ដោយៈ គង់ សូរិយា
ភ្នំពេញៈ ទីតាំងពិតជាមានសារៈសំខាន់ណាស់ ក្នុងវិស័យអចលនទ្រព្យ ទាំងការវិនិយោគរកផលចំណេញ និងការរៀបចំគំរោងអភិវឌ្ឍន៍នានា។
ជាមួយនឹងការគិតគូ ដល់បែបផែននៃការរស់នៅសម័យថ្មី និងមានភាពស៊ីវិល័យ បុរីវិមានសំណាងបាន និងកំពុងគិតពីផាសុខភាពដល់អ្នករស់នៅ និងចូលរួមលើកកំពស់ស្តង់ដាបៃតង និងគុណភាពជីវិតរបស់អ្នកទិញលំនៅដ្ឋានក្នុងបុរីទំហំជាង២០ហិកតានេះ។
លោកឧកញ៉ាបណ្ឌិតគីម ហ៊ាងប្រធានKW Cambodia និងកំពុងអភិវឌ្ឍន៍បុរីវិមានសំណាង បានមានប្រសាសន៍ឲ្យដឹងលើផេកផ្លូវការរបស់លោកាលពីថ្ងៃទី១៨ តុលាកន្លងមកថា បុរី វិមានសំណាង លើផ្ទៃដី២៥ហិកតា មានព្រែកធម្មជាតិហូរកាត់ប្រវែង១០០០ម៉ែត្រ ដែលយើងនឹងមើលថែរអោយបានល្អ និងស្អាត ដើម្បីជាផលប្រយោជន៍រួមសម្រាប់បងប្អូន ពុកម៉ែ ពូមីង និងមិត្តភក្តិ ដែលរស់នៅក្នុងបុរី វិមានសំណាងផ្ទាល់តែម្តង។
បុរីវិមានសំណាង ស្ថិតនៅភាគខាងជើងក្រសួងរៀបចំដែនដី នគរូបនីយកម្ម និងសំណង់ថ្មីចម្ងាយប្រមាណ២៥០០ម៉ែត្រ និងជាទីតាំងមួយដែលព័ទ្ឋជុំវិញដោយផ្សារទំនើប ផ្សារសហគមន៍ រមណីយដ្ឋានធម្មជាតិ និងធ្វើដំណើរប្រមាណ១០នាទី ទៅដល់ពហុកីឡាដ្ឋានមរតកតេជោ ដែលជាទីតាំងនឹងរៀបចំកីឡាស៊ីហ្គេមនៅឆ្នាំ២០២៣ខាងមុខនេះ៕
