ដោយៈ រ៉ាណេត
ភ្នំពេញៈ ជាមួយនឹងភាពល្អប្រសើរនៃទីផ្សារលំនៅដ្ឋាននៅកម្ពុជា នាពេលបច្ចុប្បន្ននេះ ត្រូវបានបណ្តាប្រទេសមួយចំនួន ស្ថិតនៅក្នុងតំបន់អាស៊ាន ចូលមកសិក្សាស្វែងយល់ និងយកគំរូតាមសម្រាប់អភិវឌ្ឍន៍នៅក្នុងប្រទេសរបស់ខ្លួន។
ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា លោកឧកញ៉ាលី ហួរបានមានប្រសាសន៍នៅថ្ងៃទី២៣ ខែកញ្ញា ឆ្នាំ២០២០កន្លងមកថា បច្ចុប្បន្ននេះ យ៉ាងហោចណាស់មានប្រទេសចំនួន២ នៅក្នុងតំបន់អាស៊ាន ដែលបានចូលមកសិក្សា និងស្វែងយល់ពីកំណើននៃការអភិវឌ្ឍន៍វិស័យលំនៅដ្ឋាន យ៉ាងផុលផុសក្នុងប្រទេសកម្ពុជា ខណៈដែលបណ្តាប្រទេសជាច្រើន កំពុងតែប្រឈមនឹងការធ្លាក់ចុះទីផ្សារអចលនទ្រព្យ ក៏ដូចជាសេដ្ឋកិច្ច។
លោកឧកញ៉ាបញ្ជាក់ថា “ស្ទើរតែគ្រប់បណ្តាប្រទេសកំពុង តែប្រឈមឱនភាពសេដ្ឋកិច្ច ដែលក្នុងនោះវិស័យអចលនទ្រព្យ ក៏ទទួលរងនូវផលប៉ះពាល់។ ដោយឡែកសម្រាប់តែប្រទេសកម្ពុជា ដែលក្រៅពីអាចមានលទ្ធភាពទប់ស្កាត់ ការរាលដាលបានយ៉ាងល្អប្រសើរ ថែមទាំងនៅបន្តដំណើរនៃការអភិវឌ្ឍន៍ លើវិស័យហេដ្ឋារចនាសម្ព័ន្ធបានដដែល” ។ លោកបន្តថា “ជាពិសេសវិស័យលំនៅដ្ឋានក្រោមការវិនិយោគ និងអភិវឌ្ឍន៍ដោយវិនិយោគិនក្នុងស្រុក” ។
លោកឧកញ៉ាលី ហួរ បានបញ្ជាក់ទៀតថា តាមខ្ញុំដឹង គឺមានអ្នកអភិវឌ្ឍន៍វិស័យលំនៅដ្ឋាននៅប្រទេសឥណ្ឌូណស៊ី និងម៉ាឡេស៊ី បានចុះមកសិក្សាពីភាពល្អប្រសើរនៃការអភិវឌ្ឍវិស័យលំនៅដ្ឋាននៅកម្ពុជា ដោយពួកគេនឹងយកគំរូតាម ហើយអាចយកទៅអនុវត្តនៅក្នុងប្រទេសរបស់ពួកគេក៏អាចថាបាន។
ក្នុងរយៈពេលខ្លី យើងអាចផ្លាស់ប្ដូរទិដ្ឋភាពពីដីស្រែ ដីស្មៅ ដីលិចទឹករាប់រយ រាប់ពាន់ហិកតា ឱ្យក្លាយជាបណ្តុំលំនៅដ្ឋានបែបប្រណីត សម្រាប់ប្រជាពលរដ្ឋរស់នៅប្រកបដោយផាសុកភាព វាគឺជារឿងមួយដែលអស្ចារ្យ និងជាទីមោទនបំផុត។
ជាមួយនឹងការលើកឡើងខាងលើនេះ លោកឧកញ៉ា លី ហួរបានបញ្ជាក់ថា ក្នុងនាមរូបលោកជាអ្នកអភិវឌ្ឍន៍ ក៏ដូចជាប្រធានសមាគមអ្នកអភិវឌ្ឍន៍លំនៅដ្ឋានកម្ពុជា បានបង្ហាញពីការតាំងចិត្តយ៉ាងមុតមាំ ក្នុងការបន្តដំណើរនៃកិច្ចអភិវឌ្ឍន៍ ក្នុងវិស័យអចលនទ្រព្យ ជាពិសេសវិស័យលំនៅដ្ឋាន ក្រោមកិច្ចគាំទ្រពីសំណាក់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រីនឌៃកម្ពុជាជាប្រមុខ ៕
