ដោយៈសុខុម
វៀងចន្ទន៍: គម្រោងផ្លូវល្បឿនលឿនមួយខ្សែ តភ្ជាប់រដ្ឋធានីវៀងច័ន្ទន៍ ជាមួយខេត្ត Houaphanh កាន់តែខិតជិតក្លាយជាការពិតហើយ បន្ទាប់ពីការសិក្សាសមិទ្ធលទ្ធភាព សម្រាប់គម្រោងនេះត្រូវបានប្រកាសកាលពីថ្ងៃច័ន្ទ ទី៤ ខែមេសា។
ពិធីចុះហត្ថលេខាមួយ ត្រូវបានធ្វើឡើងនៅរដ្ឋធានីវៀងចន្ទន៍ សម្រាប់ការសិក្សាសមិទ្ធលទ្ធភាព សម្រាប់គម្រោងនេះរវាងរដ្ឋាភិបាលឡាវ ក្រុមហ៊ុន Nana Chin Sole Co. Ltd និងក្រុមហ៊ុន Big Brother 456។
ពិធីចុះហត្ថលេខានេះ មានការអញ្ជើញចូលរួមពីរដ្ឋមន្ត្រីក្រសួងផែនការ និងវិនិយោគ Khamchanh Vongsenboun អនុរដ្ឋមន្ត្រីក្រសួងសាធារណការ និងដឹកជញ្ជូន Ngampasom Meuangmany និងមន្ត្រីជាន់ខ្ពស់ជាច្រើនរូបទៀត។
លោកស្រី Nanthale Saysena ប្រធានក្រុមហ៊ុន Nana Chin Company និងលោក Niyom Chanthamountry ប្រធានក្រុមហ៊ុន Big Brother 456 ក៏បានអញ្ជើញចូលរួម ក្នុងពិធីចុះហត្ថលេខានេះផងដែរ។
គម្រោងផ្លូវល្បឿនលឿនក្រុងវៀងច័ន្ទន៍-ខេត្ត Houaphanh (Vientiane-Houaphanh Expressway) នេះនឹងត្រូវអនុវត្តជា៣ដំណាក់កាល ដោយដំណាក់កាលទី១ តភ្ជាប់សង្កាត់ Xaythany ឆ្ពោះទៅស្រុក Anouvong ក្នុងខេត្ត Xaysomboun។
ដំណាក់កាលទី២ នឹងលាតសន្ធឹងពីខេត្ត Xaysomboun ឆ្ពោះទៅស្រុក Pek ក្នុងខេត្ត Xieng Khouang ចំណែកឯដំណាក់កាលទី៣ នឹងភ្ជាប់ខេត្ត Xieng Khouang ទៅខេត្ត Houaphanh។
ទោះជាយ៉ាងណា មិនទាន់មានការបញ្ជាក់ទេថា តើគម្រោងផ្លូវល្បឿនលឿន ដែលត្រូវបានដាក់ជូនរដ្ឋាភិបាល ដើម្បីអនុម័តកាលពីខែសីហា ឆ្នាំ២០២១ នេះមានប្រវែងប៉ុន្មានគីឡូម៉ែត្រ និងចំណាយអស់ដើមទុនប៉ុន្មាន និងប្រើពេលប៉ុន្មាននៅក្នុងការស្ថាបនានោះឡើយ៕ Laotian Times៕
