ដោយ: គង់ លាងហួរ
អន្តរជាតិ: តម្លៃដីធ្លីនៅក្នុងតំបន់សេដ្ឋកិច្ចពិសេសរវាងប្រទេសម៉ាឡេសុី និងប្រទេសសិង្ហបុរី (JS-SEZ)បានហក់ឡើងថ្លៃ ដែលអាចនាំឱ្យតម្លៃលំនៅដ្ឋានមានការកើនឡើងផងដែរ។នេះបើយោងតាមធនាគារ Standard Chartered។

តំបន់សេដ្ឋកិច្ចពិសេសនៅក្នុងរដ្ឋ Johor នេះកំពុងទាក់ទាញការវិនិយោគពីបណ្តាក្រុមហ៊ុនម៉ាឡេស៊ី និងសិង្ហបុរី ដែលនាំឱ្យមានលំហូរជនបរទេស និងពលករឆ្លងដែន។ ការណ៍នេះនឹងបង្កើនតម្រូវការលំនៅដ្ឋាន ជាពិសេសនៅជិតតំបន់សេដ្ឋកិច្ចពិសេស។

ម្យ៉ាងទៀត ដោយសារតំបន់នេះមានទីតាំងនៅជិតប្រទេសសិង្ហបុរី នោះពលរដ្ឋសិង្ហបុរីនឹងមានការចាប់អារម្មណ៍ក្នុងការស្វែងរកទិញលំនៅដ្ឋាននៅប្រទេសម៉ាឡេសុី ដែលមានតម្លៃសមរម្យជាងបើធៀបនឹងតម្លៃលំនៅដ្ឋាននៅសិង្ហបុរី។

តម្លៃដីធ្លីស្ថិតនៅជិតគម្រោងតភ្ជាប់ផ្លូវរថភ្លើងពីស្ថានីយ Bukit Chagar ក្នុងទីក្រុង Johor Bahru ទៅកាន់ស្ថានីយ Woodlands North របស់សិង្ហបុរី ធ្លាប់មានតម្លៃត្រឹមតែ៦០០រីងហ្គីតទៅ៩០០រីងហ្គីត ក្នុងហ្វីតម៉ែត្រការ៉េ(ប្រហែល១.៤៣៦ដុល្លារទៅ២.១៥៤ដុល្លារក្នុងមួយម៉ែត្រការ៉េ)។

ប៉ុន្តែ នាពេលថ្មីៗនេះ តម្លៃដីធ្លីស្ថិតនៅជិតគម្រោងខាងលើបានហក់ឡើងដល់ចន្លោះពី១.២០០រីងហ្គីតទៅ២.០០០រីងហ្គីត ក្នុងមួយហ្វីតការ៉េ(ប្រហែល២.៨៧៣ដុល្លារទៅ៤.៧៨៨ដុល្លារក្នុងមួយម៉ែត្រការ៉េ)។

ជាមួយគ្នានេះ ក្រុមអ្នកវិភាគបានព្យាករណ៍ថា វិស័យអចលនទ្រព្យរបស់ប្រទេសម៉ាឡេស៊ីនឹងរក្សាភាពធន់នៅឆ្នាំនេះ បើទោះបីជាមានភាពមិនប្រាកដប្រជានៃសេដ្ឋកិច្ចសកលយ៉ាងណាក្តី។សុទិដ្ឋិនិយមនេះត្រូវបានជំរុញដោយផ្នែកឧស្សាហកម្ម និងលំនៅដ្ឋាន។

ការប្រកាសគោលនយោបាយពន្ធគយសងសឹកគ្នាទៅវិញទៅមករបស់សហរដ្ឋអាមេរិក និងផលប៉ះពាល់ដែលអាចកើតមានចំពោះសេដ្ឋកិច្ច និងពាណិជ្ជកម្មសកលបានជះផលប៉ះពាល់ដល់ទំនុកចិត្តទីផ្សារ។ ទោះជាយ៉ាងនេះក្តី វិស័យអចលនទ្រព្យរបស់ម៉ាឡេសុីពឹងផ្អែកខ្លាំងលើតម្រូវការរបស់អ្នកទិញក្នុងស្រុក។

ស្ថាប័នស្រាវជ្រាវ RHB Research បានគូសបញ្ជាក់ថា បណ្តាក្រុមហ៊ុនអភិវឌ្ឍន៍អចលនទ្រព្យធំៗជាច្រើនបានប្រកាសដាក់ចេញនូវគម្រោងលំនៅដ្ឋាន និងចុះកិច្ចព្រមព្រៀងទាក់ទងនឹងមជ្ឈមណ្ឌលទិន្នន័យនៅក្នុងត្រីមាសទី១ ឆ្នាំ២០២៥៕ប្រភព: The Star & Standard Chatered៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានបន្តស្ទុះងើបឡើងថ្លៃដល់ជាង៣.២០០ដុល្លារអាមេរិកក្នុងមួយអោនក្នុងការជួញដូរនាព្រឹកថ្ងៃសុក្រនេះ ដោយសារការដាំក្បាលចុះនៃប្រាក់ដុល្លារអាមេរិក និងភាពតានតឹងពាណិជ្ជកម្មចិន-អាមេរិកបានធ្វើឱ្យក្រុមអ្នកវិនិយោគសម្រុកទិញមាស ដើម្បីបង្ការហានិភ័យ។

តួយ៉ាង តម្លៃមាស Spot Gold បានកើនឡើង១,៣៨ភាគរយដល់៣២១៧,៦០ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានកើនឡើង១,៨៤ភាគរយដល់៣២៣៦,១០ដុល្លារក្នុងមួយអោនគិតត្រឹមម៉ោង១០:៥៤នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៦០,៩ភាគរយ ដែលធនាគារកណ្តាលអាមេរិក (Fed) នឹងអាចទម្លាក់អត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានដាំក្បាលចុះមកនៅត្រឹម៩៩,៨៧ពិន្ទុនាព្រឹកថ្ងៃសុក្រនេះ បន្ទាប់ពីបានបិទការជួញដូរត្រឹម១០០,៨៧ពិន្ទុកាលពីថ្ងៃព្រហស្បតិ៍ម្សិលមិញ។

ចំណែក តម្លៃលោហៈធាតុប្រាក់ Spot silver បានកើនឡើង១,៥ភាគរយដល់៣១,២២ដុល្លារក្នុងមួយអោន ខណៈតម្លៃផ្លាទីនបានងើបឡើង០,១៦ភាគរយដល់៩៣៤,៨ដុល្លារក្នុងមួយអោន ហើយតម្លៃ palladium បានងើបឡើង០,២៩ភាគរយដល់៩០២,៥ដុល្លារក្នុងមួយអោនគិតត្រឹមម៉ោង១០:៥៦នាទីព្រឹក៕

ដោយៈ គង់ សូរិយា

    បាត់ដំបងៈ ឧបនាយករដ្ឋមន្រ្តីសាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានស្នើឱ្យក្រសួងស្ថាប័នពាក់ព័ន្ធ ក្រុមការងាររាជរដ្ឋាភិបាល ចុះមូលដ្ឋានខេត្តបាត់ដំបង និងរដ្ឋបាលខេត្តបាត់ដំបង ប្រជុំពិនិត្យសម្រេចលើបញ្ហាដីធ្លី ដែលនៅសេសសល់។

ដីធ្លីដែលនៅសេសសល់​មិនទាន់ចុះបញ្ជីរក្នុងខេត្តេរួមមាន

ទី១. វិវាទដីធ្លីក្នុងទីតាំងដីសម្បទានសង្គមកិច្ច ចំនួន១៣៧៨គ្រួសារ លើផ្ទៃដីទំហំ៩១១ហិកតា មានទីតាំងស្ថិតនៅឃុំបឹងប្រាំ ស្រុកបវេល ខេត្តបាត់ដំបង រួមមាន៖ ក. អតីតកងកម្លាំងប្រដាប់អាវុធនិងគ្រួសារ ទំហំ ១៥៩ហិកតា។ ខ. ប្រជាពលរដ្ឋខ្វះខាត ទំហំ៧៥២ហិកតា។

ទី២. វិវាទដីធ្លីរវាងប្រជាពលរដ្ឋ២៨៨គ្រួសារ ជាមួយឈ្មោះ សង ថន (ស្លាប់), ឈ្មោះ ទន់ ប៊ុនធឿន, ឈ្មោះ ប៉ែន កិ, ឈ្មោះ យាយ វឿន និងឈ្មោះ លឹម និវឌ្ឍន៍ (ស្លាប់) លើដីទំហំ ៦១២ ហិកតា ស្ថិតក្នុងភូមិសាស្ត្រឃុំបឹងប្រាំ ស្រុកបវេល ខេត្តបាត់ដំបង។

ទី៣. វិវាទដីធ្លីអតីតដីគម្រោងសួនច្បារ “ព្រែកព្រះស្តេច” ស្ថិតនៅភូមិចំការឫស្សី ភូមិ១៣មករា និងភូមិអូរខ្ជាយ សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង។

ទី៤. វិវាទរវាងឈ្មោះ ចាន់ ហឿ ជាមួយឈ្មោះ លឹម ទាឡេង, ហែន ហឿន និងប្រជាពលរដ្ឋដណ្តើមសិទ្ធិលើដីទំហំ១៥៩ ហិកតា កើតឡើងក្នុងឆ្នាំ២០០៧ ស្ថិតនៅឃុំព្រះផុស ស្រុកគាស់ក្រឡ ខេត្តបាត់ដំបង។

ទី៥. វិវាទដីធ្លីទំហំ២៧៨ហិកតា រវាងក្រុមគ្រួសារកងទ័ព តំណា​ងដោយឈ្មោះ សាន វាសនា, សំ មករា, និងឈ្មោះ មាឃ សារូ ជាមួយប្រជាពលរដ្ឋ ស្ថិតនៅឃុំដូនបា ស្រុកគាស់ក្រឡ។

ថ្នាក់ដឹកនៃរដ្ឋាភិបាលបានបង្ហាញសុទិដ្ឋិនិយមថា “យើងរំពឹងថា ខេត្តបាត់ដំបងនឹងបញ្ចប់ការចុះបញ្ជីដីធ្លី និងវិវាទជាស្ថាពរនាពេលឆាប់ៗខាងមុខនេះ”៕

ដោយៈ និស្ស័យ

    ភ្នំពេញៈ មន្រ្តីជាន់ខ្ពស់នៃក្រុមប្រឹក្សាអភិវឌ្ឍន៍កម្ពុជាបានថ្លែងថា គិតចាប់ពីឆ្នាំ១៩៩០ ដល់ឆ្នាំ២០២៥ ចិនបានវិនិយោគនៅកម្ពុជាក្នុងទំហំទឹកប្រាក់ រហូតដល់ប្រមាណ៣៦ពាន់លានដុល្លារអាមេរិក។

    លោកហឿន សំនៀងអគ្គលេខាធិការរងនៃក្រុមប្រឹក្សាអភិវឌ្ឍន៍័កម្ពុជាបានថ្កែងបែបនេះ ក្នុងវេទិកាស្តីពី “មិត្តភាពដែកថែបកម្ពុជា-ចិន ក្នុងយុគសម័យថ្មី៖ កិច្ចសហប្រតិបត្តិការឈ្នះ-ឈ្នះនិងវិបុលភាពរួម”កាលពីថ្ងៃទី១០ មេសាកន្លងមកនេះ។

វេទិកាខាងលើនេះ រៀបចំឡើងក្នុងគោលបំណងរួមចំណែកលើកកម្ពស់ការយល់ដឹង អំពីការវិវត្តនិងវឌ្ឍនភាពនៃទំនាក់ទំនង និងកិច្ចសហប្រតិបត្តិការកម្ពុជា-ចិន សមិទ្ធផល បញ្ហាប្រឈម និងកាលានុវត្តភាពនៃកិច្ចសហប្រតិបត្តិការ និងការតភ្ជាប់ខាងផ្នែកនយោបាយ សេដ្ឋកិច្ច និងសង្គម-វប្បធម៌ និងទស្សនវិស័យទៅអនាគត នៃទំនាក់ទំនងរវាងប្រទេសទាំងពីរ។

លោកហឿន សំនៀង បានបញ្ជាក់ថា ក្រោមកិច្ចសហការទ្វេភាគីរវាងកម្ពុជា-ចិន បានជំរុញដល់ការរីកចំរើនយ៉ាងខ្លាំង លើការវិនិយោគឯកជន ដែលនាំមកនូវផ្លែផ្កាជាផលប្រយោជន៍ យ៉ាងច្រើនសន្លឹកសន្ធាប់។ ក្នុងនោះ ទុនវិនិយោគរបស់ចិននៅកម្ពុជា បើគិតចាប់ពីទសវត្សឆ្នាំ១៩៩០ មកទល់ដើមឆ្នាំ២០២៥នេះ មានទំហំប្រមាណ៣៦ពាន់លានដុល្លារអាមេរិក។

លោកបានបន្តឲ្យដឹងទៀតថា ក្នុងរយ:ពេល៥ឆ្នាំចុងក្រោយ (២០២១-២០២៥) ប្រភពទុនវិនិយោគចិន បានឈរនៅលំដាប់លេខ១ ឬ២ សម្រាប់ការវិនិយោគឯកជននៅកម្ពុជា។ ជាក់ស្តែងនៅក្នុងឆ្នាំ២០២៤ កន្លងទៅនេះ ការវិនិយោគមកពីប្រទេសចិន ស្ថិតនៅលំដាប់លេខរៀងទី១ ដោយបានរួមចំណែ​កជាង៣.៤២៣លានដុល្លារអាមេរិក ស្មើនឹង៤៩.៨២% នៃទុនវិនិយោគសរុបនៅកម្ពុជា។

ចំពោះកិច្ចសហប្រតិបត្តិការទ្វេរភាគី លើកិច្ចការអភិវឌ្ឍចិនក៏បានផ្តល់នូវផ្លែផ្កាដ៏មហាសាលដល់កម្ពុជា ដែលចាប់ពីទសវត្សរ៍ឆ្នាំ១៩៩០ ដល់ដើមឆ្នាំ២០២៥នេះ ចិនបានផ្តល់ជំនួយអភិវឌ្ឍន៍ផ្លូវការមកកម្ពុជាសរុបប្រមាណ៦ពាន់ លានដុល្លារអាមេរិកផងដែរ សម្រាប់ការអភិវឌ្ឍលើវិស័យសំខាន់ៗ ដូចជា ហេដ្ឋារចនាសម្ព័ន្ធ ថាមពលនិងអគ្គិសនី អប់រំ សុខាភិបាល កសិកម្ម និងប្រព័ន្ធធារាសាស្ត្រ ជាដើម។ នេះបើយោងតាមប្រព័ន្ធទិន្នន័យ ( ODA Database) របស់គណៈកម្មាធិការសហប្រតិបត្តិការអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា៕

ដោយៈ គង់ សូរិយា

    កណ្តាលៈ ផ្លូវជាតិលេខ២១ ជាសរសៃឈាមសេដ្ឋកិច្ចដ៏សំខាន់រវាងកម្ពុជា-វៀតណាម ពិសេសលើការដឹកជញ្ជូនទំនិញផ្សេងៗឆ្លងកាត់ព្រំដែនទៅវិញ ទៅមករវាងប្រទេសកម្ពុជា វៀតណាម។

យោងតាមការបង្ហោះរបស់ផេកក្រសួងសាធារណៈការ និងដឹកជញ្ជូនបានឲ្យដឹងថា ផ្លូវជាតិលេខ២១ ជាខ្សែផ្លូវយុទ្ធសាស្រ្តតភ្ជាប់រាជធានីភ្នំពេញ ជាមួយបណ្តាញផ្លូវគមនាគមន៍មួយចំនួនដូចជា ផ្លូវជាតិលេខ២ (ត្រង់រង្វង់មូលក្រុងតាខ្មៅ) ផ្លូវក្រវាត់ក្រុងទី២ ផ្លូវក្រវាត់ក្រុងទី៣ ផ្លូវជាតិលេខ២១A និងផ្លូវជាតិលេខ ២១B ដោយឆ្លងកាត់ក្រុង-ស្រុកចំនួន៣ រួមមានក្រុងតាខ្មៅ ស្រុកស្អាង និងស្រុកកោះធំ ឆ្ពោះទៅច្រកព្រំដែនកម្ពុជា-វៀតណាម (ជ្រៃធំ-ឡុងប៊ិញ)។

ផ្លូវជាតិលេខ២១ ក្រាលបេតុងផ្លូវកៅស៊ូប្រភេទAC មានប្រវែង ៦៣,៦គីឡូម៉ែត្រ ពីរង្វង់មូលក្រុងតាខ្មៅ ឆ្ពោះទៅស្ពានជ្រៃធំ (ព្រំប្រទល់កម្ពុជា-វៀតណាម) ត្រូវបានសម្ពោធបើកឱ្យប្រើប្រាស់ជាផ្លូវការ នាថ្ងៃទី២៣មីនា ឆ្នាំ២០២២។

ខ្សែផ្លូវនេះបាន និងកំពុងដើរតួនាទីយ៉ាងសំខាន់ ក្នុងការជួយសម្រួលការដឹកជញ្ជូនគ្រប់ប្រភេទ ជាពិសេសទំនិញ និងកសិផលសម្រាប់ការដោះដូរពាណិជ្ជកម្ម រវាងកម្ពុជា-វៀត ណាម ព្រមទាំងបានជំរុញ និងប្រែក្លាយតំបន់នៅតាមព្រំដែន ឱ្យក្លាយជាតំបន់អភិវឌ្ឍន៍ និងរីកចម្រើន៕

ដោយៈ គង់ សូរិយា

    ភ្នំពេញៈ រដ្ឋាភិបាលតាមរយៈក្រុមការងារជំរុញការវិនិយោគ ក្នុងខេត្តព្រះសីហនុ សម្រេចជាគោលការណ៍ ផ្តល់ការលើកទឹកចិត្តពិសេ​ស គម្រោងវិនិយោគចំនួន១៨គម្រោង មានទុនវិនិយោគសរុប២០៥លានដុល្លារអាមេរិកបន្ថែមទៀត។

គំរោងដែលបានផ្តល់ការលើកទឹកចិត្តពិសេស រួមមានគម្រោងពាក់ព័ន្ធនឹងអគារជាប់គាំងចំនួន៥គម្រោង និងគម្រោងថ្មីចំនួន១៣គម្រោង និងអាចបង្កើតការងារប្រមាណ២ ៩១៦កន្លែង ជាអាទិ៍ រោងចក្រស្ល និងកែច្នៃលោហៈធាតុ រោងចក្រកែច្នៃកាកសំណល់ រោងចក្រផលិតផលិតផលធ្វើពីក្រដាស អគារការិយាល័យ អគារស្នាក់នៅរួម សណ្ឋាគារ និងស្ថានីយទូរទស្សន៍។

គិតត្រឹមខែមេសា ឆ្នាំ២០២៥ ក្រុមការងារជំរុញការវិនិយោគក្នុងខេត្តព្រះសីហនុ បានសម្រេចជាគោលការណ៍ ផ្តល់ការលើកទឹកចិត្ត គម្រោងវិនិយោគបានចំចំនួន២៨៧គម្រោង មានទុនវិនិយោគសរុប ចំនួន៦,៨៧៥លានដុល្លារអាមេរិក៕

ដោយ: គង់ លាងហួរ
ភ្នំពេញ: ក្រុមហ៊ុនអាកាសចរណ៍ខ្នាតយក្ស British Airways របស់ប្រទេសអង់គ្លេស គ្រោងនឹងពង្រឹងការតភ្ជាប់ផ្លូវអាកាសរបស់ខ្លួន ជាមួយនឹងការចាប់ផ្តើមបើកដំណើរការឡើងវិញនូវផ្លូវហោះហើរមកកាន់បណ្តាប្រទេសក្នុងតំបន់អាស៊ីប៉ាសុីហ្វិក។

ចំណាត់ការនេះនឹងផ្តល់ផលប្រយោជន៍ដល់ប្រទេសកម្ពុជា ប្រទេសអូស្ត្រាលី ប្រទេសនូវែលសេឡង់ ប្រទេសឥណ្ឌូនេស៊ី ប្រទេសសិង្ហបុរី ប្រទេសថៃ និងប្រទេសវៀតណាម។

ខណៈពេលតម្រូវការនៃការធ្វើដំណើរនៅលើពិភពលោកងើបឡើងវិញក្រោយវិបត្តិជំងឺរាតត្បាត ការវិលត្រឡប់មកវិញរបស់ក្រុមហ៊ុនអាកាសចរណ៍ British Airways ត្រូវបានគេរំពឹងថា នឹងជំរុញវិស័យទេសចរណ៍ក្នុងតំបន់ និងគាំទ្រការធ្វើដំណើរក្នុងគោលបំណងអាជីវកម្ម។

ក្រុមហ៊ុនអាកាសចរណ៍ British Airways គ្រោងបើកដំណើរការជើងហោះហើររបស់ខ្លួនរវាងប្រទេសអង់គ្លេស និងគោលដៅសំខាន់ៗនៅក្នុងប្រទេសអូស្ត្រាលី នូវែលសេឡង់ និងបណ្តាប្រទេសអាស៊ាន។នេះបើយោងតាមការចុះផ្សាយដោយសារព័ត៌មាន Travel & Tour World។

បណ្តាប្រទេសសមាជិកអាស៊ាននានាដូចជាកម្ពុជា ឥណ្ឌូនេស៊ី សិង្ហបុរី ថៃ និងវៀតណាម ត្រូវបានគេរំពឹងថា នឹងទទួលបានអត្ថប្រយោជន៍ពីការពង្រីកមធ្យោបាយនៃការធ្វើដំណើរតាមផ្លូវអាកាស និងបង្កើនការដោះដូរពាណិជ្ជកម្ម។

ផែនការជាយុទ្ធសាស្រ្តនេះសរបង្ហាញឱ្យឃើញពីការប្តេជ្ញាចិត្តជាថ្មីរបស់ក្រុមហ៊ុនអាកាសចរណ៍ British Airways ដែលមានមូលដ្ឋាននៅទីក្រុងឡុងដិ៍ក្នុងការពង្រឹងការធ្វើដំណើរ និងពាណិជ្ជកម្មរវាងប្រទេសអង់គ្លេស និងគោលដៅសំខាន់ៗនៅតំបន់អាស៊ាន៕ប្រភព: Travel & Tour World៕

ដោយ: គង់ លាងហួរ
អន្តរជាតិ: បណ្តាវិនិយោគិននៅតំបន់អាស៊ីបាននិងកំពុងងាកមកបណ្តាក់ទុនរយៈពេលវែងលើអចលនទ្រព្យផ្នែកដឹកជញ្ជូន និងមជ្ឈមណ្ឌលទិន្នន័យ ដោយសារផ្នែកអចលនទ្រព្យនានា ដូចជាការលក់រាយ និងការិយាល័យបន្តជួបប្រទះបញ្ហាប្រឈម។

ការផ្លាស់ប្តូរយុទ្ធសាស្ត្រវិនិយោគនេះបានកើតមានអស់រយៈពេលជាង១ទស្សវត្សមកហើយ។ ប៉ុន្តែ និន្នាការនេះទើបលេចចេញជារូបរាងកាន់តែច្បាស់នាពេលបច្ចុប្បន្ន។ នេះបើយោងតាមរបាយការណ៍សិក្សារួមគ្នាដោយក្រុមហ៊ុនប្រឹក្សាផ្នែកធុរកិច្ច PwC និងវិទ្យាស្ថាន Urban Land (ULI)។

លោក Mark Cooper អ្នកជំនាញនៅឯវិទ្យាស្ថាន ULI ប្រចាំតំបន់អាស៊ីប៉ាស៊ីហ្វិក បានមានប្រសាសន៍ឱ្យដឹងថា“បច្ចុប្បន្ននេះ អចលនទ្រព្យផ្នែកភស្តុភារជាផ្នែកមួយដ៏សំខាន់បំផុតនៃផលបត្រអចលនទ្រព្យរបស់អ្នកវិនិយោគអចលនទ្រព្យ”។

ការកើនឡើងនៃតម្រូវការអចលនទ្រព្យផ្នែកភស្តុភារបណ្តាលមកពីការផ្លាស់ប្តូរឥរិយាបថ ឬទម្លាប់របស់អ្នកប្រើប្រាស់ ជាពិសេសការរីកចម្រើនរបស់ទីផ្សារពាណិជ្ជកម្មអេឡិចត្រូនិក ដែលបានជំរុញឱ្យមានតម្រូវការជួល ឬទិញឃ្លាំងនៅទូទាំងតំបន់។

លោក Cooper បានកត់សម្គាល់ឃើញថា “មជ្ឈមណ្ឌលទិន្នន័យមានភាពខុសប្លែកគ្នាបន្តិចពីអចលនទ្រព្យក្នុងផ្នែកផ្សេងទៀត។ យើងបានសង្កេតឃើញមានមានការខ្វែងគំនិតគ្នាមួយចំនួនអំពីសំណួរថា តើមជ្ឈមណ្ឌលទិន្នន័យជាអចលនទ្រព្យ ឬជាហេដ្ឋារចនាសម្ព័ន្ធ?”។

ប៉ុន្តែ លោក Mark Cooper បានអះអាងថា មជ្ឈមណ្ឌលទិន្នន័យនេះត្រូវបានគេចាត់ទុកថា ជាមូលដ្ឋានក្នុងការទ្រទ្រង់ផ្នែកហេដ្ឋារចនាសម្ព័ន្ធសម្រាប់ការធ្វើអាជីវកម្មតាមរយៈប្រព័ន្ធឌីជីថលក្នុងយុគសម័យទំនើប។

លោក Stuart Porter អ្នកជំនាញអចលនទ្រព្យនៅក្រុមហ៊ុន PwC បានលើកឡើងថា “ប្រសិនបើមានមជ្ឈមណ្ឌលទិន្នន័យចំនួន២០០ទីតាំង ឬច្រើនជាងនេះនៅក្នុងប្រទេសជប៉ុន។ ដូច្នេះ បណ្តាអ្នកវិនិយោគនឹងអាចចាប់យកឱកាសរយៈពេលវែង ហើយបណ្តាប្រទេសផ្សេងទៀតនៅតំបន់អាសុីក៏នឹងទាក់ទាញបានការវិនិយោគលើមជ្ឈមណ្ឌលទិន្នន័យផងដែរ”។

ថ្វីបើមានការប្រែប្រួលរយៈពេលខ្លី និងបញ្ហាម៉ាក្រូសេដ្ឋកិច្ចយ៉ាងណាក្តី ក៏បណ្តាវិនិយោគិននៅក្នុងតំបន់អាសុីបានផ្តោតលើការវិនិយោគរយៈពេលវែងជាជាងការវិនិយោគដើម្បីទទួលបានផលចំណេញរយៈពេលខ្លី៕ប្រភព: Real Estate Asia៕