ដោយៈ ម៉ាណា

    កោះកុងៈ អនុប្រធានទី១នៃក្រុមប្រឹក្សាអភិវឌ្ឍន៍ក​ម្ពុជា លោកឧបនាយករដ្ឋមន្រ្តីស៊ុន ចាន់ថុល និងលោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន អញ្ជើញចូលរួមក្នុងពិធីចាក់បេតុងតភ្ជាប់មុខតំណស្ពានខ្ពស់ជាងគេនៅកម្ពុជា នៃគម្រោងផ្លូវជាតិលេខ១០  និងបើកដំណើរការជាបណ្តោះអាសន្ន ចាប់ពីថ្ងៃទី១១ ដល់១៧ ខែមេសា ឆ្នាំ២០២៥។

ពិធីនេះមានការអញ្ជើញចូលរូមពី ប្រធានក្រុមប្រឹក្សាខេត្តកោះកុង ខេត្តពោធិ៍សាត់ និងខេត្តបាត់ដំបង និងមន្រ្តីពាក់ព័ន្ឋជាច្រើន។

គម្រោងផ្លូវជាតិលេខ១៥៥១ (ផ.ជ.១០)  និងស្ពាននេះ នឹងត្រូវបើកឱ្យប្រើប្រាស់ជាបណ្តោះអាសន្ន សម្រាប់រថយន្តធុនតូច (ប្រភេទទេសចរណ៍/គ្រួសារ) ឆ្លងកាត់រយៈពេល១សប្តាហ៍ ចាប់ពីថ្ងៃទី១១ ដល់ថ្ងៃទី១៧ ខែមេសា ឆ្នាំ២០២៥ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ព.ស.២៥៦៩ គ.ស .២០២៥ ខាងមុខនេះ។

ស្ពាននេះជាផ្នែកមួយ នៃគម្រោងសាងសង់ផ្លូវជាតិលេខ១០ ដែលបានប្រកាសបើកការដ្ឋានសាងសង់ ជាផ្លូវការកាលពីថ្ងៃទី៩ ខែមីនា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់ សម្តេចតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា នៃព្រះរាជាណាចក្រកម្ពុជា។ ស្ពានខ្ពស់ជាងគេនេះ ជាស្ពានទី២៨ ក្នុងចំណោមស្ពានសរុបចំនួន៣២ ដែលសាងសង់សម្រេចបាន៩៨% មានប្រវែង៥៣៧ម កម្ពស់៩០ម(ដោយគិតពីបាតស្ទឹងដល់បាតធ្នឹមក្រោមស្ពាន) ទទឹងស្ពានទាំងសងខាងមានប្រវែង១០ម និងចំណុចកណ្តាលសងខាង នៃស្ពានមានទីធ្លាសម្រាប់សំចតថតរូបអនុស្សាវរីយ៍មានទទឹងសរុប១៥ម(ក្នុងប្រវែងសរុប១០ម ពង្រីកម្ខាង ២,៥ម)៕

ដោយ: គង់ លាងហួរ
អន្តរជាតិ: យោងតាមកាសែត South China Morning Post បានរាយការណ៍ថា ប្រទេសម៉ាឡេស៊ីកំពុងសាងសង់កំពង់ផែស្ងួតដ៏ធំមួយក្នុងរដ្ឋ Perlis ស្ថិតនៅភាគខាងជើងនៃប្រទេសរបស់ខ្លួន ដែលមានសក្តានុពលក្នុងការផ្លាស់ប្តូរទិដ្ឋភាពពាណិជ្ជកម្មពិភពលោក។

កំពង់ផែស្ងួត Perlis នឹងក្លាយជាគន្លឹះនៃការតភ្ជាប់ផ្លូវដែកថ្មីរវាងតំបន់អឺរ៉ុប និងតំបន់អាស៊ី ដោយអាចផ្តល់ឱ្យបណ្តាក្រុមហ៊ុននាំចេញនូវជម្រើសផ្លូវវាងដ៏សំខាន់មួយ ដោយពុំចាំបាច់ឆ្លងកាត់ផ្លូវទឹក ដែលរងផលប៉ះពាល់ពីសង្គ្រាមរវាងរុស្ស៊ី-អ៊ុយក្រែន និងសង្គ្រាមនៅតំបន់ហ្គាហ្សា។

គម្រោងកំពង់ផែស្ងួតនេះ មានដើមទុនវិនិយោគប្រមាណ១១១លានដុល្លារអាមេរិក ក្នុងគោលបំណងប្រែក្លាយរដ្ឋ Perlis ទៅជាចំណុចសំខាន់មួយនៅក្នុងបណ្តាញផ្លូវដែកតភ្ជាប់រវាងបណ្តាប្រទេសក្នុងតំបន់អឺរ៉ុប អាស៊ាន និងប្រទេសចិន។

ក្នុងរយៈពេល២ឆ្នាំកន្លងមកនេះ ប្រទេសម៉ាឡេស៊ីបានបង្កើនកិច្ចខិតខំប្រឹងប្រែងរបស់ខ្លួនក្នុងការអភិវឌ្ឍន៍បណ្តាញផ្លូវដែក Pan-Asian។ គម្រោងនេះជាចក្ខុវិស័យរយៈពេលវែងក្នុងការតភ្ជាប់ប្រទេសសិង្ហបុរីទៅកាន់ទីក្រុងគុនមីងនៃប្រទេសចិន។

គម្រោងបណ្តាញផ្លូវដែក Pan-Asian នេះរត់​ចេញពី​ប្រទេស​សិង្ហបុរី​ឆ្លងកាត់​ម៉ាឡេស៊ី ថៃ និង​ឡាវ មុន​នឹង​ឈានទៅ​ដល់​ប្រទេស​ចិន។ ផ្លូវ​ដែកនេះនឹង​បែកចេញជាខ្នែង​​ឆ្ពោះទៅ​ទិសខាងកើតទៅកាន់ប្រទេស​វៀតណាម និង​កម្ពុជា ហើយ​ឆ្ពោះទៅទិសខាងលិច​ទៅ​កាន់ប្រទេស​មី​យ៉ាន់​ម៉ា និង​ឥណ្ឌា​។

ចំពោះបណ្តាប្រទេសនានានៅក្នុងតំបន់អាសុី ដែលពឹងផ្អែកទៅលើការនាំចេញទំនិញទៅក្រៅប្រទេស បណ្តាញផ្លូវដែកជាមធ្យោបាយដឹកជញ្ជូនដ៏លឿន និងគួរឱ្យទុកចិត្តជាងផ្លូវទឹក៕ប្រភព: SCMP៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនាព្រឹកថ្ងៃអង្គារនេះ ដោយសារការធ្លាក់ថ្លៃចុះនៃប្រាក់ដុល្លារអាមេរិក និងភាពមិនច្បាស់លាស់នៃទស្សនវិស័យសេដ្ឋកិច្ចពិភពលោក ដែលបង្កឡើងដោយសង្គ្រាមពាណិជ្ជកម្ម និងនាំឱ្យមានការព្រួយបារម្ភអំពីលទ្ធភាពកើតមានវិបត្តិសេដ្ឋកិច្ច។

តួយ៉ាង តម្លៃមាស Spot Gold បានងើបឡើង០,៤៣ភាគរយដល់២៩៩៥,៤៥ដុល្លារក្នុងមួយអោន បន្ទាប់ពីបានធ្លាក់ចុះមកនៅត្រឹម២៩៨២,៥៤ដុល្លារក្នុងមួយអោនកាលពីថ្ងៃច័ន្ទ។ តម្លៃហាងឆេងមាសរបស់សហរដ្ឋអាមេរិក U.S. gold futures បានកើនឡើង១,២៨ភាគរយដល់៣០១១,៨០ដុល្លារក្នុងមួយអោនគិតត្រឹមម៉ោង១០:៥៤នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៦៥,៤ភាគរយ ដែលធនាគារកណ្តាលអាមេរិក (Fed) នឹងអាចទម្លាក់អត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះមកនៅត្រឹម១០៣,០១ពិន្ទុនាព្រឹកថ្ងៃអង្គារនេះ បន្ទាប់ពីបានបិទការជួញដូរត្រឹម១០៣,២៦ពិន្ទុកាលពីថ្ងៃច័ន្ទម្សិលមិញ។

ចំណែក តម្លៃលោហៈធាតុប្រាក់ Spot silver បានកើនឡើង១,៥៦ភាគរយដល់៣០,០៦ដុល្លារក្នុងមួយអោន ខណៈតម្លៃផ្លាទីនបានកើនឡើង១,២៩ភាគរយដល់៩១៧,៦ដុល្លារក្នុងមួយអោន ហើយតម្លៃ palladium បានងើបឡើង១,៨ភាគរយដល់៩០៤ដុល្លារក្នុងមួយអោនគិតត្រឹមម៉ោង១០:៥៦នាទីព្រឹក៕

ដោយៈ គង់ សូរិយា

    ភ្នំពេញៈ ក្រុមមន្រ្តី និងអ្នកជំនាញជប៉ុនបានបើកកិច្ចប្រជុំស្តីពីការពិនិត្យពិភាក្សាលើលក្ខខណ្ឌយោង (Term of Reference) សម្រាប់ការសិក្សាសមិទ្ធិលទ្ធភាព នៃគម្រោងកែលម្អកំណាត់ផ្លូវជាតិលេខ១ និងសាងសង់ស្ពានថ្មីឆ្លងកាត់ទន្លេមេគង្គ។

កិច្ចប្រជុំកាលពីថ្ងៃទី៤ ខែមេសា ឆ្នាំ២០២៥ កន្លងមកមានការចូលរួមពីលោកឈឹម ផល្លាមន្រ្តីបង្គោលគម្រោងបានដឹកនាំ មន្រ្តីគម្រោងចូលរួមកិច្ចប្រជុំ ស្តីពីការពិនិត្យពិភាក្សាលើលក្ខខណ្ឌយោង (Term of Reference) សម្រាប់ការសិក្សាសមិទ្ធិលទ្ធភាព នៃគម្រោងកែលម្អកំណាត់ផ្លូវជាតិលេខ១ និងសាងសង់ស្ពានថ្មីឆ្លងកាត់ទន្លេមេគង្គ។

កិច្ចប្រជុំនេះធ្វើឡើងក្រោមអធិបតីភាព លោកប៉ែន ធីរុង្គ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ដោយមានការចូលរួមពី តំណាងទីភ្នាក់ងារសហប្រតិបត្តិការអន្តរជាតិ នៃប្រទេសជប៉ុន(JICA) ផងដែរ។

ក្នុងកិច្ចប្រជុំនេះបានពិភាក្សា លើការសិក្សាការពង្រីកកំណាត់ផ្លូវជាតិលេខ១ ប្រវែង៥២,៨គីឡូម៉ែត្រម៉ែត្រ និងគម្រោងសាងសង់ស្ពានថ្មីឆ្លងកាត់ទន្លេមេគង្គ (សាងសង់ស្ពាន និងផ្លូវតភា្ជប់ស្ពាន)៕

ដោយៈ គង់ សូរិយា

    ភ្នំពេញៈ សម្តេចធិបតីហ៊ុន ម៉ាណែតនាយករដ្ឋមន្រ្តីនៃកម្ពុជាបានលើកឡើងថា នៅពេលព្រលានយន្តហោះអន្តរជាតិតេជោ បើកដំណើរការ ចំនួនប្រជាពលរដ្ឋនៅខេត្តកណ្តាលនឹងកើនឡើង ដែលបច្ចុប្បន្នមួយផ្នែកនៃខេត្តកណ្តាល បានកាត់ចូលរាជធានីភ្នំពេញ។

    សម្តេចបានថ្លែងក្នុងពិធី បើកសម្ភោធឲ្យប្រើប្រាស់ជាផ្លូវការ នៅស្ពានអាកាសមរតកតេជោ កាលពីព្រឹកថ្ងៃទី៧ មេសាថា សម្តេចរំពឹងខេត្តកណ្តាល នឹងមានប្រជាពលរដ្ឋកើនឡើងបន្ថែមទៀត នៅពេលព្រលានយន្តហោះធ្វើរួច ហើយនៅពេលធ្វើរួច នឹងមានតំបន់សេដ្ឋកិច្ច ពិសេស តំបន់ឧស្សាហកម្ម និងតំបន់ភស្តុរភារកម្មកើនឡើងថែមទៀត។

    សម្តេចបញ្ជាក់ថា “ហេតុនេះចំនួនមនុស្សកាន់តែច្រើន នឹងមកធ្វើការកាន់តែច្រើន អញ្ចឹងចំនួនប្រជាជននៅខេត្តកណ្តាល នឹងកើនឡើង”។

    ជាមួយគ្នានេះ សម្តេចធិបតីហ៊ុន ម៉ាណែតបានលើកឡើងថា រាជរដ្ឋាភិបាលមិនមានគោលនយោបាយណាមួយ ពោលគឺមិនកំណត់មិនឲ្យប្រជាជនទិញឡានជិះនោះទេ ឲ្យតែគាត់មានថវិកាគាត់ទិញហើយ។ សម្តេចបន្ថែមថា បើជិះកង់១០០គ្រឿងមិនស្ទះទេ តែបើមានឡាន៥០គ្រឿនគឺស្ទះហើយ៕