ដោយៈ រ៉ាណេត
ភ្នំពេញៈ ផ្នែកចំនួន៣នៃវិស័យអចលនទ្រព្យនៅកម្ពុជា រួមមាន លំនៅឋាន ដីធ្លី និងខុនដូ កំពុងតែមានតម្រូវការខ្ពស់ជាងគេ បើប្រៀបធៀបទៅនឹងផ្នែកដទៃទៀត នៃវិស័យមួយនេះក្នុងពេលបច្ចុប្បន្ន។ នេះបើតាមការបញ្ជាក់ពីប្រធានសមាគមអ្នកជំនាញអចលនទ្រព្យកម្ពុជា។
ប្រធានសមាគមអ្នកជំនាញអចលនវត្ថុកម្ពុជា (CREA) លោកស្រីចេវ សុឃុន បានមានប្រសាសន៍ប្រាប់តាមទូរស័ព្ទ កាលពីល្ងាចថ្ងៃទី២៣ ខែមិថុនា ឆ្នាំ២០២០ថា នៅលើទីផ្សារអចលនទ្រព្យនៅពេលបច្ចុប្បន្ននេះ ផ្នែកចំនួន៣ រួមមាន លំនៅឋាន ដីធ្លី និងខុនដូ កំពុងតែមានតម្រូវការឈានមុខគេ លើកម្លាំងបញ្ជាទិញ ហើយនៅតែបន្តទៅថ្ងៃខាងមុខទៀត ជាពិសេសក្រោយពេលវិបត្តិជំងឺឆ្លងជាសាកល ត្រូវផុតរលត់ទាំងស្រុង។
លោកស្រីបញ្ជាក់ថា “ប្រជាជនកម្ពុជានៅតែបន្តមានតម្រូវការ លំនៅឋានសម្រាប់ស្នាក់នៅជាច្រើនទៀត ជាពិសេសប្រភេទលំនៅដ្ឋានតម្លៃសមរម្យ ដែលការផ្គត់ផ្គង់នៅពេលបច្ចុប្បន្ននេះ នៅមិនទាន់គ្រប់គ្រាន់នៅឡើយនោះទេ” ។ លោកស្រីបន្តថា “លំនៅឋាន ជាតម្រូវការចាំបាច់មុនគេរបស់មនុស្សគ្រប់រូប ដូច្នេះបន្ទាប់ពីតម្រូវការអាហារ គឺលំនៅដ្ឋាននេះតែម្ដង។ ក្រោយពីបំពេញតម្រូវការទាំង២នេះគ្រប់គ្រាន់ ទើបបំបែកគោលបំណងទៅលើការសន្សំទុកនូវទ្រព្យ តាមរយៈការធ្វើអាជីវកម្ម និងមុខជំនួញផ្សេង” ។
ក្រៅពីតម្រូវការទីផ្សារផ្នែកលំនៅឋាន សម្រាប់ ដីធ្លី និងខុនដូ ក៏ត្រូវបានគេសម្លឹងឃើញថា មានស្ថានភាពល្អប្រសើរ ក្នុងខណៈពេលដែលផ្នែកដទៃទៀត នៅក្នុងវិស័យអចលនទ្រព្យកំពុងជួបភាពជាប់គាំង។
លោកស្រី ចេវ សុឃុន បានមានប្រសាសន៍ថា “ដីធ្លីដែលមានតម្លៃទាបជាងទីផ្សារ និងមានតម្លៃចាប់ពី៥០ម៉ឺនដុល្លារចុះក្រោម នៅតែមានតម្រូវការ ខណៈពេលដែលអ្នកជំនួញនៅក្នុងផ្នែកមួយនេះ នៅតែបន្តស្វែងរកទិញទុកធ្វើការវិនិយោគបន្តយកចំណេញ។ លោកស្រីបន្ថែមថា “ដោយឡែកចំពោះប្រភេទដីឡូតិ៍ ក៏មានតម្រូវការពីអ្នកដែលមានធនធានតិច ដែលចងទិញទុកដោយការសន្សំ ឬបង់រំលោះសម្រាប់សង់លំនៅឋានស្នាក់នៅផងដែរ” ។
ដោយឡែកសម្រាប់ទីផ្សារខុនដូ ត្រូវបានលោកស្រីបញ្ជាក់ថា “បច្ចុប្បន្នទីផ្សារខុនដូ ក៏មានតម្រូវការដូចគ្នា គ្រាន់តែមិនផុសផុលខ្លាំងដូចកាលពីចុងឆ្នាំ២០១៩ ដែលភាគច្រើនអ្នកទិញជាអតិថិជនក្នុងស្រុក ដែលមានតម្រូវការប្រភេទខុនដូតម្លៃសមរម្យ ដោយក្នុងចំណោមអ្នកទិញទាំងនោះមាន២ប្រភេទ គឺអ្នកទិញដែលមានតម្រូវការជាក់ស្ដែងក្នុងការស្នាក់ដោយផ្ទាល់ និងអ្នកទិញទុកសម្រាប់វិនិយោគបន្ត” ។
សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍កាលពីដើមសប្ដាហ៍នេះ ក្នុងពិធីចុះត្រួតពិនិត្យវឌ្ឍនភាពការដ្ឋានសាងសង់ អាកាសយានដ្ឋានអន្តរជាតិភ្នំពេញថ្មីនៅស្រុកកណ្តាលស្ទឹង ខេត្តកណ្តាល ថា ប្រជាពលរដ្ឋខ្មែរ នៅតែមានលទ្ធភាពទិញលំនៅឋាន នៅតាមគម្រោងសាងសង់លំនៅឋាននានា បើទោះជាមានការរីករាលដាលជំងឺ Covid-19 ។
សម្ដេចបានមានប្រសាសន៍បន្តថា “ក្រុមហ៊ុនធំៗ ដែលសម្តេចបានជួបបានលើកឡើងថា ការលក់គម្រោងលំនៅឋាននានា នៅតែមាន គ្រាន់តែមានចំនួនតិចជាងមុន ដែលនេះបានឆ្លុះបញ្ចាំងថា ប្រជាជនខ្មែរនៅតែមានលទ្ធភាពទិញលំនៅឋាន ទោះបីមានវិបត្តិ Covid-19 ក៏ដោយ” ៕
