ដោយ: គង់ លាងហួរ
អន្តរជាតិ: ទីក្រុងប៉ាតាយ៉ាជាគោលដៅទេសចរណ៍ដ៏ពេញនិយមបំផុតមួយរបស់ប្រទេសថៃ ខណៈទីក្រុងនេះពឹងផ្អែកយ៉ាងខ្លាំងលើវិស័យទេសចរណ៍ ដើម្បីជំរុញកំណើនសេដ្ឋកិច្ចរបស់ខ្លួន។ នេះបើយោងតាមការចុះផ្សាយដោយសារពត៌មាន Pattaya Mail។

ទីក្រុងប៉ាតាយ៉ាបានទាក់ទាញភ្ញៀវទេសចរណ៍រាប់លាននាក់ជារៀងរាល់ឆ្នាំ ដោយសារការកំសាន្តនាពេលរាត្រីយ៉ាងរស់រវើក ឆ្នេរសមុទ្រដ៏ស្រស់ស្អាត និងភាពទាក់ទាញផ្នែកវប្បធម៌។

ប៉ុន្តែ​ សំណួរ​នៅ​តែ​ត្រូវបានចោទសួរថា តើ​អំណាច​នៃការចំណាយ​របស់​​ភ្ញៀវទេសចរណ៍រាប់លាននាក់ទាំង​នេះ​គ្រប់គ្រាន់​ ដើម្បី​ជំរុញ​សេដ្ឋកិច្ច​របស់​ប្រទេសថៃឱ្យរីកចម្រើនលូតលាស់ទៅ​មុខ​ដែរឬ​ទេ?។

ភ្ញៀវទេសចរណ៍នៅទីក្រុងប៉ាតាយ៉ាចំណាយប្រាក់លើផ្នែកផ្សេងៗ ដូចជាកន្លែងស្នាក់នៅ អាហារ និងភេសជ្ជៈ ការកម្សាន្ត ការដឹកជញ្ជូន ការទិញទំនិញ និងសកម្មភាពកម្សាន្ត។ការចំណាយទាំងនេះបានជួយទ្រទ្រង់បណ្តាអាជីវកម្មក្នុងស្រុក និងបង្កើតការងារនៅក្នុងផ្នែកបដិសណ្ឋារកិច្ច សេវាកម្ម និងផ្នែកលក់រាយ។

លំហូរភ្ញៀវទេសចរណ៍អន្តរជាតិបានផ្តល់នូវការជំរុញសន្ទុះយ៉ាងខ្លាំងក្លាដល់ដំណើរការសេដ្ឋកិច្ចរបស់ទីក្រុងប៉ាតាយ៉ា។ប៉ុន្តែ គេក៏បានសង្កេតឃើញមានឧបសគ្គជាច្រើនផងដែរ ដែលបង្កការរាំងស្ទះទៅដល់និរន្តរភាពនៃកំណើនសេដ្ឋកិច្ចថៃ។

ការប្រមូលផ្តុំច្រើននៃភ្ញៀវទេសចរណ៍បរទេសនៅតាមតំបន់ឆ្នេរ ផ្លូវដើរថ្មើរជើង និងរមណីយដ្ឋានធំៗបានក្លាយទៅជាកង្វល់ដ៏ចម្បងមួយ។ការណ៍នេះបង្កើតបាននូវប្រាក់ចំណូលខ្ពស់ក្នុងរយៈពេលខ្លី និងជះឥទ្ធិពលវិជ្ជមានតិចតួចទៅកាន់តំបន់ផ្សេងទៀតក្នុងទីក្រុងប៉ាតាយ៉ា។

លើសពីនេះ អ្នកទស្សនាភាគច្រើនមានទំនោរចំណាយតែលើតម្រូវការជាមូលដ្ឋានដូចជា ការទទួលទានអាហារ និងការស្នាក់នៅ ជាជាងលើការវិនិយោគរយៈពេលវែង ឬផលិតផល និងសេវាកម្មដែលមានតម្លៃខ្ពស់ជាងនេះ។

សេដ្ឋកិច្ចរបស់ទីក្រុងប៉ាតាយ៉ាក៏ទទួលរងឥទ្ធិពលយ៉ាងខ្លាំងពីទីផ្សារទេសចរណ៍ពិភពលោកផងដែរ ដែលធ្វើឱ្យទីក្រុងនេះងាយរងគ្រោះទៅនឹងការប្រែប្រួលនៃចំនួនភ្ញៀវទេសចរណ៍ ដោយសារកត្តានានាដូចជា អស្ថិរភាពភូមិសាស្ត្រនយោបាយ លក្ខខណ្ឌសេដ្ឋកិច្ចពិភពលោកមិនអំណោយផល ឬវិបត្តិសុខភាពជាដើម។

ជាពិសេស នៅពេលដែលចំនួនភ្ញៀវទេសចរណ៍អន្តរជាតិមានការថមថយចុះ ការណ៍នេះនឹងបង្កជាផលប៉ះពាល់ដោយផ្ទាល់ទៅលើបណ្តាអាជីវកម្ម ដែលពឹងផ្អែកលើលំហូរភ្ញៀវទេសចរណ៍។

ទោះបីជាប្រឈមមុខនឹងបញ្ហាទាំងអស់នេះយ៉ាងណាក្តី ទីក្រុងប៉ាតាយ៉ានៅតែបន្តខិតខំព្យាយាមសម្របខ្លួន ដើម្បីធ្វើពិពិធកម្មផលិតផលទេសចរណ៍របស់ខ្លួន ដូចជាការអភិវឌ្ឍន៍ទេសចរណ៍បែបធម្មជាតិ បទពិសោធន៍វប្បធម៌ និងការទាក់ទាញភ្ញៀវទេសចរណ៍ជាលក្ខណៈគ្រួសារ។

ជាមួយគ្នានោះ ការបង្កើតគំនិតផ្តួចផ្តើមថ្មីៗនានាក្នុងការជំរុញភាពប្រណីត និងទាក់ទាញភ្ញៀវទេសចរណ៍លំដាប់អ្នកមានមានគោលបំណងជំរុញឱ្យការចំណាយរបស់ភ្ញៀវទេសចរណ៍កើនឡើង ដែលអាចនាំឱ្យសេដ្ឋកិច្ចទទួលបានផលចំណេញ។

ជារួម អំណាចនៃការចំណាយរបស់ភ្ញៀវទេសចរណ៍ ដែលមកលេងកំសាន្តនៅទីក្រុងប៉ាតាយ៉ាបានដើរតួនាទីយ៉ាងសំខាន់ក្នុងទិដ្ឋភាពសេដ្ឋកិច្ចរបស់ប្រទេសថៃ។

ចំណែកឯ ការសម្រេចបាននិរន្តរភាព និងកំណើនអាស្រ័យលើការធ្វើពិពិធកម្ម ភាពធន់នឹងការប្រែប្រួលលើពិភពលោក និងយុទ្ធសាស្រ្តរយៈពេលវែងដូចជាការវិនិយោគលើហេដ្ឋារចនាសម្ព័ន្ធ និងទីផ្សារទេសចរណ៍ថ្មី៕ប្រភព: Pattaya Mail៕

ដោយៈ គង់ សូរិយា

    ភ្នំពេញៈ ក្រុមការងារបច្ចេកទេសអន្តរក្រសួង បានចុះពិនិត្យ និងដោះស្រាយផលប៉ះពាល់ ហេដ្ឋារចនាសម្ព័ន្ធសាធារណៈ ដែលប៉ះពាល់គម្រោងសាងសង់ស្ពានឆ្លងកាត់ទន្លេមេគង្គ (ដីឥដ្ឋ -ថ្មគរ)។

សូរ វ៉ិចទ័រ រដ្ឋលេខាធិការ និងជានាយកគ្រប់គ្រងគម្រោង លោកស៊ឹង សុគង់ អនុរដ្ឋលេខាធិការ បានដឹកនាំក្រុមការងារបច្ចេកទេសអង្គភាពគ្រប់គ្រងគម្រោង រួមជាមួយក្រុមការងារបច្ចេកទេសអន្តរក្រសួង រួមមាន តំណាងក្រសួងសេដ្ឋកិច្ច និងហិរញ្ញវត្ថុ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ អាជ្ញាធរអគ្គិសនី អគ្គិសនីកម្ពុជា ក្រុមហ៊ុនសាងសង់CRBC និងក្រុមហ៊ុនទីប្រឹក្សាបច្ចេកទេសWACC  បានចុះពិនិត្យរួមគ្នា ដើម្បីជំរុញដោះស្រាយផលប៉ះពាល់ ហេដ្ឋារចនាសម្ព័ន្ធសាធារណៈ ដូចជាបណ្តាញបង្គោលខ្សែអគ្គិសនី ប្រព័ន្ធទឹកស្អា​ត បណ្តាញខ្សែកាបអុបទិកជាដើម  ដែលរងផលប៉ះពាល់ដោយសារ គម្រោងសាងសង់ស្ពានឆ្លងកាត់ទន្លេមេគង្គ(ដីឥដ្ឋ -ថ្មគរ)។

ការដោះស្រាយផលប៉ះពាល់ ជាមួយប្រជាពលរដ្ឋស្ទើតែបញ្ចប់ទាំងស្រុង ដែលផ្តល់លទ្ធភាពឱ្យស្ថាប័ន អង្គភាពពាក់ព័ន្ធអាចដំណើរការរុះរើ កែសម្រួលហេដ្ឋារចនាសម្ព័ន្ធសាធារណៈ និងរៀបចំឡើងវិញរួចរាល់មុនចូលឆ្នាំប្រពៃណីជាតិ ដើម្បីបង្កលក្ខណៈងាយស្រួលដល់ដំណើការអនុវត្តគម្រោងទាំងមូលបានរលូន និងបញ្ចប់ទាន់ពេលវេលា។

បច្ចុប្បន្នក្រុមហ៊ុនសាងសង់កំពុងមមាញឹក ក្នុងការរៀបចំសាងសង់ស្ពានដែកបណ្តោះអាសន្ន ទាំងផ្នែកខាងលិច និងខាងកើត ដើម្បីបំពាក់សម្ភារគ្រឿងចក្រ ខួងសរសរគ្រឹះនាពេលខាងមុខដ៏ខ្លី។

គម្រោងស្ពានឆ្លងកាត់ទន្លេមេគង្គ(ដីឥដ្ឋ-ថ្មគរ) ជាប្រភេទស្ពានបេតុង ប្រវែងសរុប៣៧០០ម៉ែត្រ ក្នុងនោះ តួស្ពានប្រវែងសរុប១ ៦០០ម៉ែត្រ និងទទឹង២៦ម៉ែត្រ(៤គន្លងផ្លូវ)។ ផ្លូវតភ្ជាប់ក្បាលស្ពាន ប្រវែង២១០០ ម៉ែត្រ ទទឹងផ្លូវ២៦ម៉ែត្រ ក្រាលបេតុងកៅស៊ូ(AC) និងសាងសង់ផ្លូវបង្វែរទិសចរាចរណ៍ ចំនួន៤ខ្សែ។ រយៈពេលសាងសង់ចំនួន៤៨ខែ ដោយគ្រោងនឹងបញ្ចប់ក្នុងឆ្នាំ២០២៨។

គម្រោងសាងសង់ស្ពានឆ្លងកាត់ទន្លេមេគង្គ(ដីឥដ្ឋ -ថ្មគរ)ជាផ្នែកមួយនៃគម្រោងសាងសង់ ផ្លូវល្បឿនលឿនភ្នំពេញ-បាវិត ដែលគិតត្រឹមដើមខែមីនា ឆ្នាំ២០២៥នេះ សម្រេចបាន៧%ហើយ៕

ដោយ: គង់ លាងហួរ
អន្តរជាតិ: យោងតាមមជ្ឈមណ្ឌលស្រាវជ្រាវ Kasikorn (K-Research) បានឱ្យដឹងថា ការបិទរោងចក្រនៅក្នុងប្រទេស​ថៃអាច​នឹង​មានស្ថានភាព​កាន់តែធ្ងន់ធ្ងរនៅឆ្នាំ២០២៥នេះ ដោយសារ​តែការធ្លាក់ចុះនៃវិស័យផលិតកម្ម និងបញ្ហាប្រឈមផ្នែកសេដ្ឋកិច្ច។

មជ្ឈមណ្ឌល​​ Kasikorn បន្តថា ការបិទរោងចក្រកាលពីឆ្នាំ២០២៤ មានចំនួនជាង១០០រោងចក្រក្នុងមួយខែ​​។ ក្នុងនោះ ​ការបិទសហគ្រាសធុនតូច និងមធ្យម (SMEs) ​មាន​ចំនួនច្រើន​ជាង​គេ​ ដោយសារ​តែ​ការធ្លាក់ចុះនៃលំហូរមូលធន។

ជាមធ្យម បណ្តាក្រុមហ៊ុន ដែលបានបិទរោងចក្រនៅក្នុងប្រទេសថៃកាលពីឆ្នាំ២០២៤មានទំហំដើមទុនវិនិយោគតិចជាងរោងចក្រដែលបានបិទទ្វារនៅឆ្នាំ២០២៣ ចំនួន៣,៨ដង​។

គិតចាប់ពីឆ្នាំ២០២១ដល់ឆ្នាំ២០២២ គេបានសង្កេតឃើញមានការបិទរោងចក្រចំនួន៤.៨៥៥កន្លែង និងការបើករោងចក្រថ្មីចំនួន១.៨១៨កន្លែង។ តួលេខនេះ​បង្ហាញថា រោងចក្រប្រមាណ១២៧កន្លែងបាន​បិទទ្វារជាមធ្យមក្នុងមួយខែ។ ​​

ចាប់ពីឆ្នាំ២០២៣ ដល់ឆ្នាំ២០២៤ គេសង្កេតឃើញមានការបិទរោងចក្រចំនួន៤.៣០២កន្លែង និងការបើករោងចក្រថ្មីចំនួន៣.០៣៤កន្លែង។ តួលេខនេះ​បង្ហាញថា ជាមធ្យម មានរោងចក្រចំនួន៥៣កន្លែងបិទទ្វារក្នុងមួយខែ។

ស្ថាប័ន K-Research បានកត់សម្គាល់ថា រោងចក្រឧស្សាហកម្មគ្រឿងសង្ហារឹម គ្រឿងអេឡិចត្រូនិច កាត់ដេរ យានយន្ត និងដែកថែប បានបិទ​ទ្វារច្រើនជាងគេ។

កត្តាសំខាន់ៗ ដែលនាំឱ្យរោងចក្រទាំងនោះសម្រេចចិត្ដបិទទ្វារ រួមមាន​ ​​ការធ្លាក់ចុះនៃកំណើន​សេដ្ឋកិច្ច​ថៃ​​​​ និងតម្រូវការក្នុងស្រុក រួមទាំងបញ្ហា​រចនាសម្ព័ន្ធ​ក្នុង​វិស័យ​ផលិតកម្ម​ ដែល​ធ្វើឱ្យ​សមត្ថភាព​ប្រកួតប្រជែង​របស់​សហគ្រាស​ធុន​តូច និង​មធ្យម​ក្នុងស្រុក​
បន្តធ្លាក់ចុះ។

ទន្ទឹមនឹង​នោះ សង្គ្រាមពាណិជ្ជកម្មរវាងសហរដ្ឋអាមេរិកជាមួយប្រទេសចិន និងការប្រកួតប្រជែងកាន់តែខ្លាំង​​ឡើងទាំង​ក្នុង​ស្រុក និងទំនិញនាំចូលក៏បានជះផលប៉ះពាល់ដល់ការប្រកួតប្រជែងរបស់សហគ្រាសធុនតូច និងមធ្យមនៅក្នុងប្រទេសថៃផងដែរ៕ប្រភព: Bangkok Post៕