ដោយៈគង់ សូរិយា
ភ្នំពេញៈ ម្ចាស់គម្រោង “ឆ្នេរសមុទ្រកោងកាង” ដែលបានបោះទុនវិនិយោគ១០លានដុល្លារលើគំរោងនេះ បានទិញទូកកាយ៉ាក់ចំនួន៣០និងតង់៣០សម្រាប់ សម្រាប់សាធារណៈជនជិះកំសាន្តដោយឥតគិតថ្លៃ។
គំរោងឆ្នេរសមុទ្រកោងកាង ស្ថិតនៅ ភូមិដំណាក់ចំបក់ សង្កាត់អូរក្រសារ ក្រុងកែប ខេត្តកែប មានចម្ងាយប្រមាណ២គីឡូម៉ែត្រ ពីរង្វង់មូលសេះ “ស”បាននិងកំពុងផ្តល់ទស្សនទានអភិវឌ្ឍន៍បែបថ្មី និងគំរោងដីលំហែរស្តង់ដាអន្តរជាតិ និងធំជាងគេជាលើកតំបូងនៅខេត្តកែប។
អ្នកនាងឆយ ហ្រ្វីដានាយិកាគ្រប់គ្រងទូទៅ នៃគំរោងឆ្នេរសមុទ្រកោងកាងបានសរសេរលើបណ្តាញទំនាក់ទំនងសង្គម កាលពីរសៀលថ្ងៃទី២ មិថុនាថា និយាយភា្លមដឹកភ្លាម! កុំបង្អង់យូរ…..ទូកកាយ៉ាក30គ្រឿង តង់៣០សំរាប់អតិថិជន និងភ្ញៀវ២៥ រាជធានីខេត្ត ជិះកម្សាន្តដោយគិតថ្លៃ។ កុំភ្លេចមកជិះទូក កាយ៉ាកនៅគម្រោងឆ្នេរសមុទ្រកោងកាងណា។
អ្នកនាងបន្តថា “ទៅលេងឆ្នេរកែប ទីកែប វិស្សមកាលកែប កុំភ្លេចគំរោងឆ្នេរសមុទ្រកោងកាង”។
អគ្គនាយកក្រុមហ៊ុន Youngsia Real Estate លោក Cooler Tan បានមានប្រសាសន៍ថា ជាមួយនឹងភាពអំណោយផលនៃធម្មជាតិ គំរោងឆ្នេរសមុទ្រកោងកាង ក្រៅពីមានទិដ្ឋភាពឆ្នេរសមុទ្រដ៏ស្រស់ស្អាត មានដើមកោងកាងខៀវស្រេងាត់ ជាមួយទេសភាពស្រែអំបិលដ៏ឆើតឆាយ គំរោងនេះក៏មានដងព្រែកធម្មជាតិដ៏ស្រស់ស្អាត ដែលអំណោយផលដល់ការជិះទូកកាយ៉ាក់កំសាន្ត និងអាចស្ទូចត្រីបានទៀតផង។ ជាពិសេសព្រែកធម្មជាតិនេះ អាចជិះទូក អូប័រ ទៅលេងសមុទ្រផងដែរ។
លោកបន្តថា “គំរោងនេះបាននិងកំពុងអភិវឌ្ឍន៍ ស្របតាមគោលនយោបាយរបស់រាជរដ្ឋាភិបាល ដើម្បីប្រែក្លាយខេត្តកែប ជាតំបន់លំហែរកាយកម្រិតខ្ពស់”។ លោកបន្តថា “ឆ្នេរសមុទ្រកោងកាង បាននិងកំពុងពង្រីកសក្តានុពលខេត្តកែប ដើម្បីក្លាយជាផលិតផលទេសចរណ៍ថ្មីមួយ ពិសេសជម្រុញខេត្តនេះ ឲ្យកាន់តែទាក់ទាញការវិនិយោគបន្ថែមទៀត”។
លោក Cooler Tan បានបន្តថា យើងបាននិងកំពុងប្រែក្លាយគំរោងនេះជាមួយហេដ្ឋារចនាសម្ព័ន្ឋធំទូលាយ ដាំដើមផ្កាសាគូរ៉ាធំៗចំនួន៣០០ដើម និងសួនច្បារលំហែរកាយ ដើមឈើខៀវស្រងាត់ ដើម្បីធ្វើយ៉ាងណាឲ្យអ្នកសាងសង់ផ្ទះលំហែរនៅទីនេះ ទទួលបានផាសុខភាព អារម្មណ៍ស្រស់ស្រាយពិតប្រាកដ សមស្របនឹងទស្សនទាននៃការអភិវឌ្ឍរបស់យើង គឺធ្វើឲ្យស្អាត ធ្វើឲ្យលឿន និងធ្វើឲ្យបានល្អលើសពីអ្វីដែលអតិថិជនស្រម៉ៃដល់៕
