ដោយ: គង់ លាងហួរ
អន្តរជាតិ: បញ្ហាអចលនទ្រព្យ ក្នុងតំបន់អាស៊ី ជាពិសេសគឺ ទីផ្សារលំនៅដ្ឋាន នឹងបន្តអូសបន្លាយទៅមុខ ខណៈការដាំក្បាលចុះនៃទីផ្សារលំនៅដ្ឋាននាពេលបច្ចុប្បន្ន មិនត្រឹមតែអាចផ្ទុះឡើងនៅប្រទេសចិន និងសិង្ហបុរីប៉ុណ្ណោះទេ ប៉ុន្តែវាក៏អាចផ្ទុះឡើងនៅប្រទេសជប៉ុនផងដែរ។
លោក Nicholas Spiro សេដ្ឋវិទូរបស់ក្រុមហ៊ុនអចលនទ្រព្យមួយ ដែលមានមូលដ្ឋាននៅទីក្រុងឡុងដ៍ បានផ្តល់បទសម្ភាសន៍ជាមួយសារពត៌មាន South China Morning Post ស្តីអំពីសញ្ញានៃវិបត្តិទីផ្សារលំនៅដ្ឋាន នៅតំបន់អាស៊ីប៉ាស៊ីហ្វិក ដែលនៅតែបន្តអូសបន្លាយយូរទៅមុខ។
ចំពោះប្រទេសចិន ទីផ្សារលំនៅដ្ឋាននៅប្រទេសនេះ បានដាំក្បាលចុះ ចាប់តាំងពីរដ្ឋាភិបាលទីក្រុងប៉េកាំង បានដាក់គោលនយោបាយ “បន្ទាត់ក្រហម៣”កាលពីពាក់កណ្តាលឆ្នាំ២០២១។
គោលនយោបាយ “បន្ទាត់ក្រហម៣” បានកំណត់សមត្ថភាពរបស់ក្រុមហ៊ុនអចលនទ្រព្យ ក្នុងការទទួលបានប្រាក់កម្ចីថ្មី ដែលការណ៍នេះ បានបណ្តាលឱ្យក្រុមហ៊ុនអចលនទ្រព្យ ខ្នាតធំជាច្រើននៅក្នុងប្រទេសចិន ជួបបញ្ហាហិរញ្ញវត្ថុយ៉ាងធ្ងន់ធ្ងរ។
ប្រទេសចិនបានប្រឈមមុខ នឹងបញ្ហាផ្គត់ផ្គង់ផ្ទះលើសតម្រូវការអស់រយៈពេលជាច្រើនឆ្នាំកន្លងមកហើយ ខណៈដែលប្រទេសផ្សេងជួបការលំបាក ដោយសារកង្វះនៃការផ្គត់ផ្គង់។ ជាមួយគ្នានេះ នៅប្រទេសចិន មានផ្ទះរាប់លានយូនីត ដែលត្រូវបានលក់ចេញ ប៉ុន្តែមិនទាន់ត្រូវបានប្រគល់ទៅកាន់អតិថិជននៅឡើយ។
ក្រុមហ៊ុនហិរញ្ញវត្ថុដ៏ធំបំផុតរបស់ប្រទេសជប៉ុន Nomura បានប៉ាន់ស្មានថា នៅប្រទេសចិន មានផ្ទះប្រហែល២០លានយូនីត ដែលមិនទាន់បានសាងសង់បញ្ចប់រួចរាល់ ពោលគឺស្មើនឹង២០ដងនៃទំហំទុនរបស់ក្រុមហ៊ុន Country Garden Holdings ដែលជាក្រុមហ៊ុនអភិវឌ្ឍន៍អចលនទ្រព្យខ្នាតយក្សមួយរបស់ប្រទេសចិន។ ទោះជាយ៉ាងនេះក្តី ពុំមែនមានតែប្រទេសចិនទេ ដែលកំពុងជួបបញ្ហា ប៉ុន្តែប្រទេសផ្សេងទៀត ក្នុងតំបន់អាស៊ីប៉ាស៊ីហ្វិក ក៏ជួបវិបត្តិទីផ្សារលំនៅដ្ឋានផងដែរ។
ជាក់ស្តែង តម្លៃលំនៅដ្ឋាននៅប្រទេសអូស្ត្រាលី បានធ្លាក់ចុះ ក្នុងទីក្រុងចំនួន៣ ក្នុងចំណោមទីក្រុងចំនួន៨ កាលពីខែវិច្ឆិកា ដែលក្នុងនោះ រួមមាន ទាំងទីក្រុងមែលប៊ន និងទីក្រុងស៊ីដនីផងដែរ។ បញ្ហានេះបណ្តាលមកពីកំណើន នៃអត្រាការប្រាក់ដ៏ខ្ពស់ ការទិញធ្លាក់ចុះ ទំនុកចិត្តធ្លាក់ចុះ ព្រមទាំងការព្រួយបារម្ភ អំពីវិបត្តិសេដ្ឋកិច្ច ដែលបាននាំទៅដល់ការដាំក្បាល នៃទីផ្សារលំនៅដ្ឋាននៅប្រទេសអូស្ត្រាលី។
ចំណែកតម្លៃផ្ទះ និងប្រតិបត្តិការផ្នែកលក់អចលទ្រព្យ នៅប្រទេសសិង្ហបុរី មានការដាំក្បាលចុះយ៉ាងគំហុក។ ក្រុមហ៊ុនអចលនទ្រព្យល្បីឈ្មោះ OrangeTee & Tie បានព្យាករណ៍ថា ការលក់ផ្ទះនៅសិង្ហបុរី នឹងធ្លាក់ចុះមកនៅត្រឹមចន្លោះពី១៦.០០០យូនីត ទៅ១៩.០០០យូនីតនៅឆ្នាំ២០២៤ ដោយចំនួននេះគឺស្មើនឹងពាក់កណ្តាល នៃការលក់សរុបក្នុងឆ្នាំ២០២១។
លោក Nicholas Spiro បានអះអាងថា វិបត្តិទីផ្សារលំនៅដ្ឋាននៅតំបន់អាស៊ី អាចរីករាលដាលដល់ប្រទេសជប៉ុន។ តួយ៉ាង ទីក្រុងតូក្យូ ប្រទេសជប៉ុន កំពុងរងផលប៉ះពាល់ពីគោលនយោបាយ រឹតបន្តឹងរូបិយវត្ថុរបស់ពិភពលោក ស្របពេលដែលធនាគារកណ្តាលជប៉ុន (BOJ) បានរក្សាគោលនយោបាយរូបិយវត្ថុ ដែលមានភាពធូររលុងខ្លាំងបំផុត។
ជាក់ស្តែង ធនាគារកណ្តាលអាមេរិក (Fed) ធនាគារកណ្តាលអឺរ៉ុប (ECB) និងធនាគារកណ្តាលអង់គ្លេស (BOE) បានដំឡើងអត្រាការប្រាក់ ដើម្បីប្រយុទ្ធនឹងអតិផរណា ប៉ុន្តែផ្ទុយទៅវិញ ធនាគារ BOJ បានរក្សាអត្រាការប្រាក់រយៈពេលខ្លីរបស់ខ្លួន ក្នុងរង្វង់“ដក០,១ភាគរយ” ដែលការណ៍នេះបណ្តាលឱ្យប្រាក់យ៉េន ធ្លាក់ថ្លៃចុះយ៉ាងគំហុកក្នុងពេលថ្មីៗនេះ។
លោក Nicholas Spiro លើកឡើងថា ធនាគារកណ្តាលជប៉ុនអាចនឹងបញ្ចប់គោលនយោបាយ អត្រាការប្រាក់អវិជ្ជមាននាពេលខាងមុខ លឿនជាងការរំពឹងទុករបស់ទីផ្សារ។ ប៉ុន្តែការធ្វើបែបនេះអាចជំរុញឱ្យអត្រាការប្រាក់ លើកម្ចីរយៈពេលខ្លីកើនឡើងខ្ពស់ ដែលអាចដាក់សម្ពាធទៅលើប្រាក់កម្ចីទិញផ្ទះ។
ទន្ទឹមគ្នានេះ តម្លៃអាផាតម៉ិន នៅទីក្រុងតូក្យូបានហក់ឡើងយ៉ាងគំហុកកាលពីពេលថ្មីៗនេះ។ ចំណែក តម្លៃផ្ទះនៅតាមទីក្រុងផ្សេងទៀតនៅប្រទេសជប៉ុន ក៏បានកើនឡើងយ៉ាងខ្លាំងផងដែរ គិតចាប់តាំងពីឆ្នាំ២០១៩។
លោក Nicholas Spiro យល់ឃើញថា “ទីផ្សារអចលនទ្រព្យនៅតំបន់អាស៊ីប៉ាស៊ីហ្វិក មានភាពចម្រុះ និងស្មុគស្មាញ ហើយបណ្តាប្រទេសជាច្រើន បានបង្ហាញពីភាពធន់លើសពីការរំពឹងទុក ប៉ុន្តែនៅតែមានសញ្ញានៃការធ្លាក់ចុះខាងផ្នែកសេដ្ឋកិច្ច”។
សេដ្ឋវិទូរូបនេះបានបញ្ជាក់ថា “ទីផ្សារអចលនទ្រព្យនៅក្នុងប្រទេសជប៉ុន អាចនឹងជួបប្រទះវិបត្តិ ក្នុងពេលឆាប់ៗខាងមុខនេះ”៕
