ដោយ វុត្ថា
ភ្នំពេញ៖ យោងតាមការចុះផ្សាយរបស់ទស្សនាវដ្តីដ៏ល្បីល្បាញ Forbes របស់សហរដ្ឋអាមេរិកបានឲ្យដឹងកាលពីពេលថ្មីៗនេះថា ប្រទេសវៀតណាមគឺជាគោលដៅវិនិយោគដ៏ទាក់ទាញបំផុត ពីសំណាក់ក្រុមហ៊ុនបរទេសនៅក្នុងតំបន់អាស៊ី បានធ្វើឪ្យតែលំហូវិនិយោគផ្ទាល់ពីបរទេស (FDI) បានមកកាន់ប្រទេសនេះកាន់តែច្រើន ក្នុងរយៈពេលប៉ុន្មានចុងក្រោយនេះ។
ទស្សនាវដ្តីនេះចុះផ្សាយថា ប្រទេសវៀតណាមបានទាក់ទាញលំហូទុនវិនិយោគផ្ទាល់ពីបរទេស (FDI) មានចំនួន១៧ពាន់លានដុល្លារកាលពីឆ្នាំ២០១៧ ដែលជំរុញឲ្យទីផ្សារផលិតផលក្នុងស្រុក កើនដល់២៥០ពាន់លានដុល្លារសហរដ្ឋអាមេរិក។ ទុនវិនិយោគផ្ទាល់ពីបរទេសសម្រាប់ឆ្នាំ២០១៨នេះ បានជាប់ចំណាត់ថ្នាក់ទី៤នៅក្នុងតំបន់ដោយឈរលេខរៀងបន្ទាប់ពីប្រទេសកូរ៉េ សឹង្ហបុរី និងអូស្ត្រាលី ។
ទីផ្សារនៅក្នុងទីក្រុងហូជីមីញមានការរីកចម្រើនខ្លាំង និងផលិតផលក្នុងស្រុកបាននឹងកំពុងកើនឡើង៧ភាគរយក្នុងមួយឆ្នាំ។
ទស្សនាវដ្តីនេះបានបន្ថែមថា ការកើនឡើងនេះ ដោយសារប្រទេសវៀតណាមមានច្បាប់សម្រួលដល់ការវិនិយោគបរទេស រួមជាមួយកិច្ចព្រមព្រៀមនានាជាមួយនឹងប្រទេសនៅក្នុងតំបន់ និងពិភពលោកក្នុងការនាំចេញ ក៏ដូចមានទីផ្សារល្អលើគ្រប់វិស័យ ។ ជាមួយគ្នានោះប្រទេសនេះ បានចុះកិច្ចព្រមព្រៀងតាមកម្មវិធី Comprehensive and Progressive Agreement for Trans Pacific Partnership (CPTPP) និងកម្មវិធី EU-Việt Nam Free Trade Agreement (EVFTA) ដែលនឹងត្រូវអនុវត្តជាផ្លូវការនៅខែក្រោយឆ្នាំ២០១៩នេះ នឹងធ្វើសេដ្ឋកិច្ចរបស់ប្រទេសវៀតណាម កាន់តែចូលទៅក្នុងសមហរណកម្មសេដ្ឋកិច្ចសកល ។ បន្ថែមពីនេះ ប្រទេសវៀតណាមបាននាំចេញនូវផលិតផលក្នុងស្រុកជាច្រើន ទៅកាន់បណ្តាប្រទេសនានា ដើម្បីផ្គត់ផ្គង់នៅក្នុងទីផ្សារនៅទូទាំងពិភពលោក។
លំហូទុនវិយោគបរទេសហូរចូលក្នុងប្រទេសវៀតណាមក្នុងឆមាសទី១ ឆ្នាំ២០១៨ លើវិស័យអចលនទ្រព្យមានចំនួន៥,៥៤ពាន់លានដុល្លារ ពោលគឺកើនឡើង២៧.៣ ភាគរយ។ វិស័យចលនទ្រព្យនេះគឺជាវិស័យទី២ ដែលមានការទាក់ទាញបំផុតពីវិនិគិនទាំងនៅក្នុងស្រុក និងក្រៅស្រុក បន្ទាប់ពីវិស័យរោងចក្រឧស្សាហកម្ម។ វិនិគិនបរទេសយល់ឃើញថាទីផ្សារចលនទ្រព្យក្នុងប្រទសវៀតណាម មានតម្រូវការច្រើនជាងពេលណាៗទាំងអស់ ក្នុងរយៈពេលប៉ុន្មានឆ្នាំចុងក្រោយនេះ ក្រោមហេតុផលតម្រូវការកើនឡើងនៃអ្នកមានចំណូលមធ្យម៕
