ដោយ គង់ សូរិយា
ភ្នំពេញ៖ ស្របពេលទីផ្សារអចលនទ្រព្យកម្ពុជាកំពុងរីកចម្រើន និងប្រឈមបញ្ហាមួយចំនួនអ្នកជំនាញក្នុងវិស័យនេះបានអះអាងថា ទីផ្សារនេះនៅតែបន្តមានភាពរ៉ឹងមាំសំរាប់រយៈពេល១០ទៅ១០ឆ្នាំខាងមុខទៀត។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) លោកច្រឹក សុខនីមបានមានប្រសាសន៍ឲ្យដឹង ក្នុងសន្និសទីសារព៌តមាននារសៀលថ្ងៃទី២៤ មករានេះថា នៅពេលនិយាយពីការកើនឡើងឬថយចុះវិស័យនេះ គេត្រូវនិយាយពីតម្រូវការនិងការផ្គត់ផ្គង់ តែបើនិយាយពីតម្លៃដីវិញ បើឡើងខ្ពស់មិនអាចវិនិយោគទៅចំណេញ វានឹងជាប់គាំង ព្រោះអ្នកទិញគឺទិញវិនិយោគយកចំណេញ តែបើទិញមិនចំណេញគេមិនទិញនោះទេ។
លោកបន្តថា ទាក់ទងការចេញផ្សាយរបស់ធនាគារពិភពលោកស្តីពី បញ្ហាប្រឈមក្នុងវិស័យនេះកាលពីពេលថ្មីៗនេះ វាជាការត្រឹមត្រូវគឺមានរយៈពេល១០ឆ្នាំ ដែលវាជាពេលវេលាដែលយើងត្រូវតែគិតគូពីបញ្ហាប្រឈម។
លោកបន្តថា “ ៥ទៅ១០ឆ្នាំខាងមុខវិស័យនេះនៅតែរ៉ឹងមាំ តែ ២០ឆ្នាំទៅមុខវានឹងមានបញ្ហាប្រឈម តែបញ្ហាកើតឡើងឬអត់ វាអាស្រ័យលើគោលនយោបាយរបស់ប្រទេស១ ព្រោះបើប្រទេសហ្នឹងមានលុយបំរ៉ុងច្រើន វាអាចជួយស្រោចស្រង់ស្ថានភាពសេដ្ឋកិច្ចប្រទេសនោះបាន។
លោកបន្តថា “បើប្រទេសមួយមានទុនបំរ៉ុងតិច វាងាយមានហានិភ័យ ព្រោះបើបញ្ហាសាកលកើតមានឡើង ប្រទេសនោះងាយរងគ្រោះ។
លោក ច្រឹក សុខនីម បានបន្តថា បើពិនិត្យមើលស្ថានភាពបំណុលរបស់កម្ពុជា ធៀបជាមួយបណ្តាប្រទេសដទៃនៅលើពិភពលោក ស្ថានភាពបំណុលប្រទេសកម្ពុជាមានភាពប្រសើរជាងប្រទេសមួយចំនួន ប៉ុន្តែដោយសារផលទុនជាតិសរុបសំរាប់មនុស្សម្នាក់នៅមានកម្រិតទាប ក៏កម្ពុជាមានហានិភ័យផងដែរ ដូច្នេះបើរដ្ឋាភិបាលបង្កើនឲ្យផលទុនឬប្រាក់ចំណូលប្រចាំឆ្នាំរបស់មនុស្សម្នាក់កើនខ្ពស់ ទុនបំរ៉ុងអន្តរជាតិកើនឡើងខ្ពស់ ហានិភ័យក្នុងវិស័យនេះក៏មានកម្រិតទាបផងដែរ៕
