ដោយ: គង់ លាងហួរ
អន្តរជាតិ: ក្រុមហ៊ុនប្រឹក្សាអចលនទ្រព្យ Leechiu Property Consultants អះអាងថា ទីផ្សារការិយាល័យនៅប្រទេសហ្វីលីពីនកំពុងឈានចូលដល់ដំណាក់កាលមានស្ថេរភាព បន្ទាប់ពីបានឆ្លងកាត់អស្ថិរភាពជាច្រើនឆ្នាំ។
គិតត្រឹមចុងត្រីមាសទី១ ឆ្នាំ២០២៥ ការិយាល័យទំនេរសរុបនៅប្រទេសហ្វីលីពីនមានទំហំ៣,២លានម៉ែត្រការ៉េ។តួលេខនេះបង្ហាញពីការធ្លាក់ចុះបើធៀបនឹងការិយាល័យទំនេរសរុបចំនួន៣,៣លានម៉ែត្រការ៉េនៅក្នុងត្រីមាសទី៤ ឆ្នាំមុន។
ក្រុមហ៊ុន Leechiu Property Consultants បានបញ្ជាក់ថា “នេះជាសញ្ញាបង្ហាញពីការងើបឡើងវិញយ៉ាងសន្សឹមៗសម្រាប់ទីផ្សារការិយាល័យនៅប្រទេសហ្វីលីពីន”។ ឥទ្ធិពលទីផ្សារបានបន្តស្រូបទាញយកការិយាល័យ ដែលផ្គត់ផ្គង់លើសតម្រូវការ បណ្តាលមកពីជំងឺរាតត្បាត និងការចាកចេញរបស់ក្រុមហ៊ុនហ្គេមអនឡាញបរទេស (POGOs)។
