ជនបរទេសសម្រុកដាក់ពាក្យស្នើសុំទិដ្ឋាការមាសដើម្បីទទួលបានសិទ្ធិទិញលំនៅដ្ឋានក្នុងប្រទេសនូវែលសេឡង់

ដោយ: គង់ លាងហួរ
អន្តរជាតិ: ប្រទេសនូវែលសេឡង់នឹងធ្វើការសម្រេចចិត្តថា តើខ្លួនត្រូវបន្ធូរបន្ថយការហាមប្រាមលើការទិញផ្ទះដោយជនបរទេសឬយ៉ាងណា?។នេះបើយោងតាមប្រសាសន៍របស់លោកស្រី Nicola Willis រដ្ឋមន្ត្រីក្រសួងហិរញ្ញវត្ថុនូវែលសេឡង់។

លោកស្រី Nicola Willis បានមានប្រសាសន៍ឱ្យដឹងបន្តថា រដ្ឋាភិបាលនូវែលសេឡង់កំពុងពិចារណាក្នុងការអនុញ្ញាតឱ្យជនបរទេសមានសិទ្ធិស្នាក់នៅ និងទិញអចលនទ្រព្យលំនៅដ្ឋានក្នុងប្រទេសរបស់ខ្លួនក្រោមកម្មវិធី“ទិដ្ឋាការមាស”។

លោកស្រី Willis បានគូសបញ្ជាក់ថា “កិច្ចពិភាក្សាទាំងនេះកំពុងដំណើរការទៅមុខ ហើយយើងរំពឹងថា ការសម្រេចចិត្តនឹងត្រូវបានធ្វើឡើងដើម្បីប្រកាសលទ្ធផលក្នុងរយៈពេលប៉ុន្មានសប្តាហ៍ខាងមុខ”។

ចាប់តាំងពីឆ្នាំ២០១៨ រដ្ឋាភិបាលនូវែលសេឡង់បានអនុញ្ញាតឱ្យត្រឹមតែពលរដ្ឋអូស្ត្រាលី និងពលរដ្ឋសិង្ហបុរីប៉ុណ្ណោះក្នុងការទិញលំនៅដ្ឋាន។ វិធានការនេះត្រូវបានដាក់ចេញដោយលោក Jacinda Ardern អតីតនាយករដ្ឋមន្ត្រីនៃប្រទេសនូវែលសេឡង់ ដោយសារការព្រួយបារម្ភអំពីកង្វះខាតលំនៅដ្ឋានតម្លៃសមរម្យ។

ទោះជាយ៉ាងណា រដ្ឋាភិបាលនាពេលបច្ចុប្បន្នបាននិងកំពុងពិចារណាលុបចោលវិធានការនេះ បន្ទាប់ពីបានកែសម្រួលកម្មវិធីទិដ្ឋាការមាសនៅក្នុងខែមេសា ឆ្នាំ២០២៥ ដើម្បីទាក់ទាញក្រុមអ្នកមានជាច្រើនចូលមកកាន់ប្រទេសនូវែលសេឡង់។

គិតត្រឹមថ្ងៃទី៨ ខែសីហា ឆ្នាំ២០២៥ រដ្ឋាភិបាលរបស់ប្រទេសនេះបានទទួលពាក្យស្នើសុំទិដ្ឋាការមាសចំនួន២៦៧ពាក្យ។ ពាក្យស្នើសុំទាំងនោះមានទំហំទុនវិនិយោគប្រមាណ៩៤៧,៦៧លានដុល្លារអាមេរិក៕ប្រភព: Bloomberg៕