ដោយៈ គង់ សូរិយា

    ភ្នំពេញៈ រដ្ឋាភិបាលគ្រោងនឹងរៀបចំសួនច្បារ នៅតាមតំបន់ទីប្រជុំជនសំខាន់ៗ ដើម្បីលើកកំពស់សោភ័ណភាពផង និងលើកស្ទួយសុខមាលភាពប្រជាពរដ្ឋផង។

    ក្រោមការដឹកនាំរបស់សម្តេចមហាបវរធិបតីហ៊ុន ម៉ាណែតនាយក​រដ្ឋមន្រ្តីនៃកម្ពុជាបាន និងកំពុងឲ្យក្រុមការងារអន្តរក្រសួង ដើម្បីពិភា​ក្សាពីផែនការចំណាយ លើការសាងសង់ហេដ្ឋារចនាសម្ព័ន្ឋទាំងអស់នេះ។

    មន្រ្តីជាន់ខ្ពស់មួយរូបនៃក្រសួងរៀបចំដែនដី នគរូបនីយកម្ម និងសំណង់ ដែលបានចូលរួមកិច្ចប្រជុំទាក់ទងនឹងបញ្ហានេះ នៅក្រសួង​សេដ្ឋកិច្ច និងហិរញ្ញវត្ថុបានមានប្រសាសន៍ឲ្យដឹង ក្នុងលក្ខខ័ណ្ឌមិនបញ្ចេញឈ្មោះថា ស្របពេលជំងឺមិនឆ្លងកំពុងកើនឡើងនៅកម្ពុជា រដ្ឋាភិបាល បាននិងកំពុងយកចិត្តទុកដាក់លើសុខមាលភាពសង្គម តាមរយៈការវិភាគជន៍ថវិកាជាតិមួយចំនួន ដើម្បីកសាងហេដ្ឋារចនាសាធារណៈសម្ព័ន្ឋនានា។

    លោកបន្តថា “បច្ចុប្បន្នប្រជាពលរដ្ឋកម្ពុជាប្រមាណ១លាននាក់ បាននិងកំពុងកើតជំងឺទឹកនោមផ្អែម ដែលពួកគាត់ត្រូវចំណាយប្រាក់ប្រមាណ៥០លានដុល្លារ ដើម្បីពិនិត្យ និងថែរទាំសុខភាពរបស់ពួកគាត់”។ លោកបន្តថា “នេះជាជំងឺមិនឆ្លងទឹកនោមផ្អែម ដោយមិនគិតពីជំងឺលើសម្ពាធឈាម និងជំងឺដៃទៀតឡើយ”។

    មន្រ្តីដដែលបានបន្តថា រដ្ឋាភិបាលគ្រោងកាត់បន្ថយការចំណាយ និងលើកកំពស់សុខមាលភាពប្រជាពលរដ្ឋ ដែលឲ្យពួកគេមានកន្លែងលំហែរ ហាត់ប្រាណ នឹងធ្វើឲ្យពួកគេកាត់បន្ថយជំងឺទាំងនោះ និងកាត់បន្ថយបញ្ហាសុខភាពបន្ថែមទៀត ហេតុនេះការវិនិយោគមួយឆ្នាំត្រឹម៥០លានដុល្លារពីរដ្ឋាភិបាល មិនមានអ្វីជាបញ្ហាឡើយ៕

ដោយៈ គង់ សូរិយា

    ភ្នំពេញៈ ក្រុមមន្រ្តីបានបើកកិច្ចប្រជុំគណៈកម្មការ ត្រៀមរៀបចំពិធីសម្ពោធឱ្យប្រើប្រាស់ជាផ្លូវការ ផ្លូវជាតិលេខ៧១សេ ក្រោមក្រប​ខ័ណ្ឌហិរញ្ញប្បទានសហប្រតិបត្តិការពីរដ្ឋាភិបាល នៃសាធារណរដ្ឋប្រជាមានិតចិន។

កិច្ចប្រជុំនេះដឹកនាំដោយលោកខាន់ ម៉ាណេរ រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណ:កម្មការ បានអញ្ជើញដឹកនាំកិច្ចប្រជុំគណៈកម្មការ ត្រៀមរៀបចំពិធីសម្ពោធឱ្យប្រើប្រាស់ជាផ្លូវការផ្លូវជាតិលេខ៧១សេ ក្រោមក្របខ័ណ្ឌហិរញ្ញប្បទានសហប្រតិបត្តិការពីរដ្ឋាភិបាល នៃសាធារណរដ្ឋប្រជាមានិតចិន ដោយមានការអញ្ជើញចូលរួមពីថ្នាក់ដឹកនាំក្រសួង សមាជិក សមាជិកាគណៈកម្មការ  អនុគណៈកម្មការត្រៀមរៀបចំពិធីសម្ពោធ មន្ត្រីជំនាញបច្ចេកទេសពាក់ព័ន្ធក្រោមឱវាទ ក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេកទេស ផងដែរ ។

កិច្ចប្រជុំធ្វើឡើងដើម្បីពិនិត្យទៅលើវឌ្ឈនភាព នៃការរៀបចំរបស់អនុគណៈកម្មការទទួលបន្ទុកនីមួយៗ ដែលបានត្រូវចាត់តាំងឱ្យបំពេ​ញភារកិច្ចរៀងៗខ្លួន សំដៅធានាឱ្យដំណើរការរៀបចំពិធីសម្ពោធប្រព្រឹត្តទៅដោយរលូន និងទទួលលទ្ធផលខ្ពស់តាមផែនការ ដែលបានគ្រោងទុក។

គម្រោងសាងសង់ផ្លូវជាតិលេខ៧១សេ មានប្រវែងសរុប ១១៤,៩៩គីឡូម៉ែត្រ គ្រោងនឹងសម្ពោធដាក់ឱ្យប្រើប្រាស់នាពេលឆាប់ៗខាងមុខនេះ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕

ដោយៈ គង់ សូរិយា

    ភ្នំពេញៈ ជាដំណឹងរីករាយមួយ សម្រាប់ប្រជាពលរដ្ឋនៅតំបន់ទួលគោក ដោយរដ្ឋាភិបាលគ្រោងនឹងរុះរើ “អង់តែន”ទូរទស្សន៍ទួលគោក ទៅកាន់តំបន់ជាយរាជធានីភ្នំពេញ។

    ប្រភពពីមន្រ្តីបានឲ្យដឹងថា រដ្ឋាភិបាលនឹងលើកអង់តែនទូរទស្សន៍ទួលគោក ដើម្បីយកទៅដាក់នៅតំបន់ជាយរាជធានី ជាតំបន់ដែលរដ្ឋាភិបាលនឹងរៀបចំសួនច្បារ និងកន្លែងកំសាន្តសម្រាប់ពលរដ្ឋនៅរាជធានីភ្នំពេញ។

    ទោះបីជាយ៉ាងណា មន្រ្តីរូបនោះមិនបង្ហើបឲ្យដឹងពីតំបន់ដែលត្រូវយកអង់តែនទូរទស្សន៍ទៅដាក់ និងអភិវឌ្ឍន៍នៅតំបន់ណានៅឡើយទេ។ គេហទំព័រPropertyarea.asia នឹងធ្វើបច្ចុប្បន្នភាពព័ត៌មាននេះជូននាពេលឆាប់ៗខាងមុខនេះ។

    មន្រ្តីដដែលបានបញ្ជាក់ឲ្យដឹងថា រដ្ឋាភិបាលគ្រោងវិនិយោគទឹកប្រាក់ប្រមាណ៥០លានដុល្លារ ដើម្បីបង្កើតរមណីយដ្ឋានលំហែរកាយថ្មីមួយ ដើម្បីឲ្យពលរដ្ឋមានកន្លែងលំហែរ និងជម្រុញទាក់ទាញការអភិ​វឌ្ឍនៅជាយរាជធានីភ្នំពេញ។

    ប្រធានសមាគមសហគ្រិនសារព័ត៌មានសេដ្ឋកិច្ចកម្ពុជា លោក  យិន លាងគង់បានមានប្រសាសន៍ឲ្យដឹងជារឿយៗថា តំបន់ជាយរាជធានីភ្នំពេញ ជាតំបន់ដែលងាយទទួលបាន គំរោងអភិវឌ្ឍន៍របស់រដ្ឋាភិបាល ដោយសារជាតំបន់មានមនុស្សរស់នៅច្រើន មានហេដ្ឋារចនាសម្ព័ន្ឋខ្វែងខ្វាត់ ងាយស្រួលរៀបចំអភិវឌ្ឍន៍ មានមនុស្សរស់នៅច្រើន ដែលងាយនឹងទទួលបានការអភិវឌ្ឍផ្នែកនគរូបនីយកម្ម។

    លោកបន្តថា “តំបន់ជាយរាជធានី នៅក្នុងរយៈពេល៥ឆ្នាំខាងមុខ នឹងមានការអភិវឌ្ឍលឿន និងទាក់ទាញ ដែលនឹងធ្វើឲ្យទីផ្សារដីធ្លីកំរើកឡើងវិញយ៉ាងឆាប់រហ័ស”៕

ដោយៈ និស្ស័យ

    កោះកុងៈ លោកសូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានដឹកនាំក្រុមការងារបច្ចេក​ទេ​ស​ក្រសួង  ក្រុមហ៊ុនទីប្រឹក្សាបច្ចេកទេស និងក្រុមហ៊ុនសាងសង់ ចុះពិនិត្យការអនុវត្ត គម្រោងលើកកម្រិតគុណភាពផ្លូវជាតិលេខ៤៨។

ការចុះពិនិត្យនេះ ដើម្បីពិនិត្យមើលវឌ្ឍនភាពការងារគម្រោង ដោយក្នុងនោះបានធ្វើការពិនិត្យឆែកកម្រាស់ និងការបង្ហាប់ស្រទាប់កៅស៊ូ AC (ខួង និងពិសោធន័៍) និងចុះពិនិត្យទីតាំងដំឡើងផ្លាក “អរគុណសន្តិភាព” បន្ទាប់មកលោករដ្ឋលេខាធិការ បានបន្តអញ្ជើញដឹកនាំកិច្ចប្រជុំពិភាក្សា ដើម្បីពិនិត្យមើលវឌ្ឍនភាពគម្រោង និងការងារនូវសល់មួយចំនួន។

ឆ្លៀតក្នុងឱកាសនោះ លោករដ្ឋលេខាធិការ ក៏បានណែនាំទៅដល់ក្រុមការងារបច្ចេកទេសសាងសង់ទាំងអស់ ពិនិត្យបន្ថែមលើគ្រឿងបរិក្ខារសុវត្ថិភាពចរាចរណ៍ និងប្រព័ន្ធបង្ហូររំដោះទឹកភ្លៀង នៅតាមទីតាំងមួយចំនួនដែលងាយនឹងរងគ្រោះ និងឱ្យបន្តយកចិត្តទុកដាក់ និងខិតខំអនុវត្តការងារសម្រេចឱ្យបាន តាមផែនការដែលបានគ្រោងទុក ប្រកបដោយគុណភាពផងដែរ។

គិតត្រឹមដើមខែមេសា ឆ្នាំ ២០២៥ គម្រោងលើកកម្រិតគុណភាពផ្លូវជាតិលេខ៤៨នេះ បានសម្រេចវឌ្ឍនភាពការងាររបស់ខ្លួនប្រមាណ៩៤.៣០% និងគ្រោងបញ្ចប់ការងារសាងសង់ នៅរដូវប្រាំងនេះហើយ៕

ភ្នំពេញ ថ្ងៃទី០២ ខែមេសា ឆ្នាំ២០២៥៖ ធនាគារ ហត្ថា ម.ក ដែលជាក្រុមហ៊ុនបុត្រសម័្ពន្ធរបស់ ធនាគារ ក្រុងស្រ៊ី ដែលជាធនាគារពាណិជ្ជធំជាងគេលំដាប់ទី៥ នៅក្នុងប្រទេសថៃ និងជាសមាជិកនៃសម្ព័ន្ធហិរញ្ញវត្ថុអន្តរជាតិ MUFG មានកិត្តិយសប្រកាសផលិតផលហិរញ្ញវត្ថុថ្មី គឺ ផលិតផលឥណទាន ”MyQuickCash” ដែលរចនាឡើងដើម្បីផ្តល់ឱ្យអតិថិជននូវភាពងាយស្រួល រហ័ស និង មិនត្រូវការទ្រព្យធានា។ ការនាំមកនូវផលិតផលនេះ បង្ហាញពីការប្តេជ្ញាចិត្តរបស់ ធនាគារ ហត្ថា ក្នុងការផ្តល់ដំណោះស្រាយហិរញ្ញវត្ថុដែលមានលក្ខណៈបត់បែន បំពេញតម្រូវជាក់ស្តែង និង ទាន់សម័យកាល។

ឥណទាន MyQuickCash គឺជាជម្រើសឥណទានដែលរហ័ស និងងាយស្រួល ហើយអាចជួយអតិថិជនក្នុងការបំពេញតម្រូវការហិរញ្ញវត្ថុផ្ទាល់ខ្លួន ដូចជាការកែលម្អផ្ទះ ការវិនិយោគអាជីវកម្ម និង ចំណាយផ្សេងៗទៀត ជាមួយនឹងអត្រាការប្រាក់ប្រកួតប្រជែង ជាពិសេសដំណើរការដាក់ពាក្យងាយស្រួល និងលក្ខខណ្ឌសងប្រាក់បត់បែន។ អតិថិជនមិនតម្រូវឲ្យមានទ្រព្យធានា មានត្រឹមលិខិតបញ្ជាក់ប្រាក់បៀវត្សដែលមានប្រាក់ចំណូលថេរ ហើយកាន់តែពិសេសនោះ អ្នកស្នាក់នៅបន្ទប់ជួលក៏អាចស្នើកម្ចីនេះបាន។ តម្រូវការបស់លោកអ្នក គឺផ្នែកមួយសំខាន់របស់ធនាគារ ហត្ថា ក្នុងការបង្កើតផលិតផលដែលសមស្រប ទៅតាមប្រភេទតម្រូវការរបស់អ្នក។

សម្រាប់ព័ត៌មានបន្ថែម ចូលទៅកាន់: https://www.hatthabank.com/km/page/myquickcashkh

បំពេញពាក្យស្នើសុំឥណទាន MyQuickCash ទីនេះ: http://bit.ly/3hcRijC

អំពី ធនាគារ ហត្ថា

ធនាគារ ហត្ថា ជាធនាគារពាណិជ្ជ ដែលមានវត្តមាននៅក្នុងព្រះរាជាណាចក្រកម្ពុជាអស់រយៈកាល ៣០ឆ្នាំមកហើយ ផ្តល់ជូនសេវាហិរញ្ញវត្ថុយ៉ាងទូលំទូលាយ ដល់អតិថិជនរបស់ខ្លួន។ ក្នុងនាមជាបុត្រសម្ព័ន្ធរបស់ធនាគារ ក្រុងស្រ៊ី ធនាគារ ហត្ថា មានមោទនភាពក្នុងការប្រកាសជាផ្លូវការបើកធនាគារ ហត្ថា ថៅវើ ដែលទើបបញ្ចប់គម្រោងសាងសង់ជាស្ថាពរ ដែលមានអាសយដ្ឋាននៅលើមហាវិថីសម្តេចតេជោ ហ៊ុនសែន (ផ្លូវ៦០ម៉ែត្រ) នៅក្នុងរាជធានីភ្នំពេញ។ សូមបញ្ជាក់ថាធនាគារ ហត្ថា បានទទួលការវាយតម្លៃជាស្ថាប័នមានស្ថិរភាពហិរញ្ញវត្ថុរឹងមាំ តាមរយៈការរក្សាបាននូវចំណាត់ថ្នាក់ BBB+ អស់រយៈពេល ០៦ឆ្នាំជាប់គ្នា ពីក្រុមហ៊ុន TRIS Rating ដែលចំណាត់ថ្នាក់នេះសបញ្ជាក់ឱ្យឃើញថា ធនាគារ ហត្ថា មានដំណើរការមុខជំនួញរបស់ខ្លួនប្រកបដោយស្ថិរភាព និងឈរជើងឈានមុខគេនៅក្នុងទីផ្សារហិរញ្ញវត្ថុ កម្ពុជា។ បន្ថែមជាងនេះទៅទៀត ធនាគារ ហត្ថា ទទួលបានការគាំទ្រយ៉ាងពេញទំហឹងពីសំណាក់ធនាគារ ក្រុងស្រ៊ី ដែលជាធនាគារអាណាព្យាបាលរបស់ខ្លួន ដែលរួមចំណែកជំរុញឱ្យធនាគារ ហត្ថា មានធនធានគ្រប់គ្រាន់ និងមានភាពរឹងមាំយ៉ាងខ្លាំងផ្នែកហិរញ្ញវត្ថុ ក្នុងការបន្តប្រតិបត្តិការអាជីវកម្មរបស់ខ្លួនជាធម្មតា។

ដោយ: គង់ លាងហួរ
អន្តរជាតិ: លោក ដូណាល់ ត្រាំ ដែលកំពុងកាន់តំណែងជាប្រធានាធិបតីអាមេរិកសម្រាប់អាណត្តិទី២នេះ បាន​អះអាង​ថា លោក​មិន​និយាយ​លេង​សើចទេ​អំពី​ការ​ចង់​កាន់​តំណែង​ជា​ប្រធានាធិបតី​សហរដ្ឋ​អាមេរិក​នៅអាណត្តិ​ទី​៣បន្តទៀត។

យោងតាមរដ្ឋធម្មនុញ្ញរបស់សហរដ្ឋអាមេរិកចែងថា “គ្មានបុគ្គលណាម្នាក់អាចកាន់តំណែងជាប្រធានាធិបតីលើសពី២អាណត្តិនោះទេ”។ ក្នុងករណីលោក ត្រាំ មានបំណងធ្វើ វិសោធនកម្មលើរដ្ឋធម្មនុញ្ញ នោះលោកត្រូវការសេចក្តីអនុម័តយល់ព្រមសំ៉ឡេងពីរភាគបីពីព្រឹទ្ធសភា និងសភាតំណាង និងត្រូវការសំឡេងគាំទ្រចំនួនបីភាគបួនពីរដ្ឋបាលថ្នាក់រដ្ឋសរុបចំនួន៥០រដ្ឋ។

បច្ចុប្បន្ន គណបក្សសាធារណរដ្ឋរបស់លោក ដូណាល់ ត្រាំ គ្រប់គ្រងសភាទាំង២។ ប៉ុន្តែ គណបក្សសាធារណរដ្ឋមិនមានសំឡេងភាគច្រើននោះទេ។ លើសពីនេះ គណបក្សប្រជាធិបតេយ្យគ្រប់គ្រងរដ្ឋចំនួន១៨ ក្នុងចំណោមរដ្ឋទាំង៥០របស់សហរដ្ឋអាមេរិក។

ទោះជាយ៉ាងណាក្តី ក្រុមអ្នកគាំទ្រមួយចំនួនរបស់លោក ដូណាល់ ត្រាំ នៅតែជឿថា អាចមានវិធីធ្វើឱ្យលោក ត្រាំ ឈរឈ្មោះនៅអាណត្តិទី៣។

ក្រុមអ្នកគាំទ្រលោក ត្រាំ អះអាងថា រដ្ឋធម្មនុញ្ញមានចន្លោះប្រហោង ព្រោះវិសោធនកម្មរដ្ឋធម្មនុញ្ញលើកទី២២កាលពីឆ្នាំ១៩៥១ គ្រាន់តែហាមប្រាមបុគ្គលម្នាក់មិនឱ្យជាប់ឆ្នោតជាប្រធានាធិបតីអាមេរិកលើសពី២ដង។ ប៉ុន្តែ រដ្ឋធម្មនុញ្ញមិនបានហាមឃាត់មិនឱ្យបុគ្គលណាម្នាក់ក្លាយជាប្រធានាធិបតីតាមរយៈការស្នងតំណែងនោះទេ។

តាមរយៈទ្រឹស្ដីនេះ លោក ត្រាំ អាចឈរឈ្មោះជាអនុប្រធានាធិបតីដើម្បីប្រកួតប្រជែងជាមួយបេក្ខជនម្នាក់ទៀតក្នុងការបោះឆ្នោតនៅឆ្នាំ២០២៨ ឬក៏អាចប្រហែលជាលោក JD Vance អនុប្រធានាធិបតីអាមេរិកក្រោមរដ្ឋបាលលោក ត្រាំ នាពេលបច្ចុប្បន្ន។

ប្រសិនបើគណបក្សសាធារណៈរដ្ឋឈ្នះ បេក្ខជនប្រធានាធិបតីជាប់ឆ្នោតអាចនឹងត្រូវស្បថចូលសេតវិមាន ហើយលាលែងពីតំណែងភ្លាមៗ ដោយអនុញ្ញាតឱ្យលោក ត្រាំ មានឱកាសស្នងតំណែងជាប្រធានាធិបតីនៅអាណត្តិទី៣។

លោក Andy Ogles តំណាងរាស្ត្រសហរដ្ឋអាមេរិកមកពីបក្សសាធារណៈរដ្ឋ បានអំពាវនាវឱ្យមានវិសោធនកម្មរដ្ឋធម្មនុញ្ញដើម្បីបើកផ្លូវអនុញ្ញាតឱ្យប្រធានាធិបតីអាចកាន់តែតំណែងចំនួន៣អាណត្តិ ដរាបណាប្រធានាធិបតីរូបនោះមិនបានជាប់ឆ្នោតចំនួន២អាណត្តិដំបូងជាប់ៗគ្នា។

ប្រសិនបើសំណើរបស់លោក Andy Ogles ទទួលបានជោគជ័យ នេះមានន័យថា មានតែលោក ដូណាល់ ត្រាំ ប៉ុណ្ណោះ ដែលមានសិទ្ធិបន្តកាន់តំណែងជាប្រធានាធិបតីនៅអាណត្តិទី៣។ លោក ត្រាំ បានឈ្នះឆ្នោតនៅឆ្នាំ២០១៦ ហើយចាញ់នៅឆ្នាំ២០២០ និងបានជាប់ឆ្នោតម្តងទៀតនៅឆ្នាំ២០២៤។នេះមានន័យថា លោក ត្រាំ កាន់តំណែងជាប្រធានាធិបតីចំនួន២អាណត្តិមិនជាប់គ្នា។

ផ្ទុយទៅវិញ អតីតប្រធានាធិបតីអាមេរិកលោក Barack Obama លោក Bill Clinton និងលោក George W Bush ដែលបានកាន់តំណែងចំនួន២អាណត្តិជាប់ៗគ្នា នឹងមិនអាចត្រឡប់មកធ្វើជាប្រធានាធិបតីនៅអាណត្តិទី៣បានទេ៕ប្រភព: BBC៕

ដោយ: គង់ លាងហួរ
ភ្នំពេញ: តំបន់រដ្ឋបាលពិសេសហុងកុងក្លាយជាគោលដៅជើងហោះហើរត្រង់ទី៤ របស់ក្រុមហ៊ុនអាកាសចរណ៍ Cambodia Airways ឆ្ពោះទៅកាន់តំបន់សេដ្ឋកិច្ចពិសេសក្វាងទុង-ហុងកុង-ម៉ាកាវ បន្ទាប់ពីបានបើកជើងហោះហើរភ្នំពេញ-ម៉ាកាវ ភ្នំពេញ-សុិនជិន និងភ្នំពេញ-ក្វាងចូវ។

បច្ចុប្បន្ននេះ បណ្តាញជើងហោះហើររបស់ក្រុមហ៊ុនអាកាសចរណ៍ Cambodia Airways គ្របដណ្តប់លើទីក្រុងធំៗទាំង៤ នៃតំបន់ Greater Bay Area របស់ប្រទេសចិន។

តំបន់ Greater Bay Area ជាតំបន់មួយក្នុងចំណោមតំបន់សេដ្ឋកិច្ចពិសេសធំបំផុតរបស់ប្រទេសចិន និងជាមជ្ឈមណ្ឌលនាំចេញដ៏សំខាន់សម្រាប់ប្រទេសនេះ។ ក្នុងឋានៈជាទីក្រុង និងមជ្ឈមណ្ឌលអាកាសចរណ៍អន្តរជាតិដ៏ល្បីល្បាញមួយ ទីក្រុងហុងកុងបានដើរតួនាទីយ៉ាងសំខាន់ក្នុងតំបន់។

ទន្ទឹមនឹងនោះ កម្ពុជាកំពុងប្រែក្លាយជាប្រទេសដែលមានសេដ្ឋកិច្ចរីកចម្រើនលឿនបំផុតនៅក្នុងតំបន់អាស៊ាន និងជាចំណុចសំខាន់នៃគំនិតផ្តួចផ្តើមខ្សែក្រវ៉ាត់ និងផ្លូវ(BRI)។ ក្នុងរយៈពេលប៉ុន្មានឆ្នាំថ្មីៗនេះ កម្ពុជាបានក្លាយជាគោលដៅទាក់ទាញការវិនិយោគរបស់អ្នកធុរកិច្ចចិននៅក្រៅប្រទេស។

ពិធីសម្ពោធជើងហោះហើរលើកដំបូងរបស់ក្រុមហ៊ុនអាកាសចរណ៍ Cambodia Airways ពីរាជធានីភ្នំពេញទៅកាន់ទីក្រុងហុងកុងត្រូវបានប្រារព្ធឡើងប្រកបដោយជោគជ័យនៅអាកាសយានដ្ឋានអន្តរជាតិហុងកុងនៅថ្ងៃទី១ ខែមេសា។

ការបើកផ្លូវហោះហើរភ្នំពេញ-ហុងកុង ថ្មីរបស់ក្រុមហ៊ុន Cambodia Airways នឹងមិនត្រឹមតែផ្តល់ភាពងាយស្រួលដល់អ្នកដំណើរក្នុងគោលបំណងធ្វើធុរកិច្ចប៉ុណ្ណោះទេ។ ប៉ុន្តែ វាថែមទាំងជួយសម្រួលដល់ការពង្រឹងកិច្ចសហប្រតិបត្តិការឧស្សាហកម្ម និងលើកកម្ពស់ការអភិវឌ្ឍន៍សេដ្ឋកិច្ច និងការដោះដូរពាណិជ្ជកម្មរវាងទីក្រុងទាំងពីរផងដែរ។

ម៉្យាងវិញទៀត ភ្ញៀវទេសចរណ៍ហុងកុងក៏នឹងមានជម្រើសធ្វើដំណើរប្រសើរជាងមុនទៅកាន់ប្រទេសកម្ពុជា ដែលពួកគេអាចស្វែងយល់ពីទំនៀមទម្លាប់ និងវប្បធម៌ខ្មែរ និងទស្សនាតំបន់ប្រវត្តិសាស្ត្ររបស់ប្រទេសកម្ពុជា៕ប្រភព: Yahoo៕

ដោយ: គង់ លាងហួរ
អន្តរជាតិ: តម្លៃហាងឆេងមាសបានងើបឡើងថ្លៃក្នុងការជួញដូរនាព្រឹកថ្ងៃពុធនេះ ខណៈក្រុមអ្នកវិនិយោគបានសម្រុកងាកទៅទិញមាសទុក ស្របពេលមានភាពមិនច្បាស់លាស់នានា ដែលកើតចេញពីគោលនយោបាយដំឡើងពន្ធរបស់សហរដ្ឋអាមេរិក។

តួយ៉ាង តម្លៃមាស Spot Gold បានងើបឡើង០,៤៨ភាគរយដល់៣១២៥,៣៥ដុល្លារក្នុងមួយអោន ខណៈតម្លៃហាងឆេងមាសរបស់សហរដ្ឋអាមេរិក U.S. gold futures បានងើបឡើង០,៣៥ភាគរយដល់៣១៥៧,១០ដុល្លារក្នុងមួយអោនគិតត្រឹមម៉ោង១០:៥៤នាទីព្រឹក។

យោងតាមឧបករណ៍ CME FedWatch បានឱ្យដឹងថា បច្ចុប្បន្ន ទីផ្សារមើលឃើញឱកាសចំនួន៥៨,៨ភាគរយ ដែលធនាគារកណ្តាលអាមេរិក (Fed) នឹងអាចទម្លាក់អត្រាការប្រាក់ចំនួន០,២៥ភាគរយក្នុងកិច្ចប្រជុំគោលនយោបាយនៅថ្ងៃទី១៨ ខែមិថុនាខាងមុខ។

សន្ទស្សន៍ប្រាក់ដុល្លារ ដែលវាស់វែងរូបិយប័ណ្ណប្រាក់ដុល្លារអាមេរិកធៀបនឹងរូបិយប័ណ្ណធំៗចំនួន៦ ដូចជាប្រាក់យ៉េន និងប្រាក់អឺរ៉ូ បានធ្លាក់ថ្លៃចុះមកនៅត្រឹម១០៤,២០ពិន្ទុនាព្រឹកថ្ងៃពុធនេះ បន្ទាប់ពីបានបិទការជួញដូរត្រឹម១០៤,២៦ពិន្ទុកាលពីថ្ងៃអង្គារម្សិលមិញ។

ចំណែក តម្លៃលោហៈធាតុប្រាក់ Spot silver បានងើបឡើង០,៥៩ភាគរយដល់៣៤,៥១ដុល្លារក្នុងមួយអោន ខណៈតម្លៃផ្លាទីនបានងើបឡើង០,៤២ភាគរយដល់១០០៨,៨ដុល្លារក្នុងមួយអោន ហើយតម្លៃ palladium បានងើបឡើង០,៣៧ភាគរយដល់១០០៤,៥ដុល្លារក្នុងមួយអោនគិតត្រឹមម៉ោង១០:៥៦នាទីព្រឹក៕