ដោយ ៖ រ៉ាណេត
ភ្នំពេញ ៖ ការបង្កើតអាជីវកម្មផ្នែកបម្រើសេវាចំណីអាហារនៅតាមបណ្តាទីប្រជុំជននានាហាក់មិនសូវពិបាកនោះទេ ប៉ុន្តែអ្វីដែលជារឿងពិបាកបំផុតនោះគឺការរក្សាដំណើរអាជីវកម្មបានប្រកបដោយភាពជោគជ័យ និងទទួលបានការគាំទ្រច្រើនពីសំណាក់អតិថិជន ជាពិសេសការជ្រើសរើសទីតាំងដែលមានសក្ដានុពល និងមានប្រសិទ្ធភាពក្នុងការលក់ខ្ពស់។
លោក ឡេង ឃេរី នាយកប្រតិបត្តិផ្នែកទីផ្សារឌីជីថលរបស់ក្រុមហ៊ុន រ៉ិច មី (Riich Me Co., Ltd) ដែលទទួលបានសិទ្ធិក្នុងការគ្រប់គ្រងទីផ្សារ នៃមជ្ឈមណ្ឌលពាណិជ្ជកម្ម និងពិព័រណ៍ B2B Park បានមានប្រសាសន៍នៅក្នុងអង្គសិក្ខាសាលាស្ដីពី “ឱកាសអាជីវកម្មនៅអាហារដ្ឋានបែបលម្ហែក្នុងមជ្ឈមណ្ឌលពាណិជ្ជកម្ម និងពិព័រណ៍” កាលពីចុងសប្ដាហ៍កន្លងទៅថា គ្រប់មុខអាជីវកម្មទាំងអស់ ការជ្រើសរើសទីតាំងគឺជារឿងសំខាន់បំផុត។
លោកបានបន្តទៀតថា ការបង្កើតអាជីវកម្មហាក់មិនមែនជារឿងដែលពិបាកធ្វើនោះទេ ប៉ុន្តែកាលដែលអាចរក្សាបាននូវដំណើរការអាជីវកម្ម និងប្រកដោយភាពជោគជ័យនោះទើបជារឿងដែលពិបាកធ្វើបំផុត”។
លោក ឡេង ឃេរី បានបន្តទៀតថា “ភាពជោគជ័យរបស់អាជីវកម្មផ្នែកចំណីអាហារ គឺពាក់ព័ន្ធសំខាន់ទៅនឹងការជ្រើសរើសទីតាំង គួបផ្សំជាមួយនឹងគុណភាពនៃសេវាកម្ម ការតុបតែងលម្អ បរិយាកាសជុំវិញ អនាម័យ ជាពិសេសគុណភាពនៃរសជាតិ”។
លោកបានបន្តទៀតថា “សម្រាប់សួនអាហារដ្ឋានបែបលម្ហែដែលបង្កើតឡើងនៅក្នុងមជ្ឈមណ្ឌលពាណិជ្ជកម្ម និងពិព័រណ៍ B2B Park គឺបានផ្តោតសំខាន់ទៅលើការយកចិត្តទុកដាក់ផ្នែកសុវត្ថិភាព ផាសុកភាព សោភ័ណភាព អនាម័យ និងបរិយាកាសល្អគួរជាទីទាក់ទាញ ជាពិសេសផ្តល់ភាពងាយស្រួលដល់បណ្តាអាជីវករទាំងអស់ដែលជាដៃគូ”។
លោក រតន៍ ទិត្យាមុន្នី ម្ចាស់ហាងអាហារដ្ឋាន ទឹកស៊ុប ដែលបានជួលទីតាំងសួនអាហារបែបលម្ហែនៅក្នុងមជ្ឈមណ្ឌលពាណិជ្ជកម្ម និងពិព័រណ៍ B2BPark សម្រាប់ដំណើរការសាខាថ្មីបន្ថែមទៀតនោះ បានទទួលស្គាល់នូវការលើកឡើងខាងលើនេះ ដោយលោកបានលើកយកបទពិសោធន៍ផ្ទាល់ខ្លួននៅក្នុងដំណើរអាជីវកម្មរបស់លោកបានបង្ហាញថា “ការធ្វើអាជីវកម្មផ្នែកចំណីអាហារ ការបង្កើតរសជាតិគឺជារឿងសំខាន់ ប៉ុន្តែទន្ទឹមនឹងនេះ ក៏ត្រូវមានកត្តាផ្សេងៗជាច្រើនទៀតចូលរួម ដូចជា សោភ័ណភាព អនាម័យ ការផ្តល់សេវាកម្មល្អ រួមជាមួយនឹងទីធ្លាចំណតដែលប្រកបដោយសុវត្ថិភាពខ្ពស់ផងដែរ”។
លោកបានបន្តទៀតថា “បច្ចុប្បន្ននេះ ក្រោមការទទួលបានភាពជោគជ័យលើអាជីវកម្មរបស់ខ្ញុំ ខ្ញុំបានសម្រេចចិត្តបង្កើតសាខាបន្ថែមទៀត ដោយជ្រើសយកទីតាំងដែលគួរជាទីទាក់ទាញ ទំនើប ស្អាត ទាន់សម័យ ដែលស័ក្តិសមទៅនឹងប្រភេទអាជីវកម្មរបស់ខ្ញុំ”។
ស្រដៀងគ្នានេះ លោក អឿន តុលា ម្ចាស់ហាង Bee Cocktail ក៏បានគាំទ្រមតិដែលបានលើកឡើងខាងលើនេះផងដែរ។
លោកបានមានប្រសាសន៍ថា “ធម្មតា អតិថិជនតែងចង់បាននូវអ្វីដែលថ្មី ល្អ ប្លែក ដែលសូម្បីតែចំណីអាហារដែលមានចម្អិន ក៏ត្រូវតែមានសិល្បៈក្នុងការរៀបចំ រួមជាមួយនឹងការតុបតែងលម្អទីតាំង ឱ្យមានភាពស៊ីវិល័យផងដែរ”។
លោកបានបន្តទៀតថា “ទីតាំងល្អស្អាត គឺជាចំណុចមួយដ៏ទាក់ទាញបំផុត ដែលអាចអនុញ្ញាតឱ្យអតិថិជនអង្គុយលេង បណ្តែតអារម្មណ៍ ជាមួយនឹងការទទួលទានអាហារដែលមានរសជាតិឆ្ងាញ់”។
លោកស្រី សុត សីម៉ា ម្ចាស់ហាងអាហារដ្ឋាន Happy Plate បានមានប្រសាសន៍ថា ក្រៅពីមានទីតាំងល្អ ប្រមូលផ្តុំទៅដោយអតិថិជនច្រើន ក៏ត្រូវតែចក្ខុវិស័យវែងឆ្ងាយ ច្បាស់លាស់ រួមជាមួយនឹងការចេះធ្វើផែនការអាជីវកម្ម និងការផ្សព្វផ្សាយពីចំណុចល្អ ភាពលេចធ្លោរបស់ហាងចេញទៅកាន់ទីផ្សាររួមផងដែរ ៕
