អគារការិយាល័យនៅតំបន់ Midtown ស្ថិតចំកណ្តាលទីក្រុងញូវយ៉ក អាចប្រែក្លាយទៅជាអគារអាផាតមុិនជាង៧មុឺនយូនីត

ដោយ: គង់ លាងហួរ
អន្តរជាតិ: យោងតាមការសិក្សាថ្មីមួយពីក្រុមហ៊ុន The Kaplan Group បានរកឃើញថា តំបន់ Midtown Manhattan ស្ថិតនៅចំកណ្តាលទីក្រុងញូវយ៉ករបស់សហរដ្ឋអាមេរិកអាចបោះជំហាននាំមុខគេក្នុងការប្រែក្លាយបន្ទប់ការិយាល័យទំនេរ(Vacancy) ទៅជាអគារលំនៅដ្ឋានសរុបចំនួន៧៨.១២១យូនីត។

ទិន្នន័យខាងលើនេះមានកម្រិតខ្ពស់ជាងបណ្តាទីក្រុងផ្សេងទៀតនៅសហរដ្ឋអាមេរិក ដូចជា ទីក្រុង San Francisco ទីក្រុង Dallas ទីក្រុង Houston និងទីក្រុង Chicago។ នេះបើយោងតាមការចុះផ្សាយដោយសារព័ត៌មាន Time Out។

និន្នាការក្នុងការប្រែក្លាយបន្ទប់ការិយាល័យទៅជាយូនីតលំនៅដ្ឋានបានកើនឡើង ខណៈពេលដែលទីក្រុងញូវយ៉កកំពុងជួបប្រទះនឹងវិបត្តិកង្វះលំនៅដ្ឋាន។ ក្នុងន័យនេះ អគារការិយាល័យជាច្រើននៅទីក្រុងញូវយ៉កនឹងត្រូវបានប្រែក្លាយទៅជាអគារអាផាតមុិន ប្រសិនបើតម្រូវការការិយាល័យបន្តដាំក្បាលចុះ។

យោងតាមរបាយការណ៍ដាច់ដោយឡែកពីក្រុមហ៊ុន NYC Comptroller Brad Lander បានឱ្យដឹងថា បច្ចុប្បន្ន គម្រោងការិយាល័យចំនួន៤៤ កំពុងត្រូវបានប្រែក្លាយទៅជាគម្រោងអគារលំនៅដ្ឋានជំនួសវិញ។ ការណ៍នេះអាចផ្គត់ផ្គង់អាផាតមុិនថ្មីចំនួន១៧.៤០០យូនីត។

ចំណាត់ការនេះអាចជួយបន្ធូរបន្ថយសម្ពាធលើទីផ្សារលំនៅដ្ឋាននៅទីក្រុងញូវយ៉ករបស់សហរដ្ឋអាមេរិក និងជំរុញឱ្យតំបន់ពាណិជ្ជកម្មមានសភាពរស់រវើក ខណៈតម្រូវការជួលការិយាល័យបន្តធ្លាក់ចុះ ដោយសារការកើនឡើងនៃនិន្នាការបំពេញការងារពីចម្ងាយ៕ប្រភព: Time Out៕