ដោយ: គង់ លាងហួរ
អន្តរជាតិ: សកម្មភាពទេសចរណ៍របស់ប្រទេសចិន រំពឹងស្ទុះងើបឡើងវិញ ដល់កម្រិតមុនការរាតត្បាត នៃជំងឺកូវីដ-១៩នៅឆ្នាំនេះ ដែលជួយស្ដារ តំណែងរបស់ចិនឡើងមកវិញ ជាទីផ្សារទេសចរក្រៅប្រទេសដ៏ធំបំផុតរបស់ពិភពលោក។
យោងតាមរបាយការណ៍ពីស្ថាប័នស្រាវជ្រាវ China Tourism Academy បានបង្ហាញថា ទីផ្សារទេសចរណ៍ក្នុង និងចេញទៅក្រៅប្រទេសរបស់ប្រទេសចិន នឹងកើនឡើងបន្ថែមទៀត នៅក្នុងឆ្នាំ២០២៤នេះ។
របាយការណ៍ដដែលខាងលើបានបន្តថា ចំនួនសរុបនៃការធ្វើដំណើរក្នុង និងក្រៅប្រទេស នឹងមានលើសពី២៦៤លាននាក់ រីឯ ប្រាក់ចំណូលពីទេសចរណ៍អន្តរជាតិ នឹងកើនដល់កម្រិតលើសពី១០៧ពាន់លានដុល្លារ។
យោងតាមទិន្នន័យពីគេហទំព័រទេសចរណ៍ Tuniu បានបង្ហាញថា ការកក់សម្រាប់ដំណើរកម្សាន្តជាក្រុម ក្នុងអំឡុងពេលបុណ្យចូលឆ្នាំចិន ដែលចាប់ផ្តើមនៅថ្ងៃទី១០ ខែកុម្ភៈ បានកើនឡើងគួរឱ្យកត់សម្គាល់ បើធៀបនឹងរយៈពេលដូចគ្នាកាលពីឆ្នាំមុន។
គេហទំព័រទេសចរណ៍ Tuniu បានបង្ហាញថា គោលដៅទេសចរណ៍ក្រៅប្រទេសដ៏ពេញនិយម សម្រាប់ភ្ញៀវទេសចរចិន រួមមាន ប្រទេសថៃ សិង្ហបុរី ម៉ាល់ឌីវ រុស្ស៊ី នូវែលសេឡង់ អារ៉ាប់រួម ម៉ាឡេស៊ី ឥណ្ឌូនេស៊ី និងប្រទេស Nordic ។
លោក Wolfgang Arlt នាយកវិទ្យាស្ថានស្រាវជ្រាវទេសចរណ៍ក្រៅប្រទេសរបស់ប្រទេសចិន បានលើកឡើងថា ប្រទេសចិនទំនងជានឹងរក្សាបានតំណែង ជាទីផ្សារទេសចរណ៍ក្រៅប្រទេស ដ៏ធំបំផុតរបស់ពិភពលោកនៅឆ្នាំនេះ។
យោងតាមទិន្នន័យពីបណ្ឌិត្យសភា ទេសចរណ៍ចិនបានបង្ហាញថា ក្នុងឆ្នាំ២០១៩ ភ្ញៀវទេសចរចិន ដែលបានទៅទស្សនាក្រៅប្រទេសមានចំនួន១៥៥លាននាក់ ដោយចំណាយប្រាក់ចំនួន២៥៥ពាន់លានដុល្លារ។
យោងតាមរបាយការណ៍របស់ក្រុមប្រឹក្សាទេសចរណ៍ និងធ្វើដំណើរពិភពលោក (World Travel and Tourism Council) បានឱ្យដឹងថា អ្នកដំណើរជនជាតិចិន ចំណាយជាមធ្យមចំនួន១.៣៥០ដុល្លារក្នុងមនុស្សម្នាក់។
ប្រទេសចិន បានបិទព្រំដែនយ៉ាងតឹងរ៉ឹងជិត៣ឆ្នាំ ដោយសារជំងឺកូវីដ-១៩។ មុនពេលផ្ទុះជំងឺរាតត្បាត ភ្ញៀវទេសចរចិន គឺជាប្រភពទីផ្សារដ៏ធំបំផុត សម្រាប់បណ្តាប្រទេសភាគច្រើន នៅក្នុងតំបន់អាស៊ីអាគ្នេយ៍និយាយជាទូទៅ និងតំបន់អាស៊ាននិយាយដោយឡែក៕ប្រភព៖VNexpress៕
