ដោយ ៖ រ៉ាណេត
កំពត ៖ លោកឧបនាយករដ្ឋមន្ត្រី ជា សុផារ៉ា នឹងបើកសម្ពោធគម្រោងអភិវឌ្ឍទីក្រុងថ្មីនៅលើភ្នំបូកគោ “កំណប់ឋានសួគ៌” ក្រោមការវិនិយោគដោយក្រុមហ៊ុន សុខា អូតែល រាប់លានដុល្លារនៅត្រឹមចុងសប្ដាហ៍ក្រោយនេះ ។
ការទន្ទឹងរង់ចាំរបស់អតិថិជន បានមកដល់ហើយគម្រោងថ្មីដ៏ធំអស្ចារ្យ “កំណប់ឋានសួគ៌” ជាការវិនិយោគរបស់ក្រុមហ៊ុនសុខា អូតែល នឹងរៀបចំបើកការដ្ឋានគម្រោងអភិវឌ្ឍលំនៅដ្ឋាននៅត្រឹមថ្ងៃទី៧ ខែមីនា ឆ្នាំ២០២០ ខាងមុខនេះ។
ក្រុមហ៊ុនសុខាអូតែល ជាក្រុមហ៊ុននាំមុខមួយនៃវិស័យបដិសណ្ឋារកិច្ច ក្នុងចំណោមក្រុមហ៊ុនធំៗ នៅព្រះរាជាណាចក្រកម្ពុជា និងជាក្រុមហ៊ុនដែលទទួលបាន សិទ្ធិសម្បទានធ្វើវិនិយោគអភិវឌ្ឍ នៅឧទ្យានជាតិព្រះមុនីវង្ស “បូកគោ” ។ ឧទ្យានជាតិព្រះមុនីវង្ស “បូកគោ” មានចម្ងាយប្រហែល ១៨៩ គ.ម តែប៉ុណ្ណោះ ពីរាជធានីភ្នំពេញ និងមានទីតាំងស្ថិតនៅជិត ហេដ្ឋារចនាសម្ព័ន្ធសំខាន់ៗ ដូចជា៖ កំពង់ផែទេសចរណ៍ខេត្តកំពត, កំពង់ផែទឹកជ្រៅខេត្តព្រះសីហនុ, ផ្លូវរថភ្លើង, និងព្រលានយន្តហោះអន្តរជាតិខេត្តព្រះសីហនុ ជាដើម។ មានផ្លូវគមនាគមន៍ធំៗជាច្រើន ដែលអាចធ្វើដំណើរទៅកាន់ តំបន់អភិវឌ្ឍភ្នំបូកគោនេះ ដូចជាផ្លូវជាតិលេខ៣ និងផ្លូវល្បឿនលឿនដែល កំពុងសាងសង់និងពង្រីកបន្ថែម ដែលគ្រោងនឹងបញ្ចប់រួចរាល់ ជាបន្តបន្ទាប់នាពេលឆាប់ៗខាងមុខនេះ ព្រមទាំងផ្លូវជាតិលេខ៤ និងផ្លូវលេខ៤១ ដែលជាផ្លូវជាតិដ៍សំខាន់សម្រាប់ ការធ្វើដំណើរទៅកាន់តំបន់នោះ នាពេលបច្ចុប្បន្ន លើសពីនេះ ការធ្វើដំណើរទៅទីនោះ តាមឧទ្ធម្ភាចក្រក៍បាន៕
