ដោយៈ គង់ ម៉ាណា

    ភ្នំពេញៈ  កាលពីពេលថ្មីៗនេះ ក្រុមហ៊ុន PTT Oil & Retail Business Public Limited (OR) បានតែងតាំងលោក M.L. Peekthong Thongyai ជានាយកប្រតិបត្តិថ្មីរបស់ខ្លួន។

ក្រុមហ៊ុននេះបានកំណត់គោលដៅ សម្រាប់កំណើនជាយុទ្ធសាស្ត្រនៅទូទាំងតំបន់អាស៊ីអាគ្នេយ៍ ដែលផ្តោតលើការពង្រីកទីផ្សារថាម​ពល និងការលក់រាយនៅកម្ពុជា។

ក្រោមការដឹកនាំរបស់លោក ក្រុមហ៊ុន OR ត្រូវបានកំណត់ ដើម្បីពន្លឿនការផ្លាស់ប្តូររបស់ខ្លួន ទៅជាមហាអំណាចក្នុងតំបន់ ដោយប្រើប្រាស់នវានុវត្តន៍ឌីជីថល និងយុទ្ធសាស្រ្តវិនិយោគ ប្រកបដោយនិរន្តរភាព ដើម្បីជំរុញការបង្កើតគុណតម្លៃរយៈពេលវែង។

លោកM.L.  Peekthong គឺផ្តោតលើសសរស្តម្ភស្នូលចំនួន៣៖ ការបំលាស់ទីដោយរលូន (Seamless Mobility), គ្រប់របៀបរស់នៅ (All Lifestyles) និងការពង្រីកទីផ្សារសកល (Global Market Expansion) ហើយប្រទេសកម្ពុជា កំពុងក្លាយជាទីផ្សារមួយដ៏សំខាន់នៅក្នុង យុទ្ធសាស្ត្រកំណើនជាអន្តរជាតិរបស់OR ។

ក្រុមហ៊ុនOR មានគោលដៅពង្រឹងការតភ្ជាប់ហេដ្ឋារចនា សម្ព័ន្ធ​ថាមពលរបស់ថៃ និងកម្ពុជា ខណៈដែលការរួមបញ្ចូលការប្រើប្រាស់បច្ចេកវិទ្យាឌីជីថល គឺដើម្បីបំពេញតម្រូវការ និងអាជីវកម្ម ក៏ដូចជាការប្រើប្រាស់ដែលកំពុងកើនឡើងនៅក្នុងតំបន់។

ពង្រីកវត្តមានរបស់ORនៅកម្ពុជា

ជាមួយនឹងកំណើនសេដ្ឋកិច្ច យ៉ាងឆាប់រហ័សរបស់ប្រទេសកម្ពុជា និងការកើនឡើងនៃតម្រូវការថាមពល ក្រុមហ៊ុនOR កំពុងស្វែងរកយ៉ា​ងសកម្មនូវឱកាសវិនិយោគ ដើម្បីពង្រីកការបោះជំហានរបស់ខ្លួន នៅក្នុងប្រទេសកម្ពុជា។

ក្រុមហ៊ុនកំពុងស្វែងរកភាព ជាដៃគូយុទ្ធសាស្ត្រ ដើម្បីបង្កើតស្ថានីយ៍សេវាកម្មថ្មីៗ ដំណោះស្រាយថាមពលជំនួស និងអាជីវកម្មលក់រាយ ដោយពង្រឹងវត្តមានរបស់ខ្លួននៅក្នុងវិស័យប្រេងឥន្ធនៈ EV និងF&B របស់កម្ពុជា។

ការប្រើប្រាស់បច្ចេកវិទ្យាឌីជីថល និងនវានុវត្តន៍នៅក្នុងការវិ

និយោគ

ដើម្បីបង្កើនប្រសិទ្ធភាពប្រតិបត្តិការ និងការប្រកួតប្រជែងទីផ្សារ

ក្រុមហ៊ុន OR កំពុងពន្លឿនយុទ្ធសាស្ត្រ ការប្រើប្រាស់បច្ចេកវិទ្យាឌីជីថលរបស់ខ្លួន។ ជាផ្នែកនៃកិច្ចខិតខំប្រឹងប្រែងនេះ ក្រុមហ៊ុនOR កំពុងណែនាំប្រព័ន្ធទូទាត់ ដោយមិនប្រើសាច់ប្រាក់ (cashless payment systems) ភាពវៃឆ្លាតនៃអាជីវកម្មដែល   ជំរុញដោយ AI (AI-driven business intelligence) និងការវិភាគទិន្នន័យ (real-time data analytics) នៅក្នុងប្រតិបត្តិការរបស់ខ្លួននៅកម្ពុជា។

ក្រុមហ៊ុនក៏បានអនុវត្តន៍ ការប្រើប្រាស់កម្មវិធីSAPS/4 H ANA  ដោយធ្វើឱ្យវាក្លាយជាក្រុមហ៊ុនប្រេងឥន្ធនៈ និងលក់រាយដំបូងគេនៅអាស៊ីអាគ្នេយ៍ ដែលប្រើប្រាស់បច្ចេក  វិទ្យានេះសម្រាប់ការធ្វើទំនើបកម្មឌីជីថលសហគ្រាសឱ្យកាន់តែទូលំទូលាយ។

ការពង្រីកវិសាលភាព យុទ្ធសាស្ត្រកំណើនជាអន្តរជាតិ

ការពង្រីករបស់ OR ទៅកាន់ប្រទេសកម្ពុជា ឡាវ ហ្វីលីពីន វៀតណាម ម៉ាឡេស៊ី សិង្ហបុរី ជប៉ុន អូម៉ង់ អារ៉ាប៊ីសាអូឌីត និងប្រទេសបារ៉ែន បានឆ្លុះបញ្ចាំងពីមហិច្ឆតារបស់ខ្លួន ក្នុងការប្រែក្លាយជាអ្នកឈានមុខគេ នៅក្នុងពិភពលោកក្នុងអាជីវកម្មប្រេងឥន្ធនៈ និងលក់រាយ។

ជាមួយនឹងស្ថានីយប្រេងឥន្ធនៈ PTT ចំនួន៤១១កន្លែង និងហាងកាហ្វេ Café Amazon ចំនួន៣៨២កន្លែង។ ឥឡូវនេះកំពុងដំណើរការនៅទូទាំង ទីផ្សារអាស៊ីអាគ្នេយ៍សំខាន់ៗ ហើយក្រុមហ៊ុន OR នៅតែបន្តពង្រឹងវត្តមានរបស់ខ្លួនក្នុងតំបន់  ខណៈពេលដែលជំរុ​ញកំណើន និងនវានុវត្តន៍ប្រកបដោយនិរន្តរភាព។

កម្ពុជាកំពុងលេចធ្លោក្លាយជាទីផ្សារដ៏សំខាន់ ដោយមានស្ថានីយ៍ប្រេង PTT ចំនួន១៨៣ និងហាងកាហ្វេCafé Amazon ចំនួន២៤៨ ហាង ខណៈដែលប្រទេសហ្វីលីពីនមានស្ថានីយប្រេង PTT ចំនួន ១៧០  និងប្រទេសឡាវចំនួនស្ថានីយ៍ប្រេង PTT ចំនួន ៥៨។ យីហោកាហ្វេ Café Amazon របស់ក្រុមហ៊ុនOR ផ្តល់បទពិសោធន៍នៃការញុំាកាហ្វេលំដាប់ខ្ពស់ បានបន្តរីកចម្រើនជាអន្តរជាតិ ដោយពង្រឹងវត្តមានរបស់OR នៅក្នុងទីផ្សារដែលមានសក្តានុពលខ្ពស់។

ពង្រឹងទំនាក់ទំនងពាណិជ្ជកម្មរវាងប្រទេសថៃ និងកម្ពុជាឱ្យកាន់តែរឹងមាំ

ក្រុមហ៊ុនOR មើលឃើញថា ប្រទេសកម្ពុជាគឺជាទីផ្សារដ៏សំខាន់មួយ សម្រាប់ការពង្រីកវត្តមានរបស់ខ្លួន នៅក្នុងតំបន់ ហើយលោក M.L. Peekthong បានលើកឡើងពីសារៈសំខាន់នៃកិច្ចសហការ និងការវិនិយោគឆ្លងព្រំដែនមួយនេះ។

លោក M.L. Peekthong Thongyai បានមានប្រសាសន៍ថា ខណៈកម្ពុជា  កំពុងក្លាយជាមជ្ឈមណ្ឌលសេដ្ឋកិច្ចដ៏សំខាន់ នៅក្នុងតំបន់ ក្រុមហ៊ុន OR ប្តេជ្ញាគាំទ្រដល់កំណើនរបស់ខ្លួន តាមរយៈការវិនិយោគជាយុទ្ធសាស្រ្ត នវានុវត្កន៍ និងការអនុវត្តអាជីវកម្មប្រកបដោយនិរន្តរភាព។

លោកបានបន្តថា យុទ្ធសាស្ត្ររបស់យើងគឺ “ពួកគេរីកចម្រើន” “យើងរីកចម្រើន” (They Grow, We Grow) ដែលឆ្លុះបញ្ចាំងពីចក្ខុវិស័យរបស់យើង សម្រាប់ភាពរុងរឿងទៅវិញទៅមក និងភាពជោគ​ជ័យយូរអង្វែងនៅក្នុងទីផ្សារកម្ពុជា”៕

ដោយៈ គង់ សូរិយា

    កំពង់ស្ពឺៈ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានណែនាំឲ្យក្រសួងបរិស្ថាន ជាមួយស្ថាប័នពាក់ព័ន្ធ ធ្វើការអភិរក្ស និងអភិវឌ្ឍន៍ហេដ្ឋារចនាសម្ព័ន្ធ នៅតំបន់ទេសចរណ៍ខ្នងផ្សារ ខ្នងសំពៅ នៃឧទ្យានជាតិភ្នំក្រវាញ។

សម្តេចនាយករដ្ឋមន្រ្តីបានឱ្យដឹងនៅថ្ងៃចន្ទ ទី១០ ខែមីនានេះថា មុននឹងចាកចេញ ពីតំបន់ទេសចរណ៍ខ្នងផ្សារ កាលពីថ្ងៃសៅរ៍ ទី៨ មីនានេះ សម្តេចបានជួបជជែកលេងជាមួយប្អូនប្រុស ដែលជាប្រធានសហគមន៍ទេសចរណ៍ធម្មជាតិតាំងបំពង់ និងអនុប្រធានរបស់គាត់ ដើម្បីស្តាប់ពីស្ថានភាពជីវភាព របស់ប្រជាជននៅក្នុងសហគមន៍ ក៏ដូចជាសំណូមពរជាក់ស្តែង ដើម្បីជួយដល់ប្រជាពលរដ្ឋ នៅក្នុងសហគមន៍។

សម្តេចបានបន្តថា “ក្រោយពីពិនិត្យនូវទិដ្ឋភាពជាក់ស្តែង និងស្តាប់តំណាងសហគមន៍ ខ្ញុំបានសម្រេច ប្រគល់ភារកិច្ចជូនឯករដ្ឋមន្ត្រីក្រសួងបរិស្ថាន និងលោកអភិបាលនៃអភិបាលខេត្តកំពង់ស្ពឺ សហការអភិរក្ស និងថែរក្សាតំបន់ទេសចរណ៍ខ្នងផ្សារ ខ្នងសំពៅ នៃឧទ្យានជាតិភ្នំក្រវាញឱ្យបានល្អ សម្រាប់ផលប្រយោជន៍សាធារណៈ និងសហគមន៍នៅតំបន់នេះ”។

បន្ថែមពីនោះ ប្រមុខរដ្ឋាភិបាល ក៏បានណែនាំឱ្យក្រសួង និងខេត្តកំពង់ស្ពឺធ្វើការសិក្សា រៀបចំហេដ្ឋារចនាសម្ព័ន្ធគាំទ្រ និងសេវាកម្មគាំទ្រ ដូចជាផ្លូវ បន្ទប់ទឹក កន្លែងលក់អាហារ  កន្លែងសង្គ្រោះបន្ទាន់ ។ល។ ទៅតាមស្តង់ដារ និងទុកជាប្រយោជន៍ជូនសហគមន៍ ដើម្បីធ្វើឱ្យប្រសើរឡើង នូវការផ្តល់សេវាជូនទេសចរណ៍ ដែលមកកម្សាន្តនៅទីនោះ។

ក្រៅពីនោះ ស្ថាប័នទាំង២ ក៏ត្រូវសិក្សាធ្វើឱ្យប្រសើរឡើងនូវប្រព័ន្ធផ្គត់ផ្គង់ទឹក នៅលើតំបន់ភ្នំខ្នងផ្សារ ក៏ដូចជា សម្រាប់ប្រជាពលរដ្ឋរស់នៅតំបន់ជើងភ្នំផងដែរ។

អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន លោកខ្វៃ អាទិត្យាបានឱ្យដឹងថា រដ្ឋមន្រ្តីក្រសួងបរិស្ថាន លោកអ៊ាង សុផល្លែត កំពុងតែរៀបចំផែនការ ក្រោយពីមានការប្រគល់ភារកិច្ច ពីប្រមុខរដ្ឋាភិបាលមកភ្លាម។

លោកមានប្រសាសន៍ថា “ថ្ងៃនេះ រដ្ឋមន្រ្តីក្រសួងបរិស្ថានពិនិត្យទៅលើការងារនេះ។ លោករដ្ឋមន្រ្តីបានគិតគូរ ហើយបានរៀបចំភ្លាម ពីសកម្មភាព ផែនការ តាមការណែនាំរបស់ប្រមុខរដ្ឋាភិបាល”។លោកបន្តថា “ថ្ងៃនេះលោករដ្ឋមន្រ្តី មានជំនួបជាមួយនឹងក្រុមកាងាររៀបចំហេដ្ឋារចនាសម្ព័ន្ធ ដូចជាទឹក និងអគ្គិសនី”។

សម្តេចនាយករដ្ឋមន្រ្តីហ៊ុន ម៉ាណែត ក៏បានសម្រេចប្រគល់ភារកិច្ចជូន ក្រសួងទេសចរណ៍ សហការណ៍ ជាមួយនឹងក្រសួងបរិស្ថាន គណៈអភិបាលខេត្ត ប្រតិបត្តិករទេសចរណ៍ និងសហគមន៍ផងដែរ ដើម្បីជំរុញទេសចរណ៍ធម្មជាតិនៅតំបន់នោះ ឱ្យកាន់តែប្រសើរឡើង ក៏ដូចជា ការជួយបង្កើនសមត្ថភាពរបស់សហគមន៍ ក្នុងការផ្ដល់សេវាទេសចរណ៍ផងដែរ។ ទាំងនេះនឹងអាចចូលរួមចំណែក ក្នុងការលើកកម្ពស់ជីវភាពរស់នៅរបស់ប្រជាពលរដ្ឋនៅក្នុងតំបន់នោះ។

លោកខ្វៃ អាទិត្យាក៏បាន្យដឹងផងដែរថា កាងារជាបន្តបន្ទាប់ទៀត រដ្ឋមន្រ្តីក្រសួងបរិស្ថាន ក្រសួងទេសចរណ៍ និងស្ថាប័នពាក់ព័ន្ធនឹងជួបពិភាក្សាគ្នា ថាតើត្រូវរៀបចំកម្មវិធីធ្វើអ្វីខ្លះ និងត្រូវចាប់ផ្តើមធ្វើអ្វីជាអាទិភាពមុនគេ។

ខ្នងផ្សារ ដែលជាទីតាំងប្រសព្វ​ រវាងខេត្តកោះកុង កំពង់ស្ពឺ និង​ខេត្ដ​ពោធិ៍សាត់ ត្រូវបានចាត់ទុកថាជា “ឋានសួគ៌ធម្មជាតិ” ។ តំបន់នេះ បានកំពុងតែទាក់ទាញទាំងអ្នកទេសចរជាតិ និងអន្តរជាតិ ទៅកម្សាន្ត ជាលក្ខណៈផ្សងព្រេង ជាមួយនឹងភាពសម្បូរទៅដោយព្រៃឈើក្រាស់ ជ្រលង់ភ្នំខ្ពស់ៗ វាលស្មៅដ៏ស្រស់ស្អាត។ លើសពីនោះ វាសម្បូរទៅដោយសត្វព្រៃកម្រជាច្រើនប្រភេទ៕

ដោយ: គង់ លាងហួរ
អន្តរជាតិ: យោងតាមក្រុមហ៊ុនស្រាវជ្រាវអចលនទ្រព្យ Global Property Guide បានរាយការណ៍ឱ្យដឹងថា ការជួលអាផាតមុិន ដែលមានបន្ទប់គេងទោល(one-bedroom)នៅរដ្ឋធានីសេអ៊ូលនៃប្រទេសកូរ៉េខាងត្បូងមានតម្លៃ៣.៥០០ដុល្លារក្នុងមួយខែ។តួលេខនេះមានកម្រិតខ្ពស់ជាងគេបំផុតនៅក្នុងតំបន់អាសុី។

តួយ៉ាង ការជួលអាផាតមុិន ដែលមានបន្ទប់គេងទោលនៅទីក្រុងហុងកុងនៃប្រទេសចិនមានតម្លៃ២.១០០ដុល្លារក្នុងមួយខែ ខណៈការជួលអាផាតមុិន ដែលមានបន្ទប់គេងទោលនៅក្នុងទីក្រុងតៃបុិនៃកោះតៃវ៉ាន់មានតម្លៃចំនួន៨៥៥ដុល្លារក្នុងមួយខែ។

ការជួលអាផាតមុិន ដែលមានបន្ទប់គេងទោលនៅក្នុងទីក្រុងប៉េកាំងនៃប្រទេសចិនមានតម្លៃ៧៧៨ដុល្លារក្នុងមួយខែ។ នេះបើយោងតាមរបាយការណ៍ថ្មីចុងក្រោយពីក្រុមហ៊ុន Global Property Guide។

ការជួលអាផាតមុិនដែលមានបន្ទប់គេងទោលនៅក្នុងទីក្រុងតូក្យូនៃប្រទេសជប៉ុនមានតម្លៃប្រមាណ៧០០ដុល្លារប៉ុណ្ណោះក្នុងមួយខែ។

ផ្ទុយទៅវិញ ការជួលអាផាតមុិន ដែលមានបន្ទប់គេងទោលនៅក្នុងទីក្រុងបុមបៃ (Mumbai) នៃប្រទេសឥណ្ឌាមានតម្លៃសមរម្យជាងគេបំផុតនៅក្នុងតំបន់អាសុី ដោយមានតម្លៃចំនួន៣៦០ដុល្លារអាមេរិកក្នុងមួយខែ។

ក្រុមហ៊ុន Global Property Guide ជាក្រុមហ៊ុនស្រាវជ្រាវ និងវិភាគទីផ្សារអចលនទ្រព្យ ដែលមានមូលដ្ឋាននៅក្នុងរដ្ឋធានីតាលីន (Tallinn)របស់ប្រទេសអេស្តូនី។

ក្រុមហ៊ុននេះធ្វើការប្រមូលចងក្រងនូវទិន្នន័យពីបណ្តាប្រទេសនានាជាង៨០ប្រទេស និងជាង៤០០ទីក្រុងនៅទូទាំងទ្វីបអឺរ៉ុប ទ្វីបអាស៊ី ទ្វីបមជ្ឈិមបូព៌ា និងទ្វីបអាមេរិកឡាទីន៕ប្រភព: Vnexpress & Global Property Guide៕

ដោយៈ គង់ ម៉ាណា

    ភ្នំពេញៈ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅថ្ងៃទី១០ ខែមីនា ឆ្នាំ២០២៥នេះ បានថ្លែងថា បណ្ណបេឡាជាតិរបបសន្ដិសុខសង្គម (ប.ស.ស) មានអត្ថប្រយោជន៍ច្រើនដល់បងប្អូនកម្មករ ទាំងពេលមានជំងឺ និងមានគ្រោះថ្នាក់អ្វីក៏ដោយ គឺប.ស.ស ជាអ្នករ៉ាប់រងទាំងអស់។

ក្នុងឱកាសអញ្ជើញសម្ពោធដាក់ឲ្យប្រើប្រាស់ ទារកដ្ឋានរោងចក្រកាត់ដេរម៉ាវ៉ល ស្ថិតនៅតំបន់សេដ្ឋ​កិច្ច​ពិសេសរ៉ូយ៉ាល់គ្រុបភ្នំពេញ សម្តេចបវរធិបតី ហ៊ុន ម៉ាណែត គូសបញ្ជាក់ថា ក្រោយមានការផ្ដល់ប្រព័ន្ធគាំពារសង្គម ប្រជាពលរដ្ឋក្ដី​កម្មករក្ដី​ បានទទួលអត្ថប្រយោជន៍ជាច្រើន ទាំងពេលមានជំងឺ និងមានគ្រោះថ្នាក់ ជាពិសេសកាត់បន្ថយការចំណាយច្រើន ទៅលើការចំណាយតូចៗដូចជា ការពិគ្រោះជម្ងឺផ្សេងៗ ការពិនិត្យ ការផ្ដល់ថ្នាំសម្រាប់ព្យាបាលជាដើម។

សម្ដេចធិបតី នាយករដ្ឋមន្ត្រីបានបន្តថា ក្រៅពី ប.ស.ស ក្រុមហ៊ុនឯកជនក៏បានរួមចំណែក ក្នុងការសម្រាលការងារ និងថ្លៃចំណាយទៅដល់កម្មករនិយោជិក តាមរយៈការផ្ដល់ទារកដ្ឋាន នៅក្នុងរោងចក្រ ដែលអាចជួយឲ្យម្ដាយ និងកុមារមានភាពជិតស្និទ្ធ និងមិនត្រូវចំណា​យថវិកាទៅលើការជួលអ្នកថែទាំខាងក្រៅ។

ជាមួយគ្នានេះ សម្ដេចបានបន្តថា ដោយមានការ៉ាប់រងពី ប.ស.ស ប្រជាពលរដ្ឋអាចកាត់បន្ថយការចំណាយ និងសន្សំប្រាក់ តាមរយៈការផ្ដល់ប្រព័ន្ធគាំពារសង្គម ដោយមិនគិតថ្លៃពី ប.ស.ស ផងដែរ។

សម្តេចមហាបវរធិបតី ហ៊ុន ម៉ាណែត បានឲ្យដឹងថា គោលដៅរបស់រាជរដ្ឋាភិបាល នឹងបង្កើនទារកដ្ឋានបន្ថែមទៀត នៅតាមរោងចក្រសហគ្រាសឲ្យបានច្រើនតាមដែលអាចធ្វើបាន ដើម្បីជួយសម្រួលបន្ទុកដល់កម្មកររោងចក្រ ជាពិសេសកម្មការិនី ដែលមានបន្ទុកត្រូវធ្វើការផង និងមើលថែទាំកូនផង។

គិតត្រឹមដំណាច់ឆ្នាំ២០២៤ ស្រ្តីមានផ្ទៃពោះ និងកុមារអាយុក្រោម២ឆ្នាំ ដែលមកពីគ្រួសារក្រីក្រមានបណ្ណសមធម៌ និងសមាជិក ប.ស.ស. មានចំនួនសរុបប្រមាណ១,១លាននាក់ កំពុងទទួលបានប្រាក់ឧបត្ថម្ភពីរាជរដ្ឋាភិបាល តាមរយៈកម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម២ឆ្នាំ ដែលគោលការណ៍នេះបង្ហាញថា វិសាលភាពនៃការគ្របដណ្តប់ របស់ប្រព័ន្ធគាំពារសង្គមនៅកម្ពុជា មានការកើនឡើងមួយកម្រិតទៀត៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានស្ថិតក្នុងសភាពទ្រឹងក្នុងការជួញដូរនៅព្រឹកថ្ងៃច័ន្ទដើមសប្តាហ៍នេះ ខណៈបណ្តាអ្នកវិនិយោគកំពុងរង់ចាំអ៊ុតមើលទិន្នន័យសន្ទស្សន៍តម្លៃទំនិញប្រើប្រាស់ (CPI) របស់សហរដ្ឋអាមេរិក។

តួយ៉ាង តម្លៃមាស Spot Gold បានស្ថិតនៅទ្រឹងត្រឹមជាង២.៩១០ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,០៣ភាគរយដល់២.៩១៥ដុល្លារក្នុងមួយអោនគិតត្រឹមម៉ោង១០:៥១នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៩៧ភាគរយ ដែលធនាគារកណ្តាលអាមេរិក (Fed) នឹងបន្តរក្សាទុកអត្រាការប្រាក់របស់ខ្លួនឱ្យនៅថេរដដែលក្នុងកិច្ចប្រជុំគោលនយោបាយនៅថ្ងៃទី១៩ ខែមីនានេះ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានងើបឡើងថ្លៃវិញបន្តិចដល់១០៣,៨៦ពិន្ទុនៅព្រឹកថ្ងៃច័ន្ទនេះ បន្ទាប់ពីបានបិទការជួញដូរត្រឹម១០៣,៨៤ពិន្ទុកាលពីថ្ងៃសុក្រសប្តាហ៍មុន។

ចំណែក តម្លៃលោហៈធាតុប្រាក់ Spot silver បានងើបឡើង០,៣១ភាគរយដល់៣២,៩១ដុល្លារក្នុងមួយអោន ខណៈតម្លៃផ្លាទីនបានងើបឡើង០,២២ភាគរយដល់៩៦៨,៦០ដុល្លារក្នុងមួយអោន ហើយតម្លៃ palladium បានធ្លាក់ចុះ០,១៦ភាគរយដល់៩៥៤ដុល្លារក្នុងមួយអោនគិតត្រឹមម៉ោង១០:៥៣នាទីព្រឹក៕