ដោយ: គង់ លាងហួរ
អន្តរជាតិ: គិតមកទល់ពេលនេះ ក្រុមហ៊ុន Megaworld Corp. សម្រេចបាននូវអត្រានៃការលក់យូនីតខុនដូជិត១០០ភាគរយនៅក្នុងអគារ La Victoria Global Residence របស់ខ្លួន ស្ថិតក្នុងទីក្រុងទេសចរណ៍ Cebu ដ៏ល្បីល្បាញនៃប្រទេសហ្វីលីពីន ខណៈតម្លៃខុនដូបានហក់ឡើង៧១ភាគរយ ចាប់តាំងពីគម្រោងនេះបានចាប់ផ្តើមបើកដំណើរការនៅឆ្នាំ២០១៨។
បច្ចុប្បន្ន ខុនដូនៅក្នុងអគារកំពស់២០ជាន់នេះមានតម្លៃជាមធ្យមចំនួន៣០០.០០០ប៉េសូ(ប្រមាណ៥.២៤៥ដុល្លារអាមេរិក)ក្នុងមួយម៉ែត្រការ៉េ បើធៀបនឹងតម្លៃជាមធ្យមត្រឹមតែ១៧៥.០០០ប៉េសូក្នុងមួយម៉ែត្រការ៉េកាលពីឆ្នាំ២០១៨។នេះបើយោងតាមការដកស្រង់ចុះផ្សាយដោយសារព័ត៌មាន Business World។
ក្រុមហ៊ុនបានវាយតម្លៃថា ការសម្រេចបានកំណើនខ្ពស់កប់ពពកនេះបណ្តាលមកពី ការអភិវឌ្ឍន៍តំបន់ទីប្រជុំជនក្នុងទីក្រុងទេសចរណ៍ Cebu ឈានចូលដល់ដំណាក់កាលជឿនលឿន និងកំណើននៃចំនួនជនបរទេស ដែលកំពុងស្វែងរកទិញលំនៅដ្ឋានក្នុងទីក្រុង Cebu។
លោក Harold Brian C. Geronimo អនុប្រធានក្រុមហ៊ុន Megaworld និងជាប្រធានផ្នែកទំនាក់ទំនងសាធារណៈ បានលើកឡើងថា “ខុនដូបានហក់ឡើងថ្លៃ ដោយសារតែការបញ្ចប់គម្រោងអភិវឌ្ឍន៍ជាច្រើន ដែលបានធ្វើឱ្យទីក្រុងនេះមានភាពទាក់ទាញ”។
លោក Geronimo បានគូសបញ្ជាក់ថា ចំនួនប្រហែល៩៥ភាគរយនៃខុនដូសរុបទាំង១៨១យូនីតត្រូវបានលក់ចេញ ខណៈក្រុមហ៊ុន Megaworld គ្រោងនឹងចាប់ផ្តើមផ្ទេរខុនដូទាំងនេះទៅកាន់អតិថិជន មុនពេលដំណាច់ឆ្នាំ២០២៥នេះ៕ប្រភព: Business World៕
