ភ្នំពេញ ថ្ងៃទី០២ ខែមេសា ឆ្នាំ២០២៥៖ ធនាគារ ហត្ថា ម.ក ដែលជាក្រុមហ៊ុនបុត្រសម័្ពន្ធរបស់ ធនាគារ ក្រុងស្រ៊ី ដែលជាធនាគារពាណិជ្ជធំជាងគេលំដាប់ទី៥ នៅក្នុងប្រទេសថៃ និងជាសមាជិកនៃសម្ព័ន្ធហិរញ្ញវត្ថុអន្តរជាតិ MUFG មានកិត្តិយសប្រកាសផលិតផលហិរញ្ញវត្ថុថ្មី គឺ ផលិតផលឥណទាន ”MyQuickCash” ដែលរចនាឡើងដើម្បីផ្តល់ឱ្យអតិថិជននូវភាពងាយស្រួល រហ័ស និង មិនត្រូវការទ្រព្យធានា។ ការនាំមកនូវផលិតផលនេះ បង្ហាញពីការប្តេជ្ញាចិត្តរបស់ ធនាគារ ហត្ថា ក្នុងការផ្តល់ដំណោះស្រាយហិរញ្ញវត្ថុដែលមានលក្ខណៈបត់បែន បំពេញតម្រូវជាក់ស្តែង និង ទាន់សម័យកាល។

ឥណទាន MyQuickCash គឺជាជម្រើសឥណទានដែលរហ័ស និងងាយស្រួល ហើយអាចជួយអតិថិជនក្នុងការបំពេញតម្រូវការហិរញ្ញវត្ថុផ្ទាល់ខ្លួន ដូចជាការកែលម្អផ្ទះ ការវិនិយោគអាជីវកម្ម និង ចំណាយផ្សេងៗទៀត ជាមួយនឹងអត្រាការប្រាក់ប្រកួតប្រជែង ជាពិសេសដំណើរការដាក់ពាក្យងាយស្រួល និងលក្ខខណ្ឌសងប្រាក់បត់បែន។ អតិថិជនមិនតម្រូវឲ្យមានទ្រព្យធានា មានត្រឹមលិខិតបញ្ជាក់ប្រាក់បៀវត្សដែលមានប្រាក់ចំណូលថេរ ហើយកាន់តែពិសេសនោះ អ្នកស្នាក់នៅបន្ទប់ជួលក៏អាចស្នើកម្ចីនេះបាន។ តម្រូវការបស់លោកអ្នក គឺផ្នែកមួយសំខាន់របស់ធនាគារ ហត្ថា ក្នុងការបង្កើតផលិតផលដែលសមស្រប ទៅតាមប្រភេទតម្រូវការរបស់អ្នក។

សម្រាប់ព័ត៌មានបន្ថែម ចូលទៅកាន់: https://www.hatthabank.com/km/page/myquickcashkh

បំពេញពាក្យស្នើសុំឥណទាន MyQuickCash ទីនេះ: http://bit.ly/3hcRijC

អំពី ធនាគារ ហត្ថា

ធនាគារ ហត្ថា ជាធនាគារពាណិជ្ជ ដែលមានវត្តមាននៅក្នុងព្រះរាជាណាចក្រកម្ពុជាអស់រយៈកាល ៣០ឆ្នាំមកហើយ ផ្តល់ជូនសេវាហិរញ្ញវត្ថុយ៉ាងទូលំទូលាយ ដល់អតិថិជនរបស់ខ្លួន។ ក្នុងនាមជាបុត្រសម្ព័ន្ធរបស់ធនាគារ ក្រុងស្រ៊ី ធនាគារ ហត្ថា មានមោទនភាពក្នុងការប្រកាសជាផ្លូវការបើកធនាគារ ហត្ថា ថៅវើ ដែលទើបបញ្ចប់គម្រោងសាងសង់ជាស្ថាពរ ដែលមានអាសយដ្ឋាននៅលើមហាវិថីសម្តេចតេជោ ហ៊ុនសែន (ផ្លូវ៦០ម៉ែត្រ) នៅក្នុងរាជធានីភ្នំពេញ។ សូមបញ្ជាក់ថាធនាគារ ហត្ថា បានទទួលការវាយតម្លៃជាស្ថាប័នមានស្ថិរភាពហិរញ្ញវត្ថុរឹងមាំ តាមរយៈការរក្សាបាននូវចំណាត់ថ្នាក់ BBB+ អស់រយៈពេល ០៦ឆ្នាំជាប់គ្នា ពីក្រុមហ៊ុន TRIS Rating ដែលចំណាត់ថ្នាក់នេះសបញ្ជាក់ឱ្យឃើញថា ធនាគារ ហត្ថា មានដំណើរការមុខជំនួញរបស់ខ្លួនប្រកបដោយស្ថិរភាព និងឈរជើងឈានមុខគេនៅក្នុងទីផ្សារហិរញ្ញវត្ថុ កម្ពុជា។ បន្ថែមជាងនេះទៅទៀត ធនាគារ ហត្ថា ទទួលបានការគាំទ្រយ៉ាងពេញទំហឹងពីសំណាក់ធនាគារ ក្រុងស្រ៊ី ដែលជាធនាគារអាណាព្យាបាលរបស់ខ្លួន ដែលរួមចំណែកជំរុញឱ្យធនាគារ ហត្ថា មានធនធានគ្រប់គ្រាន់ និងមានភាពរឹងមាំយ៉ាងខ្លាំងផ្នែកហិរញ្ញវត្ថុ ក្នុងការបន្តប្រតិបត្តិការអាជីវកម្មរបស់ខ្លួនជាធម្មតា។

ដោយ: គង់ លាងហួរ
អន្តរជាតិ: លោក ដូណាល់ ត្រាំ ដែលកំពុងកាន់តំណែងជាប្រធានាធិបតីអាមេរិកសម្រាប់អាណត្តិទី២នេះ បាន​អះអាង​ថា លោក​មិន​និយាយ​លេង​សើចទេ​អំពី​ការ​ចង់​កាន់​តំណែង​ជា​ប្រធានាធិបតី​សហរដ្ឋ​អាមេរិក​នៅអាណត្តិ​ទី​៣បន្តទៀត។

យោងតាមរដ្ឋធម្មនុញ្ញរបស់សហរដ្ឋអាមេរិកចែងថា “គ្មានបុគ្គលណាម្នាក់អាចកាន់តំណែងជាប្រធានាធិបតីលើសពី២អាណត្តិនោះទេ”។ ក្នុងករណីលោក ត្រាំ មានបំណងធ្វើ វិសោធនកម្មលើរដ្ឋធម្មនុញ្ញ នោះលោកត្រូវការសេចក្តីអនុម័តយល់ព្រមសំ៉ឡេងពីរភាគបីពីព្រឹទ្ធសភា និងសភាតំណាង និងត្រូវការសំឡេងគាំទ្រចំនួនបីភាគបួនពីរដ្ឋបាលថ្នាក់រដ្ឋសរុបចំនួន៥០រដ្ឋ។

បច្ចុប្បន្ន គណបក្សសាធារណរដ្ឋរបស់លោក ដូណាល់ ត្រាំ គ្រប់គ្រងសភាទាំង២។ ប៉ុន្តែ គណបក្សសាធារណរដ្ឋមិនមានសំឡេងភាគច្រើននោះទេ។ លើសពីនេះ គណបក្សប្រជាធិបតេយ្យគ្រប់គ្រងរដ្ឋចំនួន១៨ ក្នុងចំណោមរដ្ឋទាំង៥០របស់សហរដ្ឋអាមេរិក។

ទោះជាយ៉ាងណាក្តី ក្រុមអ្នកគាំទ្រមួយចំនួនរបស់លោក ដូណាល់ ត្រាំ នៅតែជឿថា អាចមានវិធីធ្វើឱ្យលោក ត្រាំ ឈរឈ្មោះនៅអាណត្តិទី៣។

ក្រុមអ្នកគាំទ្រលោក ត្រាំ អះអាងថា រដ្ឋធម្មនុញ្ញមានចន្លោះប្រហោង ព្រោះវិសោធនកម្មរដ្ឋធម្មនុញ្ញលើកទី២២កាលពីឆ្នាំ១៩៥១ គ្រាន់តែហាមប្រាមបុគ្គលម្នាក់មិនឱ្យជាប់ឆ្នោតជាប្រធានាធិបតីអាមេរិកលើសពី២ដង។ ប៉ុន្តែ រដ្ឋធម្មនុញ្ញមិនបានហាមឃាត់មិនឱ្យបុគ្គលណាម្នាក់ក្លាយជាប្រធានាធិបតីតាមរយៈការស្នងតំណែងនោះទេ។

តាមរយៈទ្រឹស្ដីនេះ លោក ត្រាំ អាចឈរឈ្មោះជាអនុប្រធានាធិបតីដើម្បីប្រកួតប្រជែងជាមួយបេក្ខជនម្នាក់ទៀតក្នុងការបោះឆ្នោតនៅឆ្នាំ២០២៨ ឬក៏អាចប្រហែលជាលោក JD Vance អនុប្រធានាធិបតីអាមេរិកក្រោមរដ្ឋបាលលោក ត្រាំ នាពេលបច្ចុប្បន្ន។

ប្រសិនបើគណបក្សសាធារណៈរដ្ឋឈ្នះ បេក្ខជនប្រធានាធិបតីជាប់ឆ្នោតអាចនឹងត្រូវស្បថចូលសេតវិមាន ហើយលាលែងពីតំណែងភ្លាមៗ ដោយអនុញ្ញាតឱ្យលោក ត្រាំ មានឱកាសស្នងតំណែងជាប្រធានាធិបតីនៅអាណត្តិទី៣។

លោក Andy Ogles តំណាងរាស្ត្រសហរដ្ឋអាមេរិកមកពីបក្សសាធារណៈរដ្ឋ បានអំពាវនាវឱ្យមានវិសោធនកម្មរដ្ឋធម្មនុញ្ញដើម្បីបើកផ្លូវអនុញ្ញាតឱ្យប្រធានាធិបតីអាចកាន់តែតំណែងចំនួន៣អាណត្តិ ដរាបណាប្រធានាធិបតីរូបនោះមិនបានជាប់ឆ្នោតចំនួន២អាណត្តិដំបូងជាប់ៗគ្នា។

ប្រសិនបើសំណើរបស់លោក Andy Ogles ទទួលបានជោគជ័យ នេះមានន័យថា មានតែលោក ដូណាល់ ត្រាំ ប៉ុណ្ណោះ ដែលមានសិទ្ធិបន្តកាន់តំណែងជាប្រធានាធិបតីនៅអាណត្តិទី៣។ លោក ត្រាំ បានឈ្នះឆ្នោតនៅឆ្នាំ២០១៦ ហើយចាញ់នៅឆ្នាំ២០២០ និងបានជាប់ឆ្នោតម្តងទៀតនៅឆ្នាំ២០២៤។នេះមានន័យថា លោក ត្រាំ កាន់តំណែងជាប្រធានាធិបតីចំនួន២អាណត្តិមិនជាប់គ្នា។

ផ្ទុយទៅវិញ អតីតប្រធានាធិបតីអាមេរិកលោក Barack Obama លោក Bill Clinton និងលោក George W Bush ដែលបានកាន់តំណែងចំនួន២អាណត្តិជាប់ៗគ្នា នឹងមិនអាចត្រឡប់មកធ្វើជាប្រធានាធិបតីនៅអាណត្តិទី៣បានទេ៕ប្រភព: BBC៕

ដោយ: គង់ លាងហួរ
ភ្នំពេញ: តំបន់រដ្ឋបាលពិសេសហុងកុងក្លាយជាគោលដៅជើងហោះហើរត្រង់ទី៤ របស់ក្រុមហ៊ុនអាកាសចរណ៍ Cambodia Airways ឆ្ពោះទៅកាន់តំបន់សេដ្ឋកិច្ចពិសេសក្វាងទុង-ហុងកុង-ម៉ាកាវ បន្ទាប់ពីបានបើកជើងហោះហើរភ្នំពេញ-ម៉ាកាវ ភ្នំពេញ-សុិនជិន និងភ្នំពេញ-ក្វាងចូវ។

បច្ចុប្បន្ននេះ បណ្តាញជើងហោះហើររបស់ក្រុមហ៊ុនអាកាសចរណ៍ Cambodia Airways គ្របដណ្តប់លើទីក្រុងធំៗទាំង៤ នៃតំបន់ Greater Bay Area របស់ប្រទេសចិន។

តំបន់ Greater Bay Area ជាតំបន់មួយក្នុងចំណោមតំបន់សេដ្ឋកិច្ចពិសេសធំបំផុតរបស់ប្រទេសចិន និងជាមជ្ឈមណ្ឌលនាំចេញដ៏សំខាន់សម្រាប់ប្រទេសនេះ។ ក្នុងឋានៈជាទីក្រុង និងមជ្ឈមណ្ឌលអាកាសចរណ៍អន្តរជាតិដ៏ល្បីល្បាញមួយ ទីក្រុងហុងកុងបានដើរតួនាទីយ៉ាងសំខាន់ក្នុងតំបន់។

ទន្ទឹមនឹងនោះ កម្ពុជាកំពុងប្រែក្លាយជាប្រទេសដែលមានសេដ្ឋកិច្ចរីកចម្រើនលឿនបំផុតនៅក្នុងតំបន់អាស៊ាន និងជាចំណុចសំខាន់នៃគំនិតផ្តួចផ្តើមខ្សែក្រវ៉ាត់ និងផ្លូវ(BRI)។ ក្នុងរយៈពេលប៉ុន្មានឆ្នាំថ្មីៗនេះ កម្ពុជាបានក្លាយជាគោលដៅទាក់ទាញការវិនិយោគរបស់អ្នកធុរកិច្ចចិននៅក្រៅប្រទេស។

ពិធីសម្ពោធជើងហោះហើរលើកដំបូងរបស់ក្រុមហ៊ុនអាកាសចរណ៍ Cambodia Airways ពីរាជធានីភ្នំពេញទៅកាន់ទីក្រុងហុងកុងត្រូវបានប្រារព្ធឡើងប្រកបដោយជោគជ័យនៅអាកាសយានដ្ឋានអន្តរជាតិហុងកុងនៅថ្ងៃទី១ ខែមេសា។

ការបើកផ្លូវហោះហើរភ្នំពេញ-ហុងកុង ថ្មីរបស់ក្រុមហ៊ុន Cambodia Airways នឹងមិនត្រឹមតែផ្តល់ភាពងាយស្រួលដល់អ្នកដំណើរក្នុងគោលបំណងធ្វើធុរកិច្ចប៉ុណ្ណោះទេ។ ប៉ុន្តែ វាថែមទាំងជួយសម្រួលដល់ការពង្រឹងកិច្ចសហប្រតិបត្តិការឧស្សាហកម្ម និងលើកកម្ពស់ការអភិវឌ្ឍន៍សេដ្ឋកិច្ច និងការដោះដូរពាណិជ្ជកម្មរវាងទីក្រុងទាំងពីរផងដែរ។

ម៉្យាងវិញទៀត ភ្ញៀវទេសចរណ៍ហុងកុងក៏នឹងមានជម្រើសធ្វើដំណើរប្រសើរជាងមុនទៅកាន់ប្រទេសកម្ពុជា ដែលពួកគេអាចស្វែងយល់ពីទំនៀមទម្លាប់ និងវប្បធម៌ខ្មែរ និងទស្សនាតំបន់ប្រវត្តិសាស្ត្ររបស់ប្រទេសកម្ពុជា៕ប្រភព: Yahoo៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនាព្រឹកថ្ងៃពុធនេះ ខណៈក្រុមអ្នកវិនិយោគបានសម្រុកងាកទៅទិញមាសទុក ស្របពេលមានភាពមិនច្បាស់លាស់នានា ដែលកើតចេញពីគោលនយោបាយដំឡើងពន្ធរបស់សហរដ្ឋអាមេរិក។

តួយ៉ាង តម្លៃមាស Spot Gold បានងើបឡើង០,៤៨ភាគរយដល់៣១២៥,៣៥ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៣៥ភាគរយដល់៣១៥៧,១០ដុល្លារក្នុងមួយអោនគិតត្រឹមម៉ោង១០:៥៤នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៥៨,៨ភាគរយ ដែលធនាគារកណ្តាលអាមេរិក (Fed) នឹងអាចទម្លាក់អត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះមកនៅត្រឹម១០៤,២០ពិន្ទុនាព្រឹកថ្ងៃពុធនេះ បន្ទាប់ពីបានបិទការជួញដូរត្រឹម១០៤,២៦ពិន្ទុកាលពីថ្ងៃអង្គារម្សិលមិញ។

ចំណែក តម្លៃលោហៈធាតុប្រាក់ Spot silver បានងើបឡើង០,៥៩ភាគរយដល់៣៤,៥១ដុល្លារក្នុងមួយអោន ខណៈតម្លៃផ្លាទីនបានងើបឡើង០,៤២ភាគរយដល់១០០៨,៨ដុល្លារក្នុងមួយអោន ហើយតម្លៃ palladium បានងើបឡើង០,៣៧ភាគរយដល់១០០៤,៥ដុល្លារក្នុងមួយអោនគិតត្រឹមម៉ោង១០:៥៦នាទីព្រឹក៕

ដោយ: គង់ លាងហួរ
អន្តរជាតិ: ក្រុមហ៊ុនប្រឹក្សាអចលនទ្រព្យ ​​Colliers បានអះអាងថា តំបន់អាស៊ីប៉ាស៊ីហ្វិកនៅតែជាប្រភពដ៏សំខាន់មួយនៃលំហូរមូលធនពិភពលោក ដែលបានហូរចូលទៅកាន់ប្រទេស និងទីក្រុងធំៗចំនួន៥ រួមមាន ប្រទេសសិង្ហបុរី ទីក្រុងហុងកុង ប្រទេសជប៉ុន និងចិនដីគោក។

យោងតាមរបាយការណ៍លំហូរមូលធនសកលប្រចាំខែមីនា ឆ្នាំ២០២៥ របស់ក្រុមហ៊ុន Colliers បានបង្ហាញថា តំបន់អាស៊ីប៉ាស៊ីហ្វិកបានទាក់ទាញការវិនិយោគយ៉ាងច្រើនក្នុងរយៈពេល២៤ខែចុងក្រោយនេះ ដោយឆ្លុះបញ្ចាំងពីភាពទាក់ទាញនៃការវិនិយោគក្នុងតំបន់ និងដើមទុនហូរចូលទៅក្នុងវិស័យអចលនទ្រព្យ។

លោក Chris Pilgrim នាយកគ្រប់គ្រងក្រុមហ៊ុន Global Capital Markets ប្រចាំតំបន់អាស៊ីប៉ាស៊ីហ្វិក បានលើកឡើងថា “ក្នុងនាមជាមជ្ឈមណ្ឌលមូលធនសកល ភាពទាក់ទាញនៃការវិនិយោគចូលមកកាន់តំបន់អាស៊ីប៉ាស៊ីហ្វិកជារឿងមិនអាចប្រកែកបានឡើយ”។

លោកបានអះអាងបន្តថា “លំហូរទុនវិនិយោគធំៗចូលទៅកាន់ទីផ្សារសំខាន់ៗដូចជាការិយាល័យ ឧស្សាហកម្ម និងការលក់រាយ បានបន្តធ្វើឱ្យតំបន់នេះនាំមុខគេក្នុងការវិនិយោគឆ្លងដែន។កត្តាទីតាំងយុទ្ធសាស្រ្ត និងការកើនឡើងនូវឥទ្ធិពលបានធ្វើឱ្យតំបន់អាស៊ីប៉ាស៊ីហ្វិកដើរតួនាទីយ៉ាងសំខាន់ក្នុងការកំណត់ទិដ្ឋភាពវិនិយោគសកល”។

តំបន់អាស៊ីប៉ាស៊ីហ្វិកបានបន្តនាំមុខគេក្នុងការទាក់ទាញលំហូរទុនវិនិយោគមកពីជុំវិញពិភពលោក ខណៈគោលដៅនៃការវិនិយោគលេចធ្លោជាងគេបំផុតចំនួន៧ រួមមាន ប្រទេសចិន ប្រទេសសិង្ហបុរី ប្រទេសអូស្ត្រាលី ប្រទេសឥណ្ឌា ប្រទេសម៉ាឡេស៊ី ប្រទេសវៀតណាម និងប្រទេសជប៉ុន។

លោក Pilgrim បានបញ្ជាក់ថា “ការណ៍នេះសរបង្ហាញឱ្យឃើញពីភាពទាក់ទាញរបស់តំបន់អាស៊ីប៉ាស៊ីហ្វិក ក្នុងឋានៈជាមជ្ឈមណ្ឌលធុរកិច្ចសម្រាប់បណ្តាអ្នកវិនិយោគ ដែលស្វែងរកឱកាសក្នុងការអភិវឌ្ឍន៍ដីធ្លី និងហេដ្ឋារចនាសម្ព័ន្ធ”៕ប្រភព: Real Estate Asia៕

ដោយ: គង់ លាងហួរ
អន្តរជាតិ: សេដ្ឋកិច្ចរបស់ប្រទេសជប៉ុនអាចប្រឈមមុខនឹងការខាតបង់គិតជាទំហំទឹកប្រាក់ចំនួន១,៨១ទ្រីលានដុល្លារអាមេរិក ប្រសិនបើគ្រោះរញ្ជួយដីទ្រង់ទ្រាយធំពិតជាកើតមានឡើងដូចការព្យាករណ៍ទុកជាយូរនៅតំបន់ឆ្នេរសមុទ្រប៉ាស៊ីហ្វិកក្នុងប្រទេសជប៉ុន។

ក្នុងករណី ការព្យាករណ៍ក្លាយជាការពិត នោះគ្រោះរញ្ជួយដីនេះអាចបង្កឱ្យមានរលកយក្សស៊ូណាមិ ដែលធ្វើឱ្យអគាររាប់រយខ្នងដួលរលំ និងអាចសម្លាប់អាយុជីវិតមនុស្សប្រមាណ៣០០.០០០នាក់។នេះបើយោងតាមរបាយការណ៍សិក្សារបស់រដ្ឋាភិបាលជប៉ុន។

របាយការណ៍របស់ការិយាល័យគណៈរដ្ឋមន្ត្រីបានបញ្ជាក់ឱ្យដឹងថា ការព្យាករណ៍ថ្មីលើការខាតបង់ផ្នែកសេដ្ឋកិច្ចចំនួន២៧០,៣ទ្រីលានយ៉េន ឬស្មើនឹងជិតពាក់កណ្តាលនៃផលទុនជាតិសរុបរបស់ប្រទេសជប៉ុន បើធៀបនឹងការព្យាករណ៍ពីមុនត្រឹមតែ២១៤,២ទ្រីលានយ៉េន។

ការព្យាករណ៍ថ្មីនេះបានប្រមូលធាតុចូលផ្សេងៗបន្ថែមទៀតរួមមានដូចជា សម្ពាធអតិផរណា និងការធ្វើបច្ចុប្បន្នភាពលើទិន្នន័យដី ដែលអាចរងការជន់លិចដោយសារទឹកជំនន់ នៅពេលរលកយក្សស៊ូណាមិបក់បោកខ្លាំង។

ប្រទេសជប៉ុនជាប្រទេសមួយក្នុងចំណោមបណ្តាប្រទេសដែលងាយរងគ្រោះនឹងការរញ្ជួយដីបំផុតនៅលើពិភពលោក។

រដ្ឋាភិបាលជប៉ុនបានព្យាករណ៍ថា មានប្រូបាប៊ីលីតេប្រមាណ៨០ភាគរយ ដែលគ្រោះរញ្ជួយដីកម្រិត៨ រុិចទ័រទៅ៩ រ៉ិចទ័រអាចកើតមានឡើងនៅស្រទាប់ដីក្រោមបាតសមុទ្រដ៏ជ្រៅ ឬហៅថា ជា “Nankai Trough”។

កម្លាំងនៃការរញ្ជួយដីកម្រិត៩ រ៉ិចទ័រ នឹងបង្ខំឱ្យមានជប៉ុនត្រូវជម្លៀសមនុស្សចំនួន១,២៣លាននាក់ ឬស្មើនឹង១០ភាគរយនៃចំនួនប្រជាជនសរុបរបស់ជប៉ុន។ តំបន់ឆ្នេរសមុទ្រប៉ាស៊ីហ្វិកស្ថិតនៅភាគនិរតីនៃប្រទេសជប៉ុនអាចជួបគ្រោះរញ្ជួយដីកម្រិតធ្ងន់ធ្ងរប្រហែល១ដងក្នុងរយៈពេលពី១០០ឆ្នាំទៅ១៥០ឆ្នាំ។

របាយការណ៍ខាងលើបានបង្ហាញទៀតថា មនុស្សប្រមាណ២៩៨.០០០នាក់អាចស្លាប់ ដោយសាររលកយក្សស៊ូណាមិ និងការដួលរលំអគារ ប្រសិនបើការរញ្ជួយដីកើតមានឡើងនៅពេលយប់ក្នុងអំឡុងរដូវរងារ៕ប្រភព: Reuters៕

ដោយ: គង់ លាងហួរ
ភ្នំពេញ: ឥទ្ធិពលពីភាពមិនប្រាកដប្រជានៃភូមិសាស្ត្រនយោបាយ ដែលបង្កឡើងដោយការប្រកួតប្រជែងគ្នារវាងប្រទេសចិន និងសហរដ្ឋអាមេរិកបានលេចចេញជារូបរាងកាន់តែច្បាស់ តាមរយៈផែនការនៃការធ្វើពិពិធកម្មខ្សែសង្វាក់ផ្គត់ផ្គង់ចេញពីប្រទេសចិនទៅកាន់គោលដៅផ្សេង។

ស្ថានការណ៍ដ៏តានតឹងនេះបានក្លាយជាក្តីព្រួយបារម្ភដ៏ធំនៅឆ្នាំ២០២៥សម្រាប់បណ្តាក្រុមហ៊ុនអន្តរជាតិនានា ដែលមានមូលដ្ឋានផលិតកម្មនៅប្រទេសចិន ខណៈការស្វែងរកទីតាំងផលិតកម្មថ្មីមកជំនួស ក៏ជួបការលំបាក។

ប៉ុន្តែ បញ្ហានេះបានក្លាយជាឱកាសសម្រាប់បណ្តាប្រទេសនានាក្នុងតំបន់អាស៊ាន។ជាក់ស្តែង បណ្តាក្រុមហ៊ុននានាបានបង្ហាញពីចំណាប់អារម្មណ៍ពិសេសលើការផ្លាស់ប្តូរទីតាំងផលិតកម្មចេញពីចិនឆ្ពោះមកកាន់ប្រទេសកម្ពុជា វៀតណាម និងប្រទេសបង់ក្លាដែស។

លោក Mark Burstein មន្ត្រីជាន់ខ្ពស់នៃក្រុមហ៊ុនជំនាញផ្នែកបច្ចេកវិទ្យាគ្រប់គ្រងខ្សែសង្វាក់ផ្គត់ផ្គង់ Inspectorio បានអះអាងថា “ប្រទេសកម្ពុជា វៀតណាម និងបង់ក្លាដែសមានហេដ្ឋារចនាសម្ព័ន្ធ ដែលអាចបម្រើដល់វិស័យផលិតកម្មរួចស្រាប់។នេះអាចជាមូលហេតុមួយនាំឱ្យប្រទេសទាំង៣ក្លាយជាទីចាប់អារម្មណ៍”។

យ៉ាងណាមិញ បើទោះបីជាក្រុមហ៊ុនទាំងនោះបានធ្វើពិពិធកម្ម ឬចុះកិច្ចព្រមព្រៀងជាមួយបណ្តាក្រុមហ៊ុនក្នុងស្រុករបស់អាស៊ានយ៉ាងណាក្តី ក៏គេមិនប្រាកដថា នេះជាដំណោះស្រាយល្អឥតខ្ចោះនោះដែរ ព្រោះទំនិញអាស៊ានដែលនាំចូលទៅកាន់សហរដ្ឋអាមេរិកនៅតែអាចទទួលរងការដំឡើងពន្ធថ្មីបន្ថែមពីសំណាក់រដ្ឋបាលលោកប្រធានាធិបតី ដូណាល់ ត្រាំ។

គិតរហូតមកដល់ពេលនេះ បណ្តាប្រទេសនៅតំបន់អាស៊ាន ជាមេដែកស្រូបទាញបណ្តាក្រុមហ៊ុនម៉ាយីហោល្បីៗ និងក្រុមហ៊ុនលក់រាយ ដែលបានចាកចេញពីចិន។ ការស្ទង់មតិបង្ហាញថា ថ្នាក់ដឹកនាំប្រតិបត្តិ​ចំនួន៤នាក់​ក្នុង​ចំណោមថ្នាក់ដឹកនាំប្រតិបត្តិ​ចំនួន១០នាក់​បាន​បង្វែរ​ចំណាប់អារម្មណ៍​មកកាន់តំបន់អាស៊ាន៕ប្រភព: Yahoo៕