(ភ្នំពេញ)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានណែនាំដល់រដ្ឋបាលរាជធានីភ្នំពេញ រៀបចំដីប្រមាណ៧០ហិកតា ដែលបានត្រៀមនៅតំបន់ទំនប់កប់ស្រូវ ដើម្បីធ្វើសួនសាធារណៈជូនប្រជាពលរដ្ឋទៅលេងកម្សាន្ដ និងសម្រាកលំហែនៅថ្ងៃខាងមុខ។

ការលើកឡើងរបស់សម្ដេចមហាបវរធិបតី ហ៊ុន ម៉ាណែត ក្នុងឱកាសអញ្ជើញជាអធិបតីភាពសម្ពោធដាក់ឲ្យប្រើប្រាស់ គឺស្ពានអាកាស «មរតកតេជោ» ដែលជាស្ពានអាកាសទី៨​ ក្នុង​រាជធានីភ្នំពេញ នាព្រឹកថ្ងៃទី៧ ខែមេសា ឆ្នាំ២០២៥នេះ។

សម្ដេចមហាបវរធិបតី ហ៊ុន ម៉ាណែត បានមានប្រសាសន៍យ៉ាងដូច្នេះថា «ឥលូវនេះនៅរាជធានីភ្នំពេញ ខ្ញុំឲ្យរៀបចំផ្លូវទំនប់កប់ស្រូវត្រៀមប្រហែល៧០ហិកតា ដើម្បីធ្វើសួនសាធារណៈឲ្យអ្នកភ្នំពេញតែម្ដង។ កន្លែងនេះយើងទុក៧០ហិកតា យកធ្វើសួនសាធារណៈ ទុកឲ្យអ្នករាជធានីភ្នំពេញទៅលេង យើងរៀបចំកន្លែងពិកនិក ខន់សើតជាដើម»។

សម្ដេចប្រមុខនៃរាជរដ្ឋាភិបាលកម្ពុជា បានអះអាងថា ដើម្បីឆ្លើយតបជាមួយផែនការអភិវឌ្ឍសួនសាធារណៈនេះ លោក ឃួង ស្រេង អភិបាលរាជធានីភ្នំពេញ បាននិងកំពុងបណ្ដុះកូនឈើរាប់ពាន់ដើម ដើម្បីត្រៀមដាំនៅសួនសាធារណៈដ៏ធំមួយនៅក្នុងរាជធានីភ្នំពេញ ព្រោះថ្ងៃខាងមុខកណ្ដាលក្រុងធំៗ ត្រូវតែមានទីធ្លាសួនសាធារណៈសម្រាប់ប្រជាពលរដ្ឋ។

បើតាមប្រសាសន៍របស់សម្ដេចមហាបវរធិបតី នាយករដ្ឋមន្ដ្រីនៃកម្ពុជា, ក្រៅពីរាជធានីភ្នំពេញ ដែលបានត្រៀមដីសម្រាប់ធ្វើសួនសាធារណៈបម្រើឲ្យផលប្រយោជន៍រួមនោះ តាមបណ្ដាខេត្តផ្សេងៗ ក៏ត្រូវអនុវត្តបែបនេះដូចគ្នាដែរ ពោលបច្ចុប្បន្ននេះខេត្តកែប កំពុងអភិវឌ្ឍន៍ចាក់ខ្សាច់បំពេញនៅតាមតំបន់ឆ្នេរ ដើម្បីកែលម្អសោភ័ណភាពឲ្យកាន់តែស្អាត សំដៅទាក់ទាញភ្ញៀវទេសចរជាតិ និងអន្ដរជាតិបន្ថែមទៀត។

សម្ដេចមហាបវរធិបតី ហ៊ុន ម៉ាណែត បានសម្ដែងនូវក្ដីសប្បាយរីករាយ និងវាយតម្លៃខ្ពស់ចំពោះរដ្ឋបាលរាជធានី-ខេត្ត រៀបចំសួនសាធារណៈកាន់តែច្រើនដើម្បីការលំហែកាយរបស់ប្រជាពលរដ្ឋ។ សម្ដេចបានជំរុញឲ្យបណ្ដារាជធានី-ខេត្តទាំងអស់ ត្រូវបន្ដការប្រកួតប្រជែងគ្នាក្នុងការអភិវឌ្ឍមូលដ្ឋានរបស់ខ្លួនឲ្យកាន់តែរីកចម្រើនបន្ថែមទៀត។

ក្រៅពីបញ្ហាសួនសាធារណៈសម្រាប់ពលរដ្ឋសម្រាកលំហែកាយហើយនោះ សម្ដេចមហាបវរធិបតី ហ៊ុន ម៉ាណែត ក៏បានណែនាំឲ្យក្រសួងរៀបចំដែនដី នគរូបនីយកម្ម និងសំណង់ សហការជាមួយក្រសួងសាធារណការ និងដឹកជញ្ជូន និងរដ្ឋបាលរាជធានីភ្នំពេញ គិតគូរពីការរៀបចំប្រព័ន្ធផ្លូវសាធារណៈ ដើម្បីកែសម្រួលរំហូរចរាចរណ៍ក្នុងរាជធានីភ្នំពេញ ឲ្យកាន់តែប្រសើរឡើង និងកាត់បន្ថយការកកស្ទះចរាចរណ៍៕

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបង្ហាញក្តីសង្ឃឹមថា ទៅថ្ងៃអនាគតរាជធានីភ្នំពេញនឹងមានផ្លូវក្រោមទឹក។ ដោយឡែកបច្ចុប្បន្ននេះ កម្ពុជាមានស្ពានធំៗឆ្លងកាត់ទន្លេ និងដៃសមុទ្រជាច្រើនកន្លែង ដែលបានស្ថាបនារួច និងដាក់ឱ្យប្រើប្រាស់ដើម្បីសម្រួលការធ្វើដំណើរ និងការដឹកជញ្ជូនទំនិញផ្សេងៗ។

ក្រោយទទួលបានសន្តិភាពពេញ រាជរដ្ឋាភិបាលកម្ពុជា បាននឹងកំពុងយកចិត្ដទុកដាក់លើការអភិវឌ្ឍប្រព័ន្ធហេដ្ឋារចនាសម្ព័នជាច្រើនដូចជា៖ ផ្លូវថ្នល់ ផ្លូវដែក ផ្លូវអាកាស ស្ពាន ឆ្លងទន្លេ ស្ពានអាកាស និងកំពង់ផែជាដើម ដើម្បីធ្វើយ៉ាងណាឱ្យការដឹកជញ្ជូន និងការធ្វើដំណើររបស់ប្រជាជនមានភាពងាយស្រួល។

សម្តេចមហាបវរធិបតី ហ៊ុន ម៉ាណែត បានថ្លែងថា ការដឹកនាំមិនអាចហាមប្រជាពលរដ្ឋមិនឱ្យទិញរថយន្ត ទិញម៉ូតូសម្រាប់ធ្វើដំណើរនោះទេ អ្វីដែលអាចធ្វើបាន គឺប្រឹងប្រែងសាងសង់ផ្លូវ ពង្រីកផ្លូវ ដើម្បីសម្រួលការធ្វើដំណើររបស់ប្រជាពលរដ្ឋ។

ក្នុងឱកាសអញ្ជើញជាអធិបតីភាព សម្ពោធដាក់ឱ្យប្រើប្រាស់ជាផ្លូវការ ​ស្ពានអាកាស «មរតកតេជោ» ដែលជាស្ពានអាកាសទី៨ ក្នុង រាជធានីភ្នំពេញ​នៅព្រឹកថ្ងៃទី៧ ខែមេសា ឆ្នាំ២០២៥នេះ សម្តេចបវរធិបតី ហ៊ុន ម៉ាណែត បានបង្ហាក្តីសង្ឃឹមយ៉ាងដូច្នេះថា៖ «ឥឡូវកំពុងតែគិតគូរសិក្សា ថ្ងៃក្រោយខ្ញុំសង្ឈឹមថាយើងមានអាក្រោមទឹក (ផ្លូវក្រោមទឹក) ឆ្លងទន្លេបន្ថែមទៀត វាទៅអ៊ឹចឹង»។

ជាមួយគ្នានេះដែរ សម្តេចបវរធិបតី ហ៊ុន ម៉ាណែត បានលើកឡើងថា បច្ចុប្បន្ននេះ ការធ្វើដំណើរពីអរិក្សត្រ មករាជធានីភ្នំពេញ ប្រជាពលរដ្ឋ ត្រូវធ្វើដំណើរដោយឆ្លងសាឡង។ រាជរដ្ឋាភិបាលកម្ពុជា មិនដើរថយក្រោយជាដាច់ខាត ប៉ុន្តែ រាជរដ្ឋាភិបាល ត្រូវធ្វើការដោយបុរេសកម្ម ហើយតំបន់អរិយក្សត្រនឹងមានភាពរីកចម្រើនដោយនឹងមានហេដ្ឋារចនាសម្ព័ន្ធកាន់តែស្អាតងាយស្រួលធ្វើដំណើរ និងអគារខ្ពស់ៗជាច្រើនទៀត ខណៈស្ពានមិត្តភាពកម្ពុជា-កូរ៉េ គ្រោងនឹងបើកការដ្ឋានសាងសង់ឆាប់ៗនេះ។

សម្តេចបវរធិបតី ហ៊ុន ម៉ាណែត ក៏បានបង្ហើបឱ្យដឹងថា ស្ពានឆ្លងទន្លេប្រមាណ២ ឬ ៣ នឹងត្រូវបើកការដ្ឋានសាងសង់ជាបន្តបន្ទាប់ ដើម្បីបម្រើដល់ការធ្វើដំណើររបស់ប្រជាពលរដ្ឋជាដើម។ ដូច្នេះ នៅពេលដែលប្រទេសជាតិ មានការរីកចម្រើន គឺទាមទារឱ្យរាជរដ្ឋាភិបាល បន្តកិច្ចខិតខំប្រឹងប្រែង កសាងហេដ្ឋារវចនាសម្ព័ន្ធរូបវ័ន្តនានា ដើម្បីឆ្លើយតបនឹងតម្រូវការជាក់ស្តែងរបស់ប្រជាពលរដ្ឋ។

ជាមួយគ្នានេះដែរ សម្តេចមហាបវរធិបតី ហ៊ុន ម៉ាណែត បានបង្ហាញពីមោទនភាពក្នុងរយៈពេលមុន និងក្រោយបោះឆ្នោត សម្តេចបានអញ្ជើញសម្ពោធ និងបើកការដ្ឋានសាងសង់សមិទ្ធផលចំនួន៥លើក ហើយរួមមាន៖ បើកការដ្ឋានសង់ផ្លូវ៥០ម៉ែត្រ ភ្ជាប់ផ្លូវ៦០ម៉ែត្រ ទៅដង្កោ, សាងសង់ស្ពានចាក់អង្រែក្រោម ទៅព្រែកប្រា, បើកការដ្ឋានស្ពានអាកាសភ្លោះ, សម្ពោធអាងប្រព្រឹត្តកម្មទឹកកខ្វក់ និងសម្ពោធស្ពានអាកាសមរតកតេជោ។

គួរឱ្យដឹងថា បច្ចុប្បន្ន កម្ពុជាមានស្ពានអាកាសចំនួន៨ ហើយដែលបានដាក់ឱ្យប្រើប្រាស់ ដោយក្នុងនោះរួមមាន៖ ស្ពានអាកាសក្បាលថ្នល់, ស្ពានអាកាស ៧មករា ឬហៅក្រៅថា ស្ពានអាកាសពេទ្យលោកសង្ឃ, ស្ពានអាកាសស្ទឹងមានជ័យ, ស្ពានអាកាសទិចណូ, ស្ពានអាកាសផ្សារដីហុយ, ស្ពានអាកាសរង្វង់មូលចោមចៅ, ស្ពានអាកាសឫស្សីកែវ។​ ដោយឡែក «ស្ពានអាកាសមរតកតេជោ» ដែលជាស្ពានអាកាសទី៨ មានកម្ពស់៣ជាន់ ស្ថិតនៅចំណុចប្រសព្វ រវាងមហាវិថីសម្តេចតេជោ ហ៊ុន សែន មហាវិថី ព្រះមុនីវង្ស និងមហាវិថីយោធពលខេមរភូមិន្ទ (ផ្លូវ២៧១) ស្ថិតក្នុងមូលដ្ឋាន ខណ្ឌមានជ័យ និងខណ្ឌចំការមន រាជធានីភ្នំពេញ ត្រូវសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី៧ ខែមេសា​ ឆ្នាំ២០២៥នេះ៕