏លេចធ្លោនៃសាលសណ្ឋាគារ (atrium) នៅរយៈកម្ពស់៣០០ ម៉ែត្រ ជាមួយនឹងផ្ទៃរាប ស្មើដែលមានទេសភាព និងខ្យល់ចេញចូលតាមធម្មជាតិដែលលាតសន្ធឹងរបស់អាគារ។
បើតាមផែនការ សណ្ឋាគារនព គ្រោងនឹងបើកសម្ពោធឱ្យដាក់ឱ្យដំណើរការ នៅឆមាសទី១ ឆ្នាំ២០២៤៕
