ដោយ: គង់ លាងហួរ
អន្តរជាតិ: តម្លៃអាផាតមុិននៅតាមទីក្រុងធំៗក្នុងតំបន់អាសុីបានកើនឡើងយ៉ាងគំហុកក្នុងរយៈពេល៥ឆ្នាំចុងក្រោយនេះ។ ក្នុងនោះ តម្លៃអាផាតមុិនជាមធ្យមនៅកណ្តាលទីក្រុងតៃបុិលើកោះតៃវ៉ាន់បានកើនឡើង២១,៤ភាគរយចាប់តាំងពីឆ្នាំ២០២០ ដល់ចំនួន១៤.៦៤៨ដុល្លារក្នុងមួយម៉ែត្រការ៉េនៅឆ្នាំ២០២៥។
ជាមួយគ្នានេះ តម្លៃអាផាតមុិនជាមធ្យមនៅកណ្តាលទីក្រុងសុីដនីរបស់ប្រទេសអូស្ត្រាលីបានហក់ឡើង៣៧,៩ភាគរយដល់ចំនួន១៣.១០៤ដុល្លារក្នុងមួយម៉ែត្រការ៉េនៅឆ្នាំ២០២៥ធៀបនឹងឆ្នាំ២០២០។នេះបើយោងតាមរបាយការណ៍សិក្សាស្រាវជ្រាវថ្មីមួយពីធនាគារវិនិយោគ Deutsche Bank របស់អាល្លឺម៉ង់។
យ៉ាងណាមិញ តម្លៃអាផាតមុិនជាមធ្យមនៅកណ្តាលទីក្រុងតូក្យូរបស់ប្រទេសជប៉ុនបានដាំក្បាលចុះ២១,៤ភាគរយមកនៅត្រឹមចំនួន១០.១៩៩ដុល្លារអាមេរិកក្នុងមួយម៉ែត្រការ៉េក្នុងឆ្នាំ២០២៥ បើប្រៀបធៀបនឹងកាលពីឆ្នាំ២០២០ ដែលមានតម្លៃជាមធ្យមចំនួន១២.៩៧៧ដុល្លារក្នុងមួយម៉ែត្រការ៉េ។
តម្លៃអាផាតមុិនជាមធ្យមនៅកណ្តាលទីក្រុងបុមបៃ(Mumbai)របស់ប្រទេសឥណ្ឌាបានហក់ឡើង១០,៨ភាគរយដល់ចំនួន៦.៩៣២ដុល្លារក្នុងមួយម៉ែត្រការ៉េ ខណៈតម្លៃអាផាតមុិនជាមធ្យមនៅកណ្តាលទីក្រុងម៉ានីលរបស់ហ្វីលីពីនបានថយចុះ៥,៧ភាគរយមកនៅត្រឹមចំនួន៣.៥៦៦ដុល្លារក្នុងមួយម៉ែត្រការ៉េ។
តម្លៃអាផាតមុិនជាមធ្យមនៅកណ្តាលទីក្រុងគូឡាឡាំពួររបស់ម៉ាឡេសុីបានហក់ឡើង១៧,៧ភាគរយដល់ចំនួន៣.០៤៥ដុល្លារក្នុងមួយម៉ែត្រការ៉េ ខណៈតម្លៃអាផាតមុិនជាមធ្យមនៅកណ្តាលទីក្រុងហ្សាការតារបស់ឥណ្ឌូនេសុីបានដាំក្បាលចុះ៣៥,៩ភាគរយមកនៅត្រឹមចំនួន១.៨២៧ដុល្លារក្នុងមួយម៉ែត្រការ៉េ៕
