ដោយ: គង់ លាងហួរ
អន្តរជាតិ: តើអ្នកចង់ដឹងទេថាតើអគារណាខ្លះ ដែលតម្លៃថ្លៃជាងគេបំផុតនៅក្នុងពិភពលោក? តោះសូមមកស្វែងយល់ និងស្គាលអំពីអគារចំនួន៥ ដែលមានតម្លៃខ្ពស់បំផុតរបស់ពិភពលោក នៅឆ្នាំ២០២៣នេះ ដូចខាងក្រោម:
ទី១) អគារ Masjid al-Haram តម្លៃ១០០ពាន់លានដុល្លារ
Masjid al-Haram គឺជាអគារថ្លៃបំផុតនៅលើពិភពលោក ដោយមានអ្នកគោរពបូជាចំនួន៤លាននាក់ និងជាវិហារអ៊ីស្លាមដ៏ធំបំផុតរបស់ពិភពលោក។ អគារនេះមានទីតាំងស្ថិតក្នុងទីក្រុង Mecca ប្រទេសអារ៉ាប៊ីសាអូឌីត។
ទី២) អគារ Abraj Al Bait តម្លៃ១៦ពាន់លានដុល្លារ
អគារ Abraj al-Bait គឺជាអគារថ្លៃបំផុតលំដាប់ទី២ នៅលើពិភពលោក ដែលចំណាយថវិកាសាងសង់ ប្រហែល១៦ពាន់លានដុល្លារ។ វាជាបណ្តុំអគារ ខ្ពស់កប់ពពកស្រដៀងៗគ្នាចំនួន៧ ដែលគ្រប់គ្រងដោយរដ្ឋ ដោយមានទីតាំងនៅទីក្រុង Mecca ប្រទេសអារ៉ាប៊ីសាអូឌីត។
ទី៣). អគារ Marina Bay Sands តម្លៃ៥,៥ពាន់លានដុល្លារ
Marina Bay Sands គឺជារមណីយដ្ឋានរួមបញ្ចូលគ្នា មួយនៅប្រទេសសិង្ហបុរី ដែលស្ថិតនៅទល់មុខនឹងឆ្នេរសមុទ្រ Marina ។ វាជាអគារថ្លៃបំផុតទី៣នៅលើពិភពលោក។ អគាររមណីយដ្ឋាននេះ ត្រូវបានគ្រប់គ្រងដោយក្រុមហ៊ុន Las Vegas Sands Corporation ។ រមណីយដ្ឋាននេះរួមមានសណ្ឋាគារ២.៥៦១បន្ទប់ មជ្ឈមណ្ឌលពិព័រណ៍-សន្និបាតទំហំ១២០.០០០ម៉ែត្រការ៉េ ផ្សារទំនើបMarina Bay Sands Mall ទំហំ៧៤.០០០ម៉ែត្រការ៉េ ហាងទំនិញ សារមន្ទីរ និងរោងមហោស្រពធំមួយ។
ទី៤) អគារ Apple Park តម្លៃ៥ពាន់់លានដុល្លារ
Apple Park គឺជាទីស្នាក់ការកណ្តាលរបស់ក្រុមហ៊ុន Apple Inc. ដែលមានទីតាំងនៅទីក្រុង Cupertino រដ្ឋ California សហរដ្ឋអាមេរិក។ អគារនេះ ត្រូវបានបើកឱ្យបុគ្គលិកធ្វើការ នៅក្នុងខែមេសា ឆ្នាំ២០១៧ ។ Apple Park គឺជាអគារមួយ ក្នុងចំណោមអគារថ្លៃបំផុតទាំង៥ នៅលើពិភពលោកក្នុងឆ្នាំ២០២៣នេះ ដែលចំណាយទឹកប្រា ក់សាងសង់ប្រមាណ៥ពាន់លានដុល្លារអាមេរិក។
ទី៥)អគារ Resorts World Sentosa តម្លៃ៤,៩៣ពាន់លានដុល្លារ
Resorts World Sentosa គឺជារមណីយដ្ឋានរួមបញ្ចូលគ្នាមួយស្ថិតនៅលើកោះ Sentosa ដែលមានទីតាំងនៅឆ្នេរ សមុទ្រភាគខាងត្បូងនៃប្រទេសសិង្ហបុរី។
ចំណុចទាក់ទាញសំខាន់ៗ នៅរមណីយដ្ឋាន RWS នេះមានដូចជា កាស៊ីណូមួយក្នុងចំណោមកាស៊ីណូចំនួនពីរ នៅក្នុងប្រទេសសិង្ហបុរី សួនកម្សាន្ត Universal Studios Singapore សួនកម្សាន្ត Adventure Cove Waterpark ក៏ដូចជា The Singapore Oceanarium ដែលជាតំបន់ឆ្នេរនៅលើមហាសមុទ្រ ដ៏ធំបំផុតទីពីររបស់ពិភពលោក៕
