ដោយ: គង់ លាងហួរ
អន្តរជាតិ: ប្រទេសជប៉ុនគ្រោងនឹងសាងសង់រោងចក្រថាមពលពន្លឺព្រះអាទិត្យបណ្តែតលើផ្ទៃទឹកដ៏ធំជាងគេបំផុតនៅលើពិភពលោក ដើម្បីបោះជំហានឈានមុខគេឆ្ពោះទៅរកប្រភពថាមពលកកើតឡើងវិញ។

ការបណ្តែតបន្ទះសូឡានៅលើផ្ទៃទឹកដើម្បីស្រូបទាញយកពន្លឺព្រះអាទិត្យ មកផលិតជាថាមពលអគ្គិសនីមានគោលដៅកាត់បន្ថយថ្លៃដើមនៃការផលិត ខណៈការដំឡើងបន្ទះសូឡាលើដីគោកអាចចំណាយដើមទុនវិនិយោគអស់ច្រើន ព្រោះដីមានតម្លៃថ្លៃ។

គម្រោងរោងចក្រ​ថាមពល​ពន្លឺ​ព្រះអាទិត្យ​បណ្តែត​លើផ្ទៃទឹក​ដ៏​ធំ​បំផុតនេះមាន​ទីតាំង​នៅ​អាង​ស្តុក​ទឹក Yamakura ក្នុង​តំបន់ Chiba របស់​ប្រទេស​ជប៉ុន ដែលនឹងត្រូវបានអភិវឌ្ឍន៍ឡើងដោយក្រុមហ៊ុនក្នុងស្រុក Kyocera ។

រោងចក្រ​ថាមពល​ស្អាតនេះ​នឹង​បំពាក់បន្ទះ​ស្រូប​ពន្លឺព្រះអាទិត្យ​ចំនួន៥០.០០០សន្លឹក ដែល​អាច​ផ្គត់ផ្គង់​ថាមពលអគ្គិសនី​ដល់​ប្រជាពលរដ្ឋជប៉ុន​ចំនួន៥.០០០គ្រួសារ នៅពេល​បើកសម្ពោធដាក់ឱ្យដំណើរការ។

គំនិតផ្តួចផ្តើមនេះជាផ្នែកមួយនៃកិច្ចខិតខំប្រឹងប្រែងរបស់ប្រទេសជប៉ុនក្នុងការស្វែងរកប្រភពថាមពលកកើតឡើងវិញ ដើម្បីបញ្ចៀសគ្រោះមហន្តរាយកាលពីឆ្នាំ២០១១ដែលកើតចេញពីរោងចក្រផលិតថាមពលអគ្គិសនីដើរដោយថាមពលនុយក្លេអ៊ែរនៅក្នុងទីក្រុង Fukushima កុំឱ្យកើតឡើងម្តងទៀត។

ជប៉ុនជាប្រទេសមួយ ដែលមានទំហំផ្ទៃដីគោកតូច ព្រោះប្រទេសនេះត្រូវបានហ៊ុព័ទ្ធដោយមហាសមុទ្រ។ ដូច្នេះ ការសាងសង់គម្រោងរោងចក្រថាមពលពន្លឺព្រះអាទិត្យបណ្តែតលើផ្ទៃទឹកជាមធ្យោបាយដ៏ល្អមួយ និងអាចបង្កើនប្រសិទ្ធភាព ដោយសារបន្ទះសូឡានឹងមិនទទួលរងកំដៅខ្លាំងពេក។

ម៉្យាងវិញទៀត ការដំឡើងបន្ទះសូឡានៅលើផ្ទៃទឹកក៏នឹងបង្កើតបានជាម្លប់ដល់អាងស្តុកទឹក Yamakura ផងដែរ ដោយជួយកាត់បន្ថយការបាត់បង់ទឹក ដោយសារតែអាកាសធាតុក្តៅហួតហែង៕ប្រភព: Union Rayo EN៕

ដោយ: គង់ លាងហួរ
អន្តរជាតិ: ប្រទេសម៉ាឡេស៊ី​​កំពុងក្លាយជា​គោលដៅ​នៃការវិនិយោគទៅលើ​មជ្ឈមណ្ឌល​ទិន្នន័យ​ដ៏ធំនៅក្នុងតំបន់អាស៊ាន ខណៈបណ្តាក្រុមហ៊ុន​បច្ចេកវិទ្យា​ជាច្រើន ​បាន​បោះទុន​រាប់​ពាន់​លាន​ដុល្លារដើម្បី​អភិវឌ្ឍន៍​ហេដ្ឋារចនាសម្ព័ន្ធ​ឌីជីថល​ទំនើបក្នុងប្រទេសមួយនេះ។

ជាក់ស្តែង ក្រុមហ៊ុនអភិវឌ្ឍន៍អចលនទ្រព្យម៉ាឡេសុី Eco World Development Group គ្រោងលក់ដីឧស្សាហកម្មមួយកន្លែងទៀតដែលមានទំហំជាង៥៦ហិកតា ស្ថិតក្នុងរដ្ឋ Johor ទៅកាន់ក្រុមហ៊ុន Microsoft ក្នុងតម្លៃ១៥៧,៧៤លានដុល្លារ។

កាលពីខែមិថុនា ឆ្នាំមុន ក្រុមហ៊ុន Eco World Development បានលក់ដីឧស្សាហកម្មទំហំជិត៥០ហិកតាក្នុងតំបន់ឧស្សាហកម្ម Eco Business Park VI របស់ខ្លួនទៅឱ្យក្រុមហ៊ុន Microsoft ម្តងរួចមកហើយសម្រាប់ការអភិវឌ្ឍន៍មជ្ឈមណ្ឌលទិន្នន័យ។

ក្រុមហ៊ុន EcoWorld បានអះអាងថា ការលក់ដីទាំងនេះសរបង្ហាញឱ្យឃើញពីភាពទាក់ទាញនៃការវិនិយោគមជ្ឈមណ្ឌលទិន្នន័យចូលទៅកាន់រដ្ឋ Johor ស្ថិតនៅភាគខាងត្បូងនៃប្រទេសម៉ាឡេស៊ី ជាប់ព្រំដែនជាមួយប្រទេសសិង្ហបុរី។

តាមរយៈឯកសារមួយផ្ញើទៅកាន់ផ្សារហ៊ុនម៉ាឡេសុី ក្រុមហ៊ុន EcoWorld Malaysia បានគូសបញ្ជាក់ថា ក្រុមហ៊ុនបុត្រសម្ព័ន្ធរបស់ខ្លួន ដែលមានឈ្មោះថា Eco Business Park 1 បានចុះកិច្ចសន្យាលក់ដីទៅឱ្យក្រុមហ៊ុន Microsoft ដោយភ្ជាប់ជាមួយលក្ខខណ្ឌ។

ការសាងសង់ និងការបើកដំណើរការមជ្ឈមណ្ឌលទិន្នន័យត្រូវការដីធ្លីធំទូលាយ ព្រមទាំងប្រើប្រាស់ថាមពល និងទឹកយ៉ាងច្រើន ។ ក្នុងនោះ ប្រទេសម៉ាឡេស៊ីអាចផ្គត់ផ្គង់ថាមពល និងដីធ្លីក្នុងតម្លៃសមរម្យ។

កត្តាអំណោយផលទាំងនេះបានធ្វើឱ្យម៉ាឡេស៊ីមានសក្តានុពលជាងទីក្រុងដែលមានផ្ទៃដីតូច ដូចជាទីក្រុងហុងកុង និងសិង្ហបុរីជាដើម៕ប្រភព: Edgeprop៕

ដោយ: គង់ លាងហួរ
អន្តរជាតិ: យោងតាមកាសែត The Nation បានរាយការណ៍ថា ទីផ្សារអចលនទ្រព្យខុនដូនៅក្នុងប្រទេសថៃត្រូវបានគេរំពឹងថា នឹងស្ថិតក្នុងសភាពទ្រឹង ឬអាចកើនឡើងតិចតួចក្នុងរង្វង់ប្រមាណ១ភាគរយនៅក្នុងឆ្នាំ២០២៥នេះ ដោយសារការទិញខុនដូដោយជនបរទេស។

នៅក្នុងនោះ បណ្តាអតិថិជនមកពីប្រទេសចិន ប្រទេសមីយ៉ាន់ម៉ា ប្រទេសរុស្ស៊ី និងកោះតៃវ៉ាន់នឹងបន្តនាំមុខគេក្នុងការទិញខុនដូច្រើនបំផុតនៅប្រទេសថៃ បើធៀបនឹងជនបរទេសមកពីបណ្តាប្រទេសផ្សេងទៀត។នេះបើយោងតាមមជ្ឈមណ្ឌលព័ត៌មានអចលនទ្រព្យថៃ (REIC)។

ទោះបីជាយ៉ាងណាក្តី ការអូសបន្លាយនៃភាពតានតឹងភូមិសាស្ត្រនយោបាយនាពេលបច្ចុប្បន្ន ដែលជះផលប៉ះពាល់ជាពិសេសលើបណ្តាអ្នកវិនិយោគមកពីប្រទេសចិន និងប្រទេសរុស្ស៊ី នៅតែជាកត្តាសំខាន់ និងជាមូលដ្ឋាននៃការសម្រេចចិត្តចំពោះការវិនិយោគរបស់ពួកគេ។

ទន្ទឹមនឹងនេះ ពលរដ្ឋមកពីបណ្តាប្រទេសមួយចំនួនដូចជា ឥណ្ឌា អូស្ត្រាលី និងបារាំង ក៏បានបង្ហាញការចាប់អារម្មណ៍កាន់តែខ្លាំងលើទីផ្សារខុនដូនៅក្នុងប្រទេសថៃផងដែរ។

មជ្ឈមណ្ឌលព័ត៌មានអចលនទ្រព្យថៃ (REIC) អះអាងថា ការកើនឡើងនៃអ្នកទិញជាជនជាតិឥណ្ឌាជានិន្នាការសម្រាប់ទីផ្សារខុនដូថៃនៅឆ្នាំនេះ។ តួយ៉ាង បណ្តាអ្នកវិនិយោគឥណ្ឌាបានទិញខុនដូសរុបចំនួន២៦០យូនីតនៅក្នុងប្រទេសថៃ ដែលមានទំំហំទឹកប្រាក់សរុបចំនួន១,៥៣ពាន់លានបាត។

ផ្ទុយពីជនបរទេសភាគច្រើន ដែលជ្រើសរើសទិញយូនីតខុនដូខ្នាតតូច ជនជាតិឥណ្ឌាបានស្វែងរកទិញខុនដូដែលមានទំហំជាង៧០ម៉ែត្រការ៉េ ជាមួយនឹងតម្លៃជាមធ្យមចំនួន៥,៩លានបាតក្នុងមួយយូនីត។

កាលពីឆ្នាំ២០២៤កន្លងទៅ ការលក់ខុនដូទៅឱ្យជនបរទេសនៅក្នុងប្រទេសថៃបានកើនឡើងក្នុងរង្វង់០,៩ភាគរយដល់ចំនួន១៤.៥៧៣យូនីត។

យ៉ាងណាមិញ ទំហំទឹកប្រាក់ដែលទទួលបានពីការលក់ខុនដូសរុបទៅឱ្យជនបរទេសបានធ្លាក់ចុះ៦,៨ភាគរយមកនៅត្រឹមចំនួន៦៨,១៨ពាន់លានបាត ខណៈតម្លៃខុនដូជាមធ្យម ដែលទិញដោយជនបរទេសបានធ្លាក់ចុះមកនៅត្រឹមចំនួន៤,៧លានបាតក្នុងមួយយូនីតនៅឆ្នាំ២០២៤ បើធៀបនឹងតម្លៃ៥,១លានបាតក្នុងមួយយូនីតកាលពីឆ្នាំ២០២៣៕ប្រភព: The Nation៕

ដោយៈ គង់ សូរិយា

    ភ្នំពេញៈ លោកឧបនាយករដ្ឋមន្រ្តីស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា បានរៀបចំជំនួបពិភាក្សាការងារ និងការផ្គូផ្គងធុរកិច្ចជាមួយ គណៈប្រតិភូធុរជនអញ្ជើញ មកពីរដ្ឋកាលីហ្វ័រញ៉ា សហរដ្ឋអាមេរិក។

ប្រតិភូវិនិយោគិន ដឹកនាំដោយ លោកគីម ឆាហួត អគ្គកុងស៊ុលកិត្តិយសកម្ពុជាប្រចាំនៅរដ្ឋកាលីហ្វ័រនីញ៉ា និងជាប្រធានការិយាល័យតំណាងសភាពាណិជ្ជកម្មកម្ពុជា ក្នុងរដ្ឋកាលីហ្វ័រនីញ៉ា។

ក្នុងឱកាសនោះ លោកឧបនាយករដ្ឋមន្ត្រី បានជម្រាបទៅកាន់គណៈប្រតិភូធុរជន អំពីដំណើរអភិវឌ្ឍន៍របស់កម្ពុជា ជាបន្តបន្ទាប់ឥតឈប់ឈរ ក្រោមកិច្ចដឹកនាំប្រកបដោយគតិបណ្ឌិតខ្ពស់របស់ប្រមុខរាជរដ្ឋាភិបាល តាំងពីដើមរហូតមកទល់បច្ចុប្បន្ន ពិសេសជាមួយនឹងគោលនយោបាយក្នុងការបង្កើនពិពិធកម្មសេដ្ឋកិច្ច សំដៅសម្រេចឱ្យបានចក្ខុវិស័យកម្ពុជាឆ្នាំ២០៥០ ជាប្រទេសដែលមានចំណូលខ្ពស់។

ទន្ទឹមនឹងនេះ លោកឧបនាយករដ្ឋមន្ត្រី បានលើកឡើងអំពីសាវតានៃការបង្កើត ក.អ.ក. ក៏ដូចជាបេសកកម្ម និងចក្ខុវិស័យ ក្នុងនាមជាសេនាធិការ និងជាច្រកចេញចូលតែមួយរបស់រាជរដ្ឋាភិបាល លើការងារគ្រប់គ្រងការវិនិយោគឯកជន និងតំបន់សេដ្ឋកិច្ចពិសេស ដែលបាននិងកំពុងបន្តខិតខំជំរុញការកែលម្អ ធ្វើឱ្យប្រសើរឡើងនូវបរិយា​កាសធុរកិច្ច និងការវិនិយោគ ពិសេសការធ្វើឌីជីថលូបនីយកម្ម ក្នុងការផ្តល់សេវាសាធារណៈ។

ជាក់ស្តែងគឺការដាក់ឱ្យប្រើប្រាស់ប្រព័ន្ធ គ្រប់គ្រងគម្រោងវិនិយោ​គកម្ពុជា (ប្រព័ន្ធ cdcIPM) ដែលសម្រួលដល់វិនិយោគិន ក្នុងការដាក់ពាក្យស្នើសុំវិនិយោគបានពីគ្រប់ទីកន្លែង និងគ្រប់ពេលវេលា តាមរយៈប្រព័ន្ធអ៊ីនធឺណេត។

បន្ថែមពីនេះ លោកស៊ុន ចាន់ថុល បានរំលេចអំពីសក្តានុពលវិជ្ជមាននានារបស់កម្ពុជា ដែលជាបច្ច័យសម្រាប់ពិចារណា ក្នុងការមកដាក់ទុនវិនិយោគ រួមមាន៖ ទីតាំងភូមិសាស្រ្តដែលមានអំណោយផលខ្ពស់ និងជាប្រភពនៃថាមពលកកើតឡើងវិញ សុខសន្តិភាព និងស្ថិរភាពនយោបាយ លំនឹងម៉ាក្រូសេដ្ឋកិច្ច កម្លាំងពលកម្មវ័យក្មេងដែលមានលក្ខណៈរួចរាល់ សម្រាប់បរិវត្តកម្មឌីជីថល និងបើកទូលាយក្នុងការទទួលយកការបណ្តុះបណ្តាលថ្មីៗ។

ការគាំទ្រពីសំណាក់រាជរដ្ឋាភិបាល ដល់ការរីកលូតលាស់នៃវិស័យធុរកិច្ចឯកជន តាមរយៈវេទិការាជរដ្ឋាភិបាល-ផ្នែកឯកជន។ ច្បាប់ស្តីពីវិនិយោគដែលមានភាពបត់បែន និងអនុគ្រោះខ្ពស់ ហេដ្ឋារចនាសម្ព័ន្ធដឹកជញ្ជូនអន្តរមធ្យោបាយ និងវិស័យភស្តុភារកម្ម ដែលបាននិងកំពុងអភិវឌ្ឍឱ្យកាន់តែមានភាពសម្បូរបែប និងប្រទាក់ក្រឡា ទាំងផ្លូវគោក ផ្លូវទឹក ផ្លូវដែក និងផ្លូវអាកាស សំដៅជំរុញឱ្យ សមាហរណកម្មនៅទូទាំងប្រទេស និងទៅកាន់តំបន់មានភាពប្រសើរឡើង។

បន្ទាប់ពីបានស្តាប់ប្រសាសន៍លើកឡើងរបស់ លោកឧបនាយករដ្ឋមន្ត្រី គណៈប្រតិភូធុរជនបានគោរពជូននូវការកោតសរសើរ និងសម្តែងនូវចំណាប់អារម្មណ៍ខ្ពស់ លើការរីកចម្រើនគួរឱ្យកត់សម្គាល់របស់កម្ពុជា។

ទន្ទឹមនឹងនេះ គណៈប្រតិភូធុរជន ក៏បានធ្វើការវាយតម្លៃខ្ពស់ចំពោះការយកចិត្តទុកដាក់ របស់រាជរដ្ឋាភិបាល ក៏ដូចជាក.អ.ក.ផ្ទាល់ ក្នុងការសម្របសម្រួល និងថែទាំគាំទ្រដល់វិស័យឯកជន ព្រមទាំងបានបង្ហាញនូវឆន្ទៈ ក្នុងការពិនិត្យលទ្ធភាព ដើម្បីពង្រឹងកិច្ចសហប្រតិបត្តិការទ្វេភាគីរវាងរដ្ឋកាលីហ្វ័រញ៉ា និងកម្ពុជា ជាពិសេសលើទំនាក់ទំនងសេដ្ឋកិច្ច និងការវិនិយោគរវាងតំបន់ទាំងពីរ៕

ដោយៈ គង់ សូរិយា

    ភ្នំពេញៈ ក្រុមហ៊ុន​ Nex Healthcare Co., Ltd.​ ដែលមានមុខសញ្ញាវិនិយោគផលិតស្រោមដៃ (PVC & Rubber) និងឧបករណ៍បរិក្ខារពេទ្យ​ មានទីតាំងស្ថិតក្នុងតំបន់សេដ្ឋកិច្ចពិសេសឈីលូ ខេត្តស្វាយរៀង​ ដោយបោះទុនក្នុងទំហំទុនវិនិយោគ ​ប្រមាណ​២៧៣​លានដុល្លារអាមេរិក​ លើផ្ទៃដី​ទំហំ​២១ហិកតា។

ក្រុមហ៊ុន​នេះ ជាក្រុមហ៊ុនបុត្រសម្ព័ន្ធរបស់ក្រុមហ៊ុន Shadong Blue Sail Health Technology Co., Ltd. មកពីខេត្តសានដុង សាធារណរដ្ឋប្រជាមានិតចិន​ តំណាងដោយ លោកស្រី Liu Wenjing​ ។ ផលិតផលស្រោមដៃការពារសុខភាព របស់ក្រុមហ៊ុននេះ​ ជាប់ចំណាត់ថ្នាក់លេខ៣​ នៅទូទាំងពិភពលោក។ រីឯ​ឧបករណ៍​ពិនិត្យ​បេះដូង ជាប់ចំណាត់ថ្នាក់លេខ៤​ ទូទាំងពិភពលោក និងជាប់លេខ២​នៅក្នុងប្រទេសចិន។

លោកជា វុទ្ឋីអគ្គលេខាធិការក្រុមប្រឹក្សាអភិវឌ្ឍន៍កម្ពុជា បានអញ្ជើញជាអធិបតី ក្នុងពិធីបើកការដ្ឋានសាងសង់រោងចក្ររបស់ក្រុមហ៊ុនខាងលើនេះ។

លោកអគ្គលេខាធិការ​ បានជម្រាបជូន​វិនិយោគិន និងភ្ញៀវជាតិ-អន្តរជាតិទាំងអស់​អំពីភាពជោគជ័យ ​របស់តំបន់សេដ្ឋកិច្ចពិសេស​មកដល់សព្វថ្ងៃនេះ​ គឺកើតចេញក្រោមគំនិតផ្តួចផ្តើម ប្រកបដោយគតិបណ្ឌិ​តរបស់សម្តេច​តេជោ​ ហ៊ុន​ សែន​ អតីតនាយករដ្ឋមន្ត្រី​ បច្ចុប្បន្ន​ជាប្រធានព្រឹទ្ធសភា​ ដែលតែងតែ​យកចិត្តទុកដាក់​ខ្ពស់ ចំពោះតំបន់សេដ្ឋកិច្ចពិសេស ដោយប្រើនូវអភិក្រមចំនួន៣​ រួមមានៈ​ កាត់បន្ថយពេលវេលា កាត់បន្ថយ​ចំណាយ​ និងកាត់បន្ថយឋានានុក្រម​លើប្រតិបត្តិការវិនិយោគ​ និងនីតិវិធីផ្សេងៗ។

បន្ថែមពីនេះ​ សម្តេច​មហាបវរធិបតី​ ហ៊ុន​ ម៉ាណែត​ នាយករដ្ឋមន្ត្រី​នៃព្រះរាជាណាចក្រកម្ពុជា​ ក៏បានផ្តល់នូវអភិក្រមចំនួន​៣​ គឺ​ការទាក់ម៉ូយ​ ទាក់ទាញវិនិយោគិន​ ការថែទាំវិនិយោគិន​ និងការជំរុញដើម្បីឱ្យវិនិយោគិន បន្តទាក់ទាញវិនិយោគិនថ្មីៗបន្ថែមទៀត។

សមិទ្ធផល​វឌ្ឍនភាព​នៃការរីកចម្រើន នៃការអភិវឌ្ឍតំបន់សេដ្ឋកិច្ចពិសេសនេះ​ កើតចេញពីការចង្អុលបង្ហាញ​ ការណែនាំដ៏ប៉ិនប្រសប់​របស់សម្តេចទាំងពីរ។

ជាការឆ្លើយតបមន្ត្រីតំណាងក្រសួងស្ថាប័ន និងអាជ្ញាធរទាំងអស់ដែលបំពេញការងារប្រចាំការនៅតាមតំបន់​ បានប្តេជ្ញា​យ៉ាងម៉ុតមាំថា​ នឹងបន្តខិតខំអនុវត្តតាមការណែនាំ​ និងការចង្អុលបង្ហាញស្របតាមអភិក្រមដ៏ថ្លៃថ្លារបស់សម្តេចទាំងពីរ។

ការកើនឡើងនៃចំនួន​គម្រោងវិនិយោគ​ជាបន្តបន្ទាប់​ ក៏ដូចជាតំបន់សេដ្ឋកិច្ចពិសេសនាពេលនេះ បានសបញ្ជាក់អំពីការអភិវឌ្ឍន៍របស់តំបន់សេដ្ឋកិច្ចពិសេសបាន និងកំពុងទាក់ទាញវិនិយោគិនមកបណ្តាក់ទុនវិនិយោគជាហូរហែរ ព្រមទាំងបានបង្កើតការងារនិងលើកកម្ពស់ជីវភាពបងប្អូនប្រជាពលរដ្ឋ  ជាពិសេសបានជំរុញឱ្យមានកំណើ​នសេដ្ឋកិច្ចជាតិជាបន្តបន្ទាប់៕

ដោយៈ គង់ សូរិយា

    ភ្នំពេញៈ មន្រ្តីជាន់ខ្ពស់​ក្រសួងសេដ្ឋកិច្ច និងហិរញ្ញវត្ថុបានអះអាងថា ដើម្បី​លើកទឹកចិត្ត​ដល់វិនិយោគិន​បន្ថែម​ទៀត​ រដ្ឋាភិបាល​នឹងពង្រីកវិសាលភាព​កម្មវិធី​ពិសេស​ ជំរុញការវិនិយោគ​ក្នុងក្របខ័ណ្ឌទូទាំងប្រ​ទេស​ បន្ទាប់ពីកម្មវិធីនេះ ត្រូវ​បានអនុវត្តន៍ដោយ​​​ជោគជ័យគួរជាទីមោទនៈ​នៅក្នុង​ខេត្ត​ព្រះសីហនុ​។

ក្រោមគំនិត​ផ្តួច​ផ្តើម​ដោយ​លោក​នាយករដ្ឋមន្ត្រី ហ៊ុន ម៉ាណែត “កម្មវិធីពិសេសជំរុញការវិនិយោគ ក្នុងខេត្តព្រះសីហនុ ឆ្នាំ២០២៤” ត្រូវបាន​ប្រកាសដាក់ឱ្យអនុវត្តន៍ ជាផ្លូវការកាលថ្ងៃទី៣១ ខែមករា ឆ្នាំ ២០២៤ និងបាន​បន្ត​ដំណើរការ​​អនុវត្តន៍រហូត​មក​ដល់ពេលបច្ចុប្បន្ន​។

លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគ ក្នុងខេត្តព្រះសីហនុ កាល​ពី​ពេល​ថ្មីៗ​នេះ​បាន​ថ្លែងថា រាជរដ្ឋាភិបាលកម្ពុជា​អាច​​នឹង​ដាក់​ឱ្យអនុវត្តន៍​កម្មវិធីពិសេស​ ជំរុញការវិនិយោគនៅទាំងប្រទេស​ ដូច​ដែល​បាន​និង​កំពុង​អនុវត្តន៍ ​នៅ​ក្នុង​ខេត្ត​ព្រះសីហនុ​។ កម្ម​វិធី​នេះ​អាចនឹងអនុវត្តចាប់​ពី​​​ឆ្នាំនេះ​តទៅ​។

លោក​បាន​ថ្លែងថា “ការវិនិយោគឯកជន​នៅកម្ពុជា ដូចដែល​ឯកឧត្តម លោក លោកស្រី ជ្រាបហើយ គឺមានការកើនឡើង​ច្រើន នៅក្នុង​ឆ្នាំ​ ២០២៤ ​កន្លងមកនេះ”។លោកបន្តថា “អ្វីដែលខ្ញុំចាំ គឺ​គ្រាន់តែក្នុង​ខេត្តព្រះសីហនុ​មួយ យើង​មានរហូតដល់​គម្រោងជាង២០០គ្រោង ហើយទុនវិនិយោគមានជាង៦ពាន់លាន​ដុល្លារ​នៅឆ្នាំ​ ២០២៤ ​កន្លងមក”។

បច្ចុប្បន្ននេះ រាជ​រដ្ឋាភិបាល​ក៏កំពុង បន្ត​នូវការយកចិត្តទុកដាក់​ជំរុញការវិនិយោគ​ខេត្តព្រះសីហនុបន្តទៀត​។ យើង​សង្ឃឹមថា​នឹងមាន​ការវិនិយោគកើនឡើង​​​​។

លោក​បាន​បន្ថែម​ថា ​ជារួម​ក្នុង​ឆ្នាំ ​២០២៥-២០២៦ ខាងមុខនេះ រាជ​រដ្ឋាភិបាល​ក៏នឹងដាក់ចេញ នូវ​កម្មវិធីពិសេស​សម្រាប់ជំរុញការវិនិ​យោគ​ទូទាំងប្រទេស​តែម្តង មានន័យថា នឹង​ផ្តល់នូវការលើកទឹកចិត្ត​បន្ថែម​ទៀត​ទៅ​អ្វី ដែល​មាននៅក្នុងច្បាប់វិនិយោគ​ សម្រាប់កិច្ចការវិនិ​យោគនេះ​។

លោកបញ្ជាក់ថា “​យើង​សង្ឃឹមថានៅក្នុង​ឆ្នាំ ​២០២៥-២០២៦ នឹងមានការវិនិយោគកើនឡើងច្រើន”​។

កម្មវិធីពិសេសជំរុញការវិនិយោគ ក្នុងខេត្តព្រះសីហនុឆ្នាំ ២០២៤ បាន​ផ្តល់នូវអត្ថប្រយោជន៍ពិសេសៗ​ចំនួន​៣ ទៅអ្នកវិនិយោគ ដើម្បីគាំទ្រ និងជំរុញលើកទឹកចិត្តបន្ថែម ​ក្នុង​ការ​ទាក់ទាញការវិនិយោគ និងការអភិវឌ្ឍឧស្សាហកម្មនៅក្នុងខេត្តព្រះសីហនុ ​រួមមាន ទី១.គម្រោងវិនិយោគពាក់ព័ន្ធនឹងអគារជាប់គាំង ទី២ គម្រោងវិនិយោគដែលមិនជាប់ពាក់ព័ន្ធនឹងអគារជាប់គាំង និង​ទី៣ ការពង្រីកគម្រោងវិនិយោគ និងធុរកិច្ច។

ប្រធាន​សាខា​ក្រុមហ៊ុន​អចលនទ្រព្យ Century 21 Zillion Holding ប្រចាំខេត្ត​ព្រះសីហនុ លោក អ៊ឹម សេងហួ បានគាំទ្រចំពោះគំនិត​ផ្តួចផ្តើមរបស់​រាជ​រដ្ឋាភិបាល ​ក្នុងការពង្រីកវិសាលភាព​កម្មវិធីពិសេសជំរុញការវិនិយោគ​នៅទូទាំងប្រទេស​​ ព្រោះកម្មវិធីពិសេសជំរុញការវិនិយោគ ដែលកំពុងអនុវត្តន៍ ក្នុង​ខេត្តព្រះសីហនុ​ បាន​និង​កំពុង​ធ្វើ​ឱ្យ​​សកម្មភាព​វិនិយោគ ​ពាក់ព័ន្ធនឹងអគារជាប់គាំង ចាប់​ផ្តើម​មាន​សកម្ម​ភាព​រស់រវើកឡើងវិញជា​បណ្តើរៗ​។

លោក សេងហួ ​និយាយ​​ថា “ពាក់ព័ន្ធនឹងអគារ​ជាប់គាំងជាង១ពាន់អគារ​ កាលពីប៉ុន្មានឆ្នាំមុននោះ ឥឡូវចាប់តាំងអនុវត្តន៍​​កម្មវិធីពិ​សេសជំរុញការវិនិយោគប្រមាណ១ឆ្នាំកន្លងមកនេះ ទទួលបាន​លទ្ធផលល្អប្រសើរ”។ លោកបន្តថា “ប្រសិន​បើ​កម្មវិធីពិសេសជំរុញការវិនិយោគនេះ ត្រូវ​បាន​ពង្រីកទៅតាមបណ្តាខេត្តផ្សេងៗទៀត ខ្ញុំគិតថា វាល្អ​ព្រោះជាគោលនយោបាយមួយ ក្នុងការលើកទឹកចិត្ត​ដល់ម្ចាស់គម្រោង​ និងអ្នកវិនិយោគ​”។

គិតត្រឹមខែកុម្ភៈ ឆ្នាំ ២០២៥ ក្រុមការងារជំរុញការវិនិយោគក្នុងខេត្តព្រះសីហនុ បានសម្រេចជាគោលការណ៍ ផ្តល់ការលើកទឹកចិត្តដល់គម្រោងចំនួន២៦៩គម្រោង ដែលមានទុនវិនិយោគប៉ាន់ស្មានសរុប៦,៦៦៩លានដុល្លារអាមេរិក។

ក្រុមការងារនឹងបំពេញភារកិច្ចស្នូលសំខាន់២ រួមមាន ទី១. បន្តតាមដាន ត្រួតពិនិត្យ និងជំរុញការអនុវត្តគម្រោងទាំង២៦៩ គម្រោង និង ទី២ ធ្វើការសម្របសម្រួលការផ្តល់ការលើកទឹកចិត្តជាក់ស្តែង និង​ដោះស្រាយបញ្ហាប្រឈម និង​សំណូមពររបស់ម្ចាស់គម្រោង ។ នេះបើតាម ឯកឧត្តមបណ្ឌិតសភាចារ្យ ហ៊ាន សាហ៊ីប។

លោក​បាន​ឱ្យដឹង​ទៀត​ថា រយៈ​ពេល​កន្លង​មក ក្រុមការងារបាន​ធ្វើ​កិច្ច​ការ​ជា​ច្រើន​ដូច​ជា ជួយ​សម្របសម្រួលផ្តល់លិខិតអនុញ្ញាតសាងសង់, ការចុះបញ្ជីសហគ្រាស ការផ្តល់អាជ្ញាបណ្ណទេសចរណ៍ ការផ្តល់អាជ្ញាបណ្ណអាជីវកម្មអភិវឌ្ឍន៍​អចលនវត្ថុ ការសាងសង់ផ្លូវចូលទៅទីតាំងគម្រោង ការតបណ្តាញលូកាត់ផ្លូវ ពីទីតាំងគម្រោងឆ្ពោះទៅអាងប្រព្រឹត្តកម្មទឹកកខ្វក់ ការរៀបចំប្រព័ន្ធអាងប្រព្រឹត្តកម្មទឹកកខ្វក់ ដើម្បីជំរុញការវិនិយោគ និងការសម្របសម្រួល ដោះស្រាយវិវាទក្រៅប្រព័ន្ធតុលាការចំពោះគម្រោងពាក់ព័ន្ធអគារជាប់គាំង៕

ដោយៈ និស្ស័យ

    ភ្នំពេញៈ មន្រ្តីជាន់ខ្ពស់បានឲ្យដឹងថា គិតរហូតមកទល់ពេលនេះ ការសិក្សាពីបញ្ហាបច្ចេកទេស លើការសាងសង់ស្ពានមិត្តភាពកម្ពុជា កូរ៉េបានបញ្ចប់ស្ទើរទាំងស្រុងហើយ។

    អ្នកនាំពាក្យក្រសួងសាធារណៈការ និងដឹកជញ្ជូន លោកផន រឹមបានមានប្រសាសន៍ឲ្យដឹង តាមបណ្តាញតេឡេក្រាមកាលពីចុងសប្តាហ៍មុនថា ទីតាំងស្ពាននេះមិនមានការប្រែប្រួលនោះទេ ដោយចេញពីទីតាំងផ្សាររាត្រីដដែល ហើយការបើកការដ្ឋានសាងសង់ស្ពាននេះ នឹងចាប់ផ្តើមនៅពេលឆាប់ៗខាងមុខនេះ។

    លោកបន្តថា “ដំណាក់កាលនេះ ជាដំណាក់កាលចុងក្រោយហើ​យ បន្ទាប់មកសម្តេចធិបតីនឹងប្រកាសអំពីថ្ងៃ បើកការដ្ឋានសាងសង់នៅពេលណា”។ លោកបន្តថា “ការងារបច្ចេកទេសចប់ស្ទើរតែអស់ហើយ ដូចថ្ងៃមុន យើងចុះទៅមើលលំហូរចរាចរណ៍ ព្រោះពេលពេលចាប់ផ្តើមបើកការដ្ឋាន គឺឲ្យមានលំហូរចរាចរណ៍ល្អ បញ្ចៀសការកកស្ទះ ដោយធ្វើយ៉ាងណាឲ្យការចេញ ចូលរាជធានីមានសភាពប្រសើរ”។

    លោកផន រឹមបានបន្តថា ជាមួយគ្នានេះ ក្រុមមន្រ្តីបច្ចេកទេសពាក់ព័ន្ឋ ក៏បានសិក្សាលើបណ្តាញខ្សែអគ្គិសនី បណ្តាញខ្សែទូរស័ព្ទ បណ្តាញទឹកស្អាតជាដើម ដើម្បីធ្វើឲ្យប្រាកដថា នៅពេលបើកការដ្ឋាន​សាងសង់ មិនមានផលប៉ះពាល់ឬបញ្ចៀសផលប៉ះពាល់ទុកជាមុន។

    លោកបន្តថា គំរូស្ពានចុងក្រោយបានបញ្ចប់ហើយ ប៉ុន្តែការងារបច្ចេកទេសលំអិតមួយចំនួនកំពុងរៀបចំបន្ថែមទៀត ដូចជាផ្លូវឡើង ផ្លូវចុះ និងខ្នែងរបស់ស្ពានជាដើម៕