ដោយ: គង់ លាងហួរ
អន្តរជាតិ: យោងតាមការសិក្សាថ្មីមួយបានរកឃើញថា ប្រសិនបើមានថវិកាចំនួន១លានដុល្លារអាមេរិក អតិថិជនអាចទិញបានផ្ទះប្រណីតទំហំ២២ម៉ែត្រការ៉េនៅក្នុងទីក្រុងហុងកុង ឬផ្ទះទំហំ៣២ម៉ែត្រការ៉េនៅក្នុងប្រទេសសិង្ហបុរី។

តួលេខនេះបានធ្វើឱ្យទីក្រុងហុងកុងក្លាយជាទីផ្សារអចលនទ្រព្យដែលមានតម្លៃថ្លៃជាងគេបំផុតនៅតំបន់អាស៊ី។នេះបើយោងតាមរបាយការណ៍ទ្រព្យសម្បត្តិឆ្នាំ២០២៥ “Wealth Report 2025”ដែលបានចេញផ្សាយដោយក្រុមហ៊ុន Knight Frank។

ប៉ុន្តែ ប្រសិនបើគិតនៅទូទាំងពិភពលោក ទីក្រុងហុងកុងបានឈរនៅលេខរៀងទី២ បន្ទាប់ពីប្រទេសម៉ូណាកូ។ ទំហំទឹកប្រាក់ចំនួន១លានដុល្លារ អាចទិញផ្ទះទំហំ១៩ម៉ែត្រការ៉េនៅប្រទេសក្នុងតំបន់អឺរ៉ុបមួយនេះ។

របាយការណ៍ខាងលើបង្ហាញទៀតថា ប្រទេសសិង្ហបុរីជាប់ចំណាត់ថ្នាក់លេខ៣ ខណៈទំហំទឹកប្រាក់ចំនួន១លានដុល្លារ អាចទិញបានផ្ទះទំហំ៣២ម៉ែត្រការ៉េនៅក្នុងប្រទេសកូនកោះមួយនេះ។

ដោយឡែក ទីក្រុងបុមបៃ(Mumbai)របស់ប្រទេសឥណ្ឌាបានជាប់ឈ្មោះជាទីផ្សារអចលនទ្រព្យ ដែលមានតម្លៃទាបជាងគេបំផុត។ ទំហំទឹកប្រាក់ចំនួន១លានដុល្លារ អាចទិញបានផ្ទះទំហំ៩៩ម៉ែត្រការ៉េនៅក្នុងទីក្រុងបុមបៃ។

អំណាចនៃការទិញនៅទីក្រុងបុមបៃ ដែលជាមជ្ឈមណ្ឌលហិរញ្ញវត្ថុរបស់ប្រទេសឥណ្ឌាបានស្ថិតក្នុងសភាពទ្រឹងក្នុងរយៈពេលមួយទសវត្សរ៍កន្លងមកនេះ ដែលធ្វើឱ្យអតិថិជនងាយស្រួលក្នុងការចរចាតម្លៃ។

ដោយឡែក ទីផ្សារអចលនទ្រព្យនៅទីក្រុងឡុងដ៍របស់ប្រទេសអង់គ្លេសបានធ្លាក់ចុះ។តួយ៉ាង ទំហំទឹកប្រាក់ចំនួន១លានដុល្លារអាចទិញបានផ្ទះទំហំ៣៤ម៉ែត្រការ៉េនៅទីក្រុងឡុងដ៍កាលពីឆ្នាំមុន បើធៀបនឹង២៣ម៉ែត្រការ៉េក្នុងឆ្នាំ២០១៤៕ប្រភព: Vnexpress៕

ដោយ: គង់ លាងហួរ
អន្តរជាតិ: ទីផ្សារអចលនទ្រព្យនៅក្នុងប្រទេសឥណ្ឌាបានឈានចូលមកដល់ចំណុចរបត់មួយ ដែលនឹងសម្រេចបានកំណើនយ៉ាងលឿនឆាប់រហ័សមិនធ្លាប់មានទាំងផ្នែកលំនៅដ្ឋាន ពាណិជ្ជកម្ម និងឧស្សាហកម្ម។

តួយ៉ាង តម្រូវការលំនៅដ្ឋាននៅប្រទេសឥណ្ឌាត្រូវបានគេរំពឹងថា នឹងនៅតែមានសភាពរឹងមាំ ដោយសារការផ្លាស់ប្តូរនៃកត្តាប្រជាសាស្រ្ត និងការរីកចម្រើននៃកំណើនសេដ្ឋកិច្ច។

ខណៈដែលប្រទេសឥណ្ឌាបានបង្ហាញមហិច្ឆិតាក្នុងការប្រែក្លាយខ្លួនទៅជាប្រទេស ដែលមានប្រាក់ចំណូលកម្រិតមធ្យម និងកម្រិតខ្ពស់ វិស័យអចលនទ្រព្យនៅក្នុងប្រទេសនេះត្រូវបានគេរំពឹងថា នឹងបន្តរីកចម្រើនប្រកបដោយចីរភាពនៅទសវត្សរ៍ក្រោយ។

ទំហំទីផ្សារលំនៅដ្ឋានឥណ្ឌាត្រូវបានព្យាករណ៍ថា នឹងសម្រេចបានអត្រាកំណើនប្រចាំឆ្នាំចន្លោះពី១២ភាគរយទៅ១៥ភាគរយ ដែលនឹងវ៉ាដាច់អត្រាកំណើនសេដ្ឋកិច្ចឥណ្ឌាចំនួន៧ភាគរយ។

ការណ៍នេះនឹងជួយរួមចំណែកដល់ការបង្កើនទំហំផលទុនជាតិសរុប(GDP)របស់ប្រទេសដែលមានចំនួនប្រជាជនច្រើនជាងគេនៅលើពិភពលោក។

ទីផ្សារអចលនទ្រព្យពាណិជ្ជកម្មក៏នឹងបន្តរីកចម្រើនផងដែរ ដោយផ្តោតលើគម្រោងអភិវឌ្ឍន៍អគារប្រើប្រាស់ចម្រុះ ដែលរួមបញ្ចូលគ្នានូវលំនៅដ្ឋាន ពាណិជ្ជកម្ម និងការលក់រាយ។ ការចាប់យកបច្ចេកវិទ្យាស្វ័យប្រវត្តិកម្ម និងបច្ចេកវិទ្យាឆ្លាតវៃនឹងបង្កើនភាពទាក់ទាញនៃគម្រោងអភិវឌ្ឍន៍ទាំងនេះ។

ជាងនេះទៅទៀត ភាពជឿនលឿនផ្នែកហេដ្ឋារចនាសម្ព័ន្ធ ដូចជាការតភ្ជាប់ខ្សែសង្វាក់ផ្គត់ផ្គង់ជាយុទ្ធសាស្ត្ររវាងអ្នកប្រើប្រាស់ជាមួយនឹងសេវាកម្ម និងការអភិវឌ្ឍន៍តំបន់ពាណិជ្ជកម្មថ្មីៗ នឹងជំរុញទីផ្សារអចលនទ្រព្យពាណិជ្ជកម្មរបស់ឥណ្ឌាបន្ថែមទៀត។

ដោយឡែក ការពង្រីកសមត្ថភាពផលិតកម្ម និងគម្រោងហេដ្ឋារចនាសម្ព័ន្ធត្រូវបានគេរំពឹងថា នឹងជំរុញទីផ្សារអចលនទ្រព្យឧស្សាហកម្ម។

ការបន្តបោះទុនវិនិយោគរបស់រដ្ឋាភិបាលឥណ្ឌា ក្នុងការបង្កើតសួនឧស្សាហកម្មភស្តុភារ និងច្រករបៀងសេដ្ឋកិច្ចនឹងកាត់បន្ថយនូវថ្លៃដើមសង្វាក់ផ្គត់ផ្គង់ ព្រមទាំងបង្កើនប្រសិទ្ធភាព និងជួយកាត់បន្ថយតម្លៃផលិតផលប្រហែល៥ភាគរយ៕ប្រភព: BW Businessworld៕

ដោយ: គង់ លាងហួរ
អន្តរជាតិ: រដ្ឋាភិបាលថៃបានធ្វើការព្រមានដល់ជនបរទេស ដែលបានទិញខុនដូនៅក្នុងប្រទេសថៃ ដើម្បីដាក់ជួលជាលក្ខណៈសណ្ឋាគារ ព្រោះសកម្មភាពនេះជាការរំលោភបំពានច្បាប់របស់ប្រទេសថៃ។

ការព្រមាននេះបានកើតមានឡើង ក្រោយពីអាជ្ញាធរថៃរកឃើញមាន​ករណីជាច្រើន ដែលជនជាតិចិនបានជួលបន្ទប់ខុនរបស់ខ្លួនទៅឱ្យភ្ញៀវទេសចរណ៍តាមរយៈកម្មវិធី Airbnb។

អ្នករស់នៅក្នុងអគារខុនដូមួយចំនួន ជាពិសេសនៅតំបន់ Sukhumvit បានត្អូញត្អែរអំពីសំឡេងរំខានរបស់ភ្ញៀវស្នាក់នៅបន្ទប់ជិតខាង ដែលមកស្នាក់នៅក្នុងរយៈពេលខ្លី។

យោងតាមពាក្យបណ្ដឹងពីអ្នករស់នៅក្នុងអគារខុនដូ ដែលត្រូវបានចែកចាយតាមបណ្ដាញសង្គមបានឱ្យដឹងថា ភ្ញៀវទេសចរណ៍បានជួលបន្ទប់ខុនដូសម្រាប់ស្នាក់នៅក្នុងរយៈពេលខ្លី ដោយកក់តាមរយៈ​ប្រព័ន្ធកម្មវិធីអនឡាញ។ខុនដូទាំងនោះ ​ជា​កម្មសិទ្ធិ​របស់​ជនជាតិ​ចិន។

លើសពីនេះ ភ្ញៀវទេសចរណ៍ ដែលចូលមកស្នាក់នៅខុនដូទាំងនោះមានសិទ្ធិយកកូនសោអេឡិចត្រូនិកសម្រាប់ចូលក្នុងខុនដូ។ កូនសោនោះត្រូវបានដាក់ក្នុងប្រអប់សោរួម ដែលមានលេខកូដសម្ងាត់ឌីជីថល។

ក្នុងករណីនេះ ការិយាល័យគ្រប់គ្រងខុនដូមួយចំនួន​ បានហាមឃាត់មិនឱ្យម្ចាស់បន្ទប់ខុនដូជាជនជាតិចិនប្រើប្រាស់ប្រអប់សោរួម ព្រោះថា មានតែអ្នករស់នៅក្នុងអគារខុនដូប៉ុណ្ណោះទើបអាចមានសិទ្ធិដឹងពីលេខកូដសម្ងាត់របស់ប្រអប់សោនោះ។

ជនបរទេសដែលទិញខុនដូដើម្បីដាក់ជួលជាប្រចាំថ្ងៃ តាមរយៈកម្មវិធី Airbnb ដោយមិនមានការអនុញ្ញាត ជាការរំលោភបំពានច្បាប់ស្តីពីសណ្ឋាគារឆ្នាំ២០០៤ របស់ប្រទេសថៃ។

ចំណែក អ្នកបំពានច្បាប់នឹងត្រូវទទួលរងការផាកពិន័យក្នុងទំហំទឹកប្រាក់ប្រមាណ៥៩៥ដុល្លារអាមេរិក និងបូកបន្ថែមចំនួន២៩៥ដុល្លារជារៀងរាល់ថ្ងៃ រហូតដល់ជនល្មើសបញ្ឈប់សកម្មភាព៕ប្រភព: The Nation៕

ដោយ: គង់ លាងហួរ
អន្តរជាតិ: បណ្តាក្រុមហ៊ុនអភិវឌ្ឍន៍អចលនទ្រព្យនានាកំពុងជួបប្រទះស្ថានភាពលំបាកក្នុងការលក់ផ្ទះវីឡា និងផ្ទះ Townhouse នៅភាគខាងត្បូងប្រទេសវៀតណាម ដោយសារតែផ្ទះទាំងនោះមានតម្លៃខ្ពស់កប់ពពក។

ជាក់ស្តែង ក្រុមហ៊ុនប្រឹក្សាអចលនទ្រព្យ DKRA Group បានកត់សម្គាល់ឃើញមានការទិញផ្ទះចំនួន៧៥យូនីតប៉ុណ្ណោះក្នុងចំណោមផ្ទះវីឡា និងផ្ទះប្រភេទ Townhouse សរុប៥.០០០យូនីត ដែលត្រូវបានប្រកាសដាក់លក់នៅទីក្រុងហូជីមិញ និងតំបន់ជុំវិញនោះ។

យោងតាមរបាយការណ៍មួយរបស់វេទិកាចុះបញ្ជីអចលនទ្រព្យ Batdongsan បានឱ្យដឹងថា ទីផ្សារអចលទ្រព្យវៀតណាមបានបង្ហាញសញ្ញានៃការងើបឡើងវិញយ៉ាងខ្លាំងនៅឆ្នាំ២០២៥នេះ ស្របពេលមានកំណើននៃតម្រូវការដីធ្លី និងអាផាតមុិន។ផ្ទុយទៅវិញ តម្រូវការផ្ទះ​វីឡា និង​ផ្ទះ​ Townhouse បានដាំក្បាលចុះ។

ការស្រាវជ្រាវស្វែងរកផ្ទះ​វីឡា និង​ផ្ទះ​ Townhouse (Search)នៅក្នុងទីក្រុងហូជីមិញតាមរយៈវេទិកាចុះបញ្ជីអចលនទ្រព្យ Batdongsan បានគ្របដណ្តប់ចំណែកតិចជាង២ភាគរយនៃចំនួនអ្នកសាកសួរព័ត៌មានសរុប។

លោក Vo Hong Thang អគ្គនាយករងនៃក្រុមហ៊ុនប្រឹក្សាអចលនទ្រព្យ DKRA Group បានវាយតម្លៃថា “ការដាំក្បាលចុះនៃតម្រូវការផ្ទះ​វីឡា និង​ផ្ទះ​ Townhouse បណ្តាលមកពីផ្ទះទាំងនោះគ្មានភាពទាក់ទាញ និងមានតម្លៃខ្ពស់កប់ពពក”។

តួយ៉ាង ផ្ទះវីឡា និងផ្ទះប្រភេទ Townhouse នៅទីក្រុងហូជីមិញមានតម្លៃចាប់ពី៥,៣ពាន់លានដុងដល់៧០០ពាន់លានដុង(ប្រហែល២០៧.៦៤០ដុល្លារទៅ២៧,៤លានដុល្លារ)ក្នុងមួយយូនីត។តម្លៃខ្ពស់កប់ពពកនេះបានធ្វើឱ្យបណ្តាអ្នកវិនិយោគស្ទាក់ស្ទើរក្នុងការទិញ៕ប្រភព: Vnexpress៕