ដោយ ៖ រ៉ាណេត
ស្វាយរៀង ៖ វិស័យសំណង់នៅក្នុងខេត្តស្វាយរៀង ជាពិសេស នៅក្រុងបាវិតដែលជាតំបន់ពាណិជ្ជកម្មពិសេសជាប់ព្រំដែន នៅតែបន្តសកម្មភាពអភិវឌ្ឍន៍ និងសាងសង់ដដែល ដោយមិនស្ងប់ស្ងាត់ដោយសារវិនត្តិសេដ្ឋកិច្ចនោះឡើយ។ នេះបើតាមការអះអាងរបស់លោកអភិបាលរងខេត្តស្វាយរៀង។
អភិបាលរងខេត្តស្វាយរៀង លោក លោក រស់ ផារិទ្ធ បានអះអាងនៅក្នុងសន្និសីទសារព័ត៌មានស្តីពីវឌ្ឍនភាព និងទិសដៅការងារបន្តរបស់រដ្ឋបាលខេត្តស្វាយរៀង នៅថ្ងៃទី៧ ខែកក្កដា ឆ្នាំ២០២០ ថាវិស័យសំណង់នៅក្នុងខេត្តស្វាយរៀងនាពេលបច្ចុប្បន្ននេះ នៅតែបន្តមានការភាពចំរើនគួរឱ្យកត់សម្គាល់ និងគួរជាទីទាក់ទាញមិនចាញ់បណ្តាខេត្តមួយចំនួនរបស់កម្ពុជានោះទេ។
លោកបានបញ្ជាក់ថា “ទាំងវិស័យសំណង់លំនៅដ្ឋាន ទាំងសំណង់អាគារខ្ពស់ៗ សម្រាប់បម្រើដល់វិស័យទេសចរណ៍ និងពាណិជ្ជកម្មផ្សេងៗ បាន និងកំពុងបន្តការសាងសង់ដោយមិនមានការផ្អាក់នោះទេ ហើយរដ្ឋបាលខេត្តក៏ទទួលបានលិខិតស្នើសុំធ្វើអាជីវកម្មពីវិស័យឯកជនមួយចំនួនទៀត ដែលភាគច្រើនគឺស្ថិតនៅក្នុងវិស័យសំណង់” ។
នាយកក្រុមហ៊ុនភ្នាក់ងារអចលនទ្រព្យ Kraty Realthy Co,. Ltd លោក ចក់ ស៊ីណាត បានមានប្រសាសន៍ប្រាប់តាមទូរស័ព្ទនៅល្ងាចថ្ងៃទី៧ ខែកក្កដា ឆ្នាំ២០២០ថា បើនិយាយពីវិស័យអចលនទ្រព្យនៅក្នុងខេត្តស្វាយរៀង ភាគច្រើនគេផ្តោតសំខាន់ទៅក្រុងបាវិត ដែលជាមជ្ឈមណ្ឌលពាណិជ្ជកម្ម និងជាតំបន់សេដ្ឋកិច្ចពិសេសនៅព្រំដែន ច្រើនជាងនៅទីរួមខេត្ត។
លោកបានបន្តថា “ពាក់ព័ន្ធទៅនឹងសកម្មភាពសាងសង់សំណង់ដែលកំពុងបន្តសកម្មភាពទាំងអស់ដូចការលើកឡើងខាងលើ ភាគច្រើនអាចជាគម្រោងចាស់ដែលបន្សល់ទុកតាំងពីឆ្នាំមុន ដែលវាមិនមែនជាគម្រោងថ្មីដែលទើបតែចាប់ផ្តើមនៅដើមឆ្នាំ២០២០នោះទេ” ។ លោកថា “គម្រោងសំណង់ធំៗ មិនមែនចំណាយពេលត្រឹម១ឆ្នាំអាចបញ្ចប់ការសាងសង់នោះទេ មិនថាចំពោះគម្រោងសំណង់បណ្តុំលំនៅដ្ឋាន ឬជាគម្រោងអាគារខ្ពស់ៗសម្រាប់បម្រើដល់វិស័យពាណិជ្ជកម្មនោះទេ ប៉ុន្តែទោះជាយ៉ាងណាក៏ដោយ សកម្មភាពទាំងអស់នេះ ជាចំណែកមួយយ៉ាងសំខាន់នៅក្នុងការជួយគាំទ្រនូវភាពរីកចម្រើន និងអភិវឌ្ឍន៍ក្នុងវិស័យសំណង់ ក៏ដូចជាទីផ្សារអចលនទ្រព្យផងដែរ” ។
លោក ចក់ ស៊ីណាត បានបន្តទៀតថា “ភាពស្ងប់ស្ងាត់នៃតម្រូវការទីផ្សារអចលនទ្រព្យនៅក្នុងក្រុងបាវិតគឺបណ្តាលមកពីបញ្ហានៃវិបត្តិជំងឺឆ្លង ដែលអាជីវកម្មធំៗមួយចំនួនត្រូវបានផ្អាក់ដំណើរការ ដូចជា អាជីវកម្មកាស៊ីណូ មណ្ឌលកម្សាន្ត រោងចក្រមួយចំនួន ប៉ុន្តែនៅពេលថ្មីៗនេះ រាជរដ្ឋាភិបាលបានសម្រេចអនុញ្ញាតឱ្យអាជីវកម្មទាំងនេះបើកដំណើរការឡើងវិញ វានឹងជួយជំរុញឱ្យសកម្មនៃតម្រូវការទីផ្សារអចលនទ្រព្យមានសកម្មភាពឡើងវិញ ដោយរាប់បញ្ចូលចាប់ពីទីផ្សារនៃការជួលអាគារអាជីវកម្ម និងអាគារសម្រាប់ស្នាក់នៅឡើងទៅ” ។
អ្នកវិភាគសេដ្ឋកិច្ច និងអចលនទ្រព្យមួយចំនួនបានធ្វើការអះអាងស្រដៀងគ្នាថា ការវិនិយោគនៅក្នុងក្រុងបាវិតនឹងបន្តកើនឡើង ហើយប្រែក្លាយជាមជ្ឈមណ្ឌលសេដ្ឋកិច្ចនាពេលអនាគត ដោយសារមានភាពអំណោយផលលើកក្តាទីតាំងភូមិសាស្ត្រ តភ្ជាប់រវាងប្រទេសកម្ពុជា និងវៀតណាម ដែលមានសេដ្ឋកិច្ចលូតលាស់លឿនបំផុតលើពិភពលោក។ បន្ថែមពីនេះ ក្រុងបាវិតត្រូវបានរៀបចំហេដ្ឋារចនាសម្ព័ន្ធយ៉ាងល្អ មានអំណោយផលដល់ការដឹកជញ្ជូនឆ្លងកាត់ព្រំដែន ទៅកាន់កំពង់ផែទឹកជ្រៅរបស់វៀតណាម ខណៈដែលរាជរដ្ឋាភិបាលកម្ពុជាបានដាក់ក្រុងបាវិត តំបន់ឧស្សាហកម្មពិសេស ស្ថិតក្នុងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ៕
