ដោយ វុត្ថា
ភ្នំពេញ៖ លោកឧកញ៉ា ម៉ុង ឬទ្ធី អគ្គនាយកក្រុមហ៊ុនម៉ុង ឬទ្ធីគ្រុប បានអំពាវនាវដល់បណ្តាជនអ្នកដែលមានដីទំនេរទុកចោល ត្រូវរកលុយដើម្បីយកមកអភិវឌ្ឍន៍ដើម្បីផ្តល់ឱកាសការងារបន្ថែមជូនពលរដ្ឋ។
លោកឧកញ៉ា ម៉ុង ឬទ្ធី ដែលជាមហាសេដ្ឋីផ្នែកកសិកម្ម បានឱ្យដឹងកាលពីចុងសប្តាហ៍កន្លមកនេះ ថា ខណៈដែលពិភពលោក ក៏ដូចជាកម្ពុជាកំពុងទទួលរងនូវផលប៉ះពាល់នូវការរាតត្បាតនៃជំងឺកូវីដ ១៩ អ្នកដែលមានទ្រព្យសម្បត្តិជាប្រភេទដីធ្លីទុកចោល គួរតែអភិវឌ្ឍន៍ដីនោះ តែបើមិនបានធ្វើគួរកុំបង្កើតកំហុស និង រំខានដល់អ្នកអភិវឌ្ឍផ្សេងទៀត។
លោកឧកញ៉ាថ្លែងថា “ខ្ញុំសូមអំពាវនាវដល់អ្នកមានទ្រព្យសម្បត្តិ ដីធ្លីទុកទំនេរចោលសុំមេត្តាយកប្រាក់មកអភិវឌ្ឍន៍ដីនេះ ដើម្បីជួយបង្កើតការងារបន្ថែមទៀតអោយបានដល់ប្រជាពលរដ្ឋយើងបានធ្វើ តែបើមិនធ្វើអីទេសុំមេត្តាកុំទៅដើររករឿង នាំអោយរំខានដល់អ្នកដែលកំពុងតែអភិវឌ្ឍន៍ ជាធម្មតាអ្នកធ្វើតែងតែមានកំហុសតិច ឬច្រើនមិនខានឡើយ” ។
ជាមួយគ្នានេះ លោកឧកញ៉ា ម៉ុង ឬទ្ធី បាននឹងកំពុងជំរុញដល់ការអភិវឌ្ឍ តំបន់អភិវឌ្ឍន៍កសិទេសចរណ៍របស់លោក នៅលើផ្ទៃដីររាប់រយហិកតាស្ថិតនៅក្នុងខេត្តកំពង់ស្ពឺ ឱ្យបានចប់តាមផែនការ ដើម្បីចូលរួមជាមួយរដ្ឋាភិបាលកម្ពុជាក្នុងការអភិវឌ្ឍន៍វិស័យទេសចរណ៍ ខណៈវិស័យមួយនេះ បាននឹងកំពុងជួបនូវវិបត្តិយ៉ាងធ្ងន់ធ្ងរដោយសារជំងឺ Covid-19 ។
លោកឧកញ៉ាថ្លែងថា “ខ្ញុំចុះមកពិនិត្យមើលសកម្មភាពការងារនៅក្នុងតំបន់អភិវឌ្ឍន៍កសិទេសចរណ៍ម៉ុង ឫទ្ធីសែនជ័យដើម្បីជំរុញលើគ្រប់វិស័យអោយឆាប់ហើយរួចរាល់ជាស្ថាពរ ដើម្បីចូលរួមចំណែកអភិវឌ្ឍន៍វិស័យទេសចរណ៍ជាមួយរាជរដ្ឋាភិបាលដែលដឹកនាំដោយសម្តេចតេជោហ៊ុន សែននាយករដ្ឋមន្ត្រីនៃក្រកម្ពុជា” ។
លោកឧកញ៉ាបញ្ជាក់ទៀតថា “ក្នុងងន័យជួយបង្កើតការងារអោយដល់ប្រជាពលរដ្ឋបន្ថែមទៀត នៅក្នុងឱកាសដែលប្រទេសជាតិយើងក៏ដូចជាពិភពលោកទាំងមូល កំពុងតែទទួលរងនូវជម្ងឺឆ្លងកូរូណាកូវិដ១៩ ដ៏មហាប្រលៃនេះ” ។
លោកឧកញ៉ា ម៉ុង ឬទ្ធី ជាព្រឹទ្ធសមាជិក និងជាពាណិជ្ជករ និងវិនិយោគិនដ៏មានឈ្មោះល្បីម្នាក់នៅប្រទេសកម្ពុជាដែលបានបោះទុនវិនិយោគលើវិស័យសំខាន់ៗ ជាច្រើននៅក្នុងប្រទេស រួមមានវិស័យកសិកម្ម ទេសចរណ៍ ចំការដូងប្រេ ងនិង កំពង់ផែនស្ថិតនៅក្នុងខេត្តព្រះសីហនុ ៕
