ដោយៈ គង់ សូរិយា

    ភ្នំពេញៈ រដ្ឋាភិបាលតាមរយៈក្រុមការងារជំរុញការវិនិយោគ ក្នុងខេត្តព្រះសីហនុ សម្រេចជាគោលការណ៍ ផ្តល់ការលើកទឹកចិត្តពិសេ​ស គម្រោងវិនិយោគចំនួន១៨គម្រោង មានទុនវិនិយោគសរុប២០៥លានដុល្លារអាមេរិកបន្ថែមទៀត។

គំរោងដែលបានផ្តល់ការលើកទឹកចិត្តពិសេស រួមមានគម្រោងពាក់ព័ន្ធនឹងអគារជាប់គាំងចំនួន៥គម្រោង និងគម្រោងថ្មីចំនួន១៣គម្រោង និងអាចបង្កើតការងារប្រមាណ២ ៩១៦កន្លែង ជាអាទិ៍ រោងចក្រស្ល និងកែច្នៃលោហៈធាតុ រោងចក្រកែច្នៃកាកសំណល់ រោងចក្រផលិតផលិតផលធ្វើពីក្រដាស អគារការិយាល័យ អគារស្នាក់នៅរួម សណ្ឋាគារ និងស្ថានីយទូរទស្សន៍។

គិតត្រឹមខែមេសា ឆ្នាំ២០២៥ ក្រុមការងារជំរុញការវិនិយោគក្នុងខេត្តព្រះសីហនុ បានសម្រេចជាគោលការណ៍ ផ្តល់ការលើកទឹកចិត្ត គម្រោងវិនិយោគបានចំចំនួន២៨៧គម្រោង មានទុនវិនិយោគសរុប ចំនួន៦,៨៧៥លានដុល្លារអាមេរិក៕

ដោយ: គង់ លាងហួរ
ភ្នំពេញ: ក្រុមហ៊ុនអាកាសចរណ៍ខ្នាតយក្ស British Airways របស់ប្រទេសអង់គ្លេស គ្រោងនឹងពង្រឹងការតភ្ជាប់ផ្លូវអាកាសរបស់ខ្លួន ជាមួយនឹងការចាប់ផ្តើមបើកដំណើរការឡើងវិញនូវផ្លូវហោះហើរមកកាន់បណ្តាប្រទេសក្នុងតំបន់អាស៊ីប៉ាសុីហ្វិក។

ចំណាត់ការនេះនឹងផ្តល់ផលប្រយោជន៍ដល់ប្រទេសកម្ពុជា ប្រទេសអូស្ត្រាលី ប្រទេសនូវែលសេឡង់ ប្រទេសឥណ្ឌូនេស៊ី ប្រទេសសិង្ហបុរី ប្រទេសថៃ និងប្រទេសវៀតណាម។

ខណៈពេលតម្រូវការនៃការធ្វើដំណើរនៅលើពិភពលោកងើបឡើងវិញក្រោយវិបត្តិជំងឺរាតត្បាត ការវិលត្រឡប់មកវិញរបស់ក្រុមហ៊ុនអាកាសចរណ៍ British Airways ត្រូវបានគេរំពឹងថា នឹងជំរុញវិស័យទេសចរណ៍ក្នុងតំបន់ និងគាំទ្រការធ្វើដំណើរក្នុងគោលបំណងអាជីវកម្ម។

ក្រុមហ៊ុនអាកាសចរណ៍ British Airways គ្រោងបើកដំណើរការជើងហោះហើររបស់ខ្លួនរវាងប្រទេសអង់គ្លេស និងគោលដៅសំខាន់ៗនៅក្នុងប្រទេសអូស្ត្រាលី នូវែលសេឡង់ និងបណ្តាប្រទេសអាស៊ាន។នេះបើយោងតាមការចុះផ្សាយដោយសារព័ត៌មាន Travel & Tour World។

បណ្តាប្រទេសសមាជិកអាស៊ាននានាដូចជាកម្ពុជា ឥណ្ឌូនេស៊ី សិង្ហបុរី ថៃ និងវៀតណាម ត្រូវបានគេរំពឹងថា នឹងទទួលបានអត្ថប្រយោជន៍ពីការពង្រីកមធ្យោបាយនៃការធ្វើដំណើរតាមផ្លូវអាកាស និងបង្កើនការដោះដូរពាណិជ្ជកម្ម។

ផែនការជាយុទ្ធសាស្រ្តនេះសរបង្ហាញឱ្យឃើញពីការប្តេជ្ញាចិត្តជាថ្មីរបស់ក្រុមហ៊ុនអាកាសចរណ៍ British Airways ដែលមានមូលដ្ឋាននៅទីក្រុងឡុងដិ៍ក្នុងការពង្រឹងការធ្វើដំណើរ និងពាណិជ្ជកម្មរវាងប្រទេសអង់គ្លេស និងគោលដៅសំខាន់ៗនៅតំបន់អាស៊ាន៕ប្រភព: Travel & Tour World៕

ដោយ: គង់ លាងហួរ
អន្តរជាតិ: បណ្តាវិនិយោគិននៅតំបន់អាស៊ីបាននិងកំពុងងាកមកបណ្តាក់ទុនរយៈពេលវែងលើអចលនទ្រព្យផ្នែកដឹកជញ្ជូន និងមជ្ឈមណ្ឌលទិន្នន័យ ដោយសារផ្នែកអចលនទ្រព្យនានា ដូចជាការលក់រាយ និងការិយាល័យបន្តជួបប្រទះបញ្ហាប្រឈម។

ការផ្លាស់ប្តូរយុទ្ធសាស្ត្រវិនិយោគនេះបានកើតមានអស់រយៈពេលជាង១ទស្សវត្សមកហើយ។ ប៉ុន្តែ និន្នាការនេះទើបលេចចេញជារូបរាងកាន់តែច្បាស់នាពេលបច្ចុប្បន្ន។ នេះបើយោងតាមរបាយការណ៍សិក្សារួមគ្នាដោយក្រុមហ៊ុនប្រឹក្សាផ្នែកធុរកិច្ច PwC និងវិទ្យាស្ថាន Urban Land (ULI)។

លោក Mark Cooper អ្នកជំនាញនៅឯវិទ្យាស្ថាន ULI ប្រចាំតំបន់អាស៊ីប៉ាស៊ីហ្វិក បានមានប្រសាសន៍ឱ្យដឹងថា“បច្ចុប្បន្ននេះ អចលនទ្រព្យផ្នែកភស្តុភារជាផ្នែកមួយដ៏សំខាន់បំផុតនៃផលបត្រអចលនទ្រព្យរបស់អ្នកវិនិយោគអចលនទ្រព្យ”។

ការកើនឡើងនៃតម្រូវការអចលនទ្រព្យផ្នែកភស្តុភារបណ្តាលមកពីការផ្លាស់ប្តូរឥរិយាបថ ឬទម្លាប់របស់អ្នកប្រើប្រាស់ ជាពិសេសការរីកចម្រើនរបស់ទីផ្សារពាណិជ្ជកម្មអេឡិចត្រូនិក ដែលបានជំរុញឱ្យមានតម្រូវការជួល ឬទិញឃ្លាំងនៅទូទាំងតំបន់។

លោក Cooper បានកត់សម្គាល់ឃើញថា “មជ្ឈមណ្ឌលទិន្នន័យមានភាពខុសប្លែកគ្នាបន្តិចពីអចលនទ្រព្យក្នុងផ្នែកផ្សេងទៀត។ យើងបានសង្កេតឃើញមានមានការខ្វែងគំនិតគ្នាមួយចំនួនអំពីសំណួរថា តើមជ្ឈមណ្ឌលទិន្នន័យជាអចលនទ្រព្យ ឬជាហេដ្ឋារចនាសម្ព័ន្ធ?”។

ប៉ុន្តែ លោក Mark Cooper បានអះអាងថា មជ្ឈមណ្ឌលទិន្នន័យនេះត្រូវបានគេចាត់ទុកថា ជាមូលដ្ឋានក្នុងការទ្រទ្រង់ផ្នែកហេដ្ឋារចនាសម្ព័ន្ធសម្រាប់ការធ្វើអាជីវកម្មតាមរយៈប្រព័ន្ធឌីជីថលក្នុងយុគសម័យទំនើប។

លោក Stuart Porter អ្នកជំនាញអចលនទ្រព្យនៅក្រុមហ៊ុន PwC បានលើកឡើងថា “ប្រសិនបើមានមជ្ឈមណ្ឌលទិន្នន័យចំនួន២០០ទីតាំង ឬច្រើនជាងនេះនៅក្នុងប្រទេសជប៉ុន។ ដូច្នេះ បណ្តាអ្នកវិនិយោគនឹងអាចចាប់យកឱកាសរយៈពេលវែង ហើយបណ្តាប្រទេសផ្សេងទៀតនៅតំបន់អាសុីក៏នឹងទាក់ទាញបានការវិនិយោគលើមជ្ឈមណ្ឌលទិន្នន័យផងដែរ”។

ថ្វីបើមានការប្រែប្រួលរយៈពេលខ្លី និងបញ្ហាម៉ាក្រូសេដ្ឋកិច្ចយ៉ាងណាក្តី ក៏បណ្តាវិនិយោគិននៅក្នុងតំបន់អាសុីបានផ្តោតលើការវិនិយោគរយៈពេលវែងជាជាងការវិនិយោគដើម្បីទទួលបានផលចំណេញរយៈពេលខ្លី៕ប្រភព: Real Estate Asia៕

ដោយៈ គង់ សូរិយា

ភ្នំពេញៈ នៅទីបំផុតការបញ្ចុះបឋាមសិលា សាងសង់រោងចក្រផលិតរថយន្តអគ្គិសនីដ៏ធំរបស់ចិនBYD នៅកម្ពុជានឹងចាប់ផ្តើមបើកការសដ្ឋានសាងសង់នាសប្តាហ៍ទី៤ នៃខែមេសានេះ។

ព័ត៌មាននេះត្រូវបានលើកឡើង ក្នុងពេលលោកស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអនុញ្ញាត្តជូនគណៈប្រតិភូក្រុមហ៊ុន BYD Auto Industry Co., Ltd. ដឹកនាំដោយលោក Xiao Haiping នាយកប្រតិបត្តិ នៃទីស្នាក់ការកណ្តាលសម្ព័ន្ធ BYD ចូលជួបសម្តែងការគួរសម និងពិភាក្សាការងារ។

នៅក្នុងជំនួបនាព្រឹកនេះ គណៈប្រតិភូក្រុមហ៊ុន BYD Auto Industry Co., Ltd បានសម្តែងនូវអំណរគុណ យ៉ាងជ្រាលជ្រៅចំពោះកិច្ចសម្របសម្រលនានារបស់រាជរដ្ឋាភិបាល ក៏ដូចជាក្រុមប្រឹក្សាអភិវឌ្ឍន៍កម្ពុជា ចាប់តាំងពីដំណាក់កាលដំបូង នៃការចូលមកកាន់ទីផ្សារកម្ពុជា រហូតឈានដល់ការត្រៀមរៀបចំ ប្រារព្ធពិធីបញ្ចុះបឋមសិលា បើកការដ្ឋានសាងសង់រោងចក្រ តម្លើងរថយន្តរបស់ខ្លួននៅក្នុងប្រទេសកម្ពុជា ក្នុងអំឡុងសប្តាហ៍ទី៤ នៃខែមេសាខាងមុខនេះ។

ជាការឆ្លើយតប លោកឧបនាយករដ្ឋមន្ត្រី បានសម្តែងនូវសេចក្តីសោមន្សរីករាយ ចំពោះការជ្រើសរើសកម្ពុជា ជាមូលដ្ឋានតម្លើងរថយន្ត BYD មួយបន្ថែមទៀតនៅក្នុងតំបន់អាស៊ីអាគ្នេយ៍។

លោកស៊ុន ចាន់ថុលបានបន្ថែមថា ក្រុមប្រឹក្សាអភិវឌ្ឍន៍កម្ពុជា ដែលជាសេនាធិការច្រកចេញ ចូលតែមួយរបស់រាជរដ្ឋាភិបាល គឺតែងតែត្រៀមលក្ខណៈរួចរាល់ជាស្រេច ក្នុងការសម្របសម្រួលរាល់គ្រប់កិច្ចការងារវិនិយោគ របស់វិស័យឯកជននៅកម្ពុជា សំដៅធានាបាននូវបរិយាកាសវិនិយោគ ប្រកបដោយភាពបត់បែន អំណោយផល និងអនុគ្រោះបំផុត។

លោកបង្ហាញសុទិដ្ឋនិយមថា បន្ទាប់ពីរោងចក្រតម្លើងរថយន្តបានសាងសង់រួចរាល់ និងដាក់ឱ្យប្រតិបត្តិការជាផ្លូវការ នៅអំឡុងត្រីមាសទី៤ ឆ្នាំ២០២៥នេះ អត្រានៃការប្រើប្រាស់រថយន្ត BYD នៅកម្ពុជានឹងមានការកើនឡើងផងដែរ៕

ដោយៈ យិន លាងគង់

    ភ្នំពេញៈ ពេលវេលាពិតជាលឿនណាស់ មួយឆ្នាំៗពិតជាដូចមួយប៉ព្រិចភ្នែក ប៉ុន្តែយើងទាំងអស់គ្នាបានឆ្លងកាត់នូវភាពជោគជ័យ និងបរាជ័យជាច្រើន ក្នុងជីវិត និងពិភពជំនួញ ដែលបណ្តាលមកពីវិបត្តិជំងកូវីដ១៩ វិបត្តិសង្រ្កាមរុស្ស៊ី អ៊ុយក្រែន ភាពតានតឹងភូមិសាស្រ្តនយោ​បាយ និងសង្រ្គាមពាណិជ្ជកម្ម ដែលកំពុងដុតកំឡោចសកលភាវូបនីយកម្មយ៉ាងព្រៃផ្សៃ។

ពិភពលោកប្រែប្រួល ពិតជាបានជះឥទ្ឋិពលដល់មុខជំនួញ និងអាជីវកម្មរបស់យើង ខ្ញុំបាទយិន លាងគង់ ពិតជាសូមអបអរសាទរ និងគោរពយ៉ាងស្មោះស្ម័គ្រ ចំពោះថ្នាក់ដឹកនាំប្រទេសសម្តេចមហាបវរធិបតីហ៊ុន ម៉ាណែតនាយករដ្ឋមន្រ្តីនៃកម្ពុជា សម្តេចតេជោហ៊ុន សែនប្រធានព្រឹទ្ឋសភា និងអ្នកដឹកនាំជំនួញ ដែលបានតស៊ូ អត់ធម្មត់រិះរកគ្រប់មធ្យោបាយ ដើម្បីកសាងប្រទេស ទាក់ទាញការវិនិយោគ ដើម្បីជម្រុញកំណើនសេដ្ឋកិច្ច និងផលចំណូលជាតិដល់ប្រជាជាតិ ដែលទើបទទួលបានភាពរីករាយ ជាមួយនឹងសមិទ្ឋផលដ៏លេចធ្លោ ក្នុងប៉ុន្មានទសវត្សរ៍ចុងក្រោយនេះ។

ក្នុងនាមជាអ្នកដឹកនាំ នៃគេហទំព័រPropertyarea.asia &Cambodiafinancialtimes.com ខ្ញុំបាទ បាននិងកំពុងបន្តបេសកកម្ម លើវិស័យសារគមនាគមន៍ ដែលមានទីផ្សារកាន់តែតូចចង្អៀតនេះ ដើម្បីបន្តផ្សព្វផ្សាយនូវព័ត៌មានល្អៗ ពិតឥតលំអៀង ប្រ​ក​បដោយតុល្យភាព សុក្រិតភាព និងផ្តល់ចំណេះដឹងថ្មីៗដល់លោក លោកស្រីបន្តទៀត ជាការរួមវិភាគទានមួយផ្នែក ដើម្បីគាំទ្រគោលនយោបាយរបស់រាជរដ្ឋាភិបាល ក៏ដូចជាប្រទីបដើម្បីបង្ហាញពីព័ត៌មានវិជ្ជមានទៅកាន់មជ្ឈដ្ឋានជាតិ អន្តរជាតិ។

ជាដំណឹងល្អមួយ “នៅពេលឆាប់ៗខាងមុខនេះ យើងខ្ញុំនឹងមានផ្តល់នូវអ្វី ដែលជាផលប្រយោជន៍ផ្នែកព័ត៌មាន ជាមួយនឹងចំណេះដឹងថ្មីៗ និងលឿនបំផុតជូនលោក លោកស្រី អ្នកអាន”បានជ្រាប និងសូមជួយគាំទ្រយើងខ្ញុំដោយសេចក្តីស្រលាញ់ផង។

ពិតហើយនៅក្នុងលោកនេះ “គ្មានភាពឥតខ្ចោះទេ” តែយើងខ្ញុំនឹងព្យាយាមបង្កើតភាពឥតខ្ចោះមួយ ដើម្បីផ្តល់ព័ត៌មានកាន់តែមានសារៈប្រយោជន៍ដល់អ្នកអាន អ្នកស្តាប់បន្តទៀត ដែលកន្លងមកគេហទំព័រយើងខ្ញុំបានជះឥទ្ឋិពលយ៉ាងធំ ដល់វិស័យអចលនទ្រព្យ ក៏ដូចជា ក្នុងទិដ្ឋភាពទូទៅនៃសេដ្ឋកិច្ចជាតិ ដោយនៅតែប្រកាន់ពាក្យស្លោក “មិនបំភ្លៃ មិនបំភ្លើស មិនបំប៉ោង” ដើម្បីផលប្រយោជន៍ណាមួយ ដោយធ្វើឲ្យប្រាសចាក “ក្រមសីលធ៌មវិជ្ជាជីវៈ”ជាដាក់ខាត។

ជាមួយគ្នានេះ ក្នុងនាមជាសហស្ថាបនិក​ និងជាថ្នាក់ដឹកនាំនៃស្ថាប័នទាំងពីរខាងលើនេះ ខ្ញុំបាទសូមគោរពថ្លែងអំណរគុណ ដល់ថ្នាក់ដឹកនាំក្រុមហ៊ុនជាតិ និងអន្តរជាតិនានា ដែលតែងតែគាំទ្រក្នុងការផ្សព្វផ្សាយពាណិជ្ជកម្ម ដល់គេហទំព័រខ្ញុំបាទ ជារៀងដរាបមក និងសុំជួយបន្តគាំទ្រគេហទំព័រទាំងពីរបន្តទៀត ដើម្បីយើងខ្ញុំនៅតែអាចបន្តបេសកកម្មផ្សព្វផ្សាយព័ត៌មានបំរើសេដ្ឋកិច្ច សង្គមជាតិបន្តទៀត។

    ជាថ្មីម្តងទៀត ខ្ញុំសូមលំឱនកាយគោរព និងដឹងគុណដល់សម្តេច ទ្រង់ ឯកឧត្តម លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី អ្នកនាងកញ្ញា ដែលបានបន្ត និងកំពុងគាំទ្រដល់ដំណើរការចេញផ្សាយព័ត៌មានទាក់ទងនឹងសេដ្ឋកិច្ច អចលនទ្រព្យ ចំណេះដឹងហិរញ្ញវត្ថុ ផ្សារហ៊ុន តម្លៃមាស រូបិយប័ណ្ណពីគេហទំព័រយើងខ្ញុំតាំងពីដើមរៀងមក។

ក្នុង​ឱកាសបុណ្យចូលឆ្នាំប្រពៃណីជាតិខ្មែរ ដែលនឹងចូលមកដល់នៅថ្ងៃទី១៣ ដល់១៦ មេសាខាងមុខ ខ្ញុំសូមលើកម្រាមដៃ១០ គោរពលំឱនកាយជូនពរដល់សម្តេច ទ្រង់ ឯកឧត្តម លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី ទទួលបាននូវភាពជោគជ័យដ៏ត្រចេះត្រចង់ និងមានសុភមង្គលគ្រប់ក្រុមគ្រួសារ និងជួបប្រទះតែពុទ្ឋពរទាំងបូនប្រការគឺអាយុ វណ្ណៈ សុខៈនិងពលៈកុំបីឃ្លៀងឃ្លាតឡើយ។

       ដោយក្តីគោរពពីខ្ញុំបាទ

យិន លាងគង់សហស្ថាបនិកគេហទំព័រPropertyarea.asia &Cambodiafinancialtimes.com៕