ដោយៈ រ៉ាណេត
ភ្នំពេញៈ ចាប់តាំងពីពាក់កណ្តាលត្រីមាសទី១ ឆ្នាំ២០២០ ទីផ្សារនៃការជួយអាគារការិយាល័យ (Office Space) ចាប់ផ្ដើមមានការធ្លាក់ចុះ ទាំងតម្រូវការ និងតម្លៃជួលយ៉ាងគំហុក។ យ៉ាងណាក៏ដោយ អ្នកជំនាញនៅក្នុងវិស័យមួយនេះ បានបង្ហាញពីក្ដីរំពឹងថាភាពល្អប្រសើរអាចនឹងងើបឡើងវិញ នៅក្នុងត្រីមាសទី៤ខាងមុខនេះ ឬយ៉ាងយូរនៅដើមឆ្នាំក្រោយ។
នាយិកាប្រចាំប្រទេសក្រុមហ៊ុន CBRE Cambodia លោកស្រី អាន សុធីតា បានមានប្រសាសន៍កាលពីរសៀលថ្ងៃទី២៥ ខែមិថុនា ឆ្នាំ២០២០ថា ដោយសារតែវិបត្តិនៃជំងឺឆ្លង ចាប់តាំងពីពាក់កណ្តាលត្រីមាសទី១ ឆ្នាំ២០២០ ទីផ្សារនៃការជួលអាគារការិយាល័យត្រូវបានធ្លាក់ចុះយ៉ាងខ្លាំង។
លោកស្រីបន្តថា “ទីផ្សារនៃការជួយអាគារការិយាល័យ នៅក្នុងត្រីមាសទី១ ឆ្នាំ២០២០ គឺមានការធ្លាក់ចុះយ៉ាងខ្លាំង ប៉ុន្តែនៅត្រឹមដើមត្រីមាសទី២ ហាក់មានភាពងើបឡើងវិញបន្តិច ដោយសារតែការគ្រប់គ្រងនៃការរាលដាល នៃជំងឺឆ្លងរបស់រដ្ឋាភិបាលទទួលបានលទ្ធផលល្អប្រសើរ ជាពិសេសម្ចាស់អាគារមួយចំនួន បានប្រើយុទ្ធសាស្ត្របញ្ចុះតម្លៃ ដើម្បីជួយសម្រាលដល់អតិថិជនចាស់ និងឈោងចាប់យកអតិថិជនថ្មី” ។
លោកស្រីអាន សុធីតាបានបន្តទៀតថា បច្ចុប្បន្ននេះ តាមការមើលពីភាពជាក់ស្ដែង ទីផ្សារជួលអាគារការិយាល័យ ហាក់មានភាពល្អប្រសើរជាងពេលមុនបន្តិច ហើយក៏ល្អជាងទីផ្សារជួល ទីតាំងលក់រាយនៅតាមបណ្តាផ្សារនើបផងដែរ ដែលគេរំពឹងថា នឹងកានតែមានស្ថានភាពល្អជាងនេះនៅត្រីមាសបន្ទាប់ ជាពិសេសនៅដើមឆ្នាំក្រោយ ខណៈដែលការភាពភ័យខ្លាចនៃការឆ្លងជំងឺត្រូវបានកាត់បន្ថយ ហើយការគ្រប់គ្រងស្ថានការរបស់រដ្ឋាភិបាលកាន់តែទទួលបានលទ្ធផលវិជ្ជមាន” ។
អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Coldwell Banker Cambodia លោក Ken Lo បានមានប្រសាសន៍ថា អ្នកវិនិយោគ និងអភិវឌ្ឍន៍ក្នុងស្រុកភាគច្រើនហាក់មើលរំលង លើទីផ្សារជួលអាគារការិយាល័យ ខណៈដែលទីផ្សារមួយនេះនឹងមានប្រជាប្រិយភាពខ្លាំង ក្រោយពេលវត្តមានវិនិយោគិន និងក្រុមហ៊ុនអន្តរជាតិចូលមកកាន់ទីផ្សារកម្ពុជាកាន់តែច្រើន។
លោកបានមានប្រសាសន៍ “បច្ចុប្បន្ននេះយើងទទួលស្គាល់ថា ទីផ្សារជួលអាគារការិយាល័យបានធ្លាក់ចុះ ប៉ុន្តែវាជាការធ្លាក់ចុះទាំងព្រមជាមួយវិស័យផ្សេងទៀត ហើយវានឹងកើនឡើងវិញ ក្រោយពេលស្ថានការដែលកំពុងប្រឈមមានភាពល្អប្រសើរ” ។ លោកបន្តថា “ចាប់ពីពេលនេះទៅ មិនថាក្រុមហ៊ុនមកពីក្រៅស្រុក ឬក្រុមហ៊ុនបង្កើតឡើងនៅក្នុងស្រុកយើងនោះទេ គឺគេត្រូវការទីតាំងក្រុមហ៊ុនដែលមានស្ដង់ដារ ដែលក្រៅពីបង្កើនសោភ័ណភាពដល់ក្រុមហ៊ុន ថែមទាំងអាចផ្តល់នូវទំនុកចិត្តដល់ក្រុមហ៊ុនជាដៃគូ ក៏ដូចជាអតិថិជនរបស់ខ្លួន ខុសប្លែកកាលពីពេលមុន ដែលជួលត្រឹមតែជាផ្ទះល្វែង ឬវីឡាសម្រាប់ធ្វើជាទីស្នាក់ការរបស់ក្រុមហ៊ុនទៀតនោះទេ” ។
លោក Ken Lo បានមានប្រសាសន៍បញ្ជាក់ថា ក្រោយពេលវិបត្តិដែលកំពុងកើតមានត្រូវបានផុតរលត់ វិនិយោគិនអន្តរជាតិជាច្រើន នឹងចូលមកកាន់ទីផ្សារកម្ពុជាសាជាថ្មី ដោយសារតែកម្ពុជាជាគោលដៅរបស់ពួកគេ ដែលអាចមានឱកាសច្រើនក្នុងវិនិយោគ និងទទួលបានចំណេញខ្ពស់ បើប្រៀបធៀបទៅនឹងប្រទេសជិតខាង ដែលស្ថិតនៅក្នុងតំបន់។
លោកបន្តថា “បើតាមការព្យាករណ៍របស់ខ្ញុំ យ៉ាងយូរអាចនៅត្រឹមដើមឆ្នាំក្រោយនេះ ទីផ្សារជួលការិយាល័យកម្រិតស្តង់ដារ នឹងមានភាពល្អប្រសើរឡើងវិញ ដែលផ្តើមចេញទីតម្រូវការក្នុងស្រុក” ៕
