ដោយៈ រ៉ាណេត
ភ្នំពេញៈ ជាមួយនឹងការអភិវឌ្ឍន៍ក្នុងវិស័យសំណង់ នៅទូទាំងរាជធានីភ្នំពេញ បច្ចុប្បន្នកំណើន នៃចំនួនគម្រោងសាងសង់សំណង់បុរីលំនៅដ្ឋាន បានកើនឡើងរហូតដល់ដល់២៦៣ទីតាំង ដោយក្នុងនោះមួយចំនួនធំ ត្រូវបានបង្ហាញរូបរាងនៅតាមតំបន់ជាយក្រុង។
អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ានួនរិទ្ធីដែលជាអ្នកអភិវឌ្ឍន៍ក្នុងវិស័យលំនៅដ្ឋានបានមានប្រសាសន៍ប្រាប់តាមទូរស័ព្ទនៅល្ងាចថ្ងៃទី៧ខែតុលាឆ្នាំ២០២០ថាតម្រូវការទីផ្សារលំនៅដ្ឋាននៅតែបន្តមានជាពិសេសនៅតាមតំបន់ជាយក្រុងដែលកំពុងមានតម្រូវការខ្ពស់។
លោកឧកញ៉ាបន្តថា “កំណើននៃចំនួនគម្រោងអភិវឌ្ឍន៍ នៅទូទាំងរាជធានីភ្នំពេញ ទី១ គឺបណ្តាលមកពីភាពមានតម្រូវការជាក់ស្ដែង និងពិតប្រាកដរបស់ប្រជាពលរដ្ឋ ហើយទី២ បណ្តាលមកពីការពង្រីកតំបន់គ្រប់គ្រងរដ្ឋបាល របស់រាជធានីភ្នំពេញកាន់តែធំទូលាយជាងមុន”។
ដូច្នេះរាល់ការពង្រីកតំបន់រដ្ឋបាល រួមជាមួយនឹងការអភិវឌ្ឍលើផ្នែកហេដ្ឋារចនាសម្ព័ន្ធនានាដែលវិនិយោគដោយរដ្ឋាភិបាល គឺជំរុញឱ្យមានតម្រូវការលើការអភិវឌ្ឍលំនៅ ដ្ឋានផងដែរ។
លោកឧកញ៉ានួន រិទ្ធី បានមានប្រសាសន៍បន្តទៀតថា “រាល់ការអភិវឌ្ឍគឺសុទ្ធតែពាក់ព័ន្ធទៅនឹងផែនការយុទ្ធសាស្ត្រ របស់រាជរដ្ឋាភិបាលក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា”។លោកបន្តថា “ក្នុងការពង្រីកនូវសក្ដានុពលប្រព័ន្ធហេដ្ឋារចនាសម្ព័ន្ធ និងវិស័យថាមពល ដែលក្រៅពីការតភ្ជាប់ពីតំបន់ខាងកើតទៅតំបន់ប៉ែកខាងលិចនោះទេ ប៉ុន្តែថែមទាំងបានអនុវត្ត និងតភ្ជាប់នូវផ្នែកខ្លះទៀតនៃទីក្រុង និងជនបទតាមរយៈការសាងសង់ផ្លូវ ស្ពានជាដើម”។
លោកបន្តថា ជាក់ស្ដែងនៅតំបន់ប៉ែកខាងកើត នៃតំបន់កៀនស្វាយដែលពីមុនធ្លាប់តែជាតំបន់ដាច់ស្រយាល់ចំណុះខេត្តកណ្តាល បច្ចុប្បន្ននេះ មួយចំណែកនៃស្រុកនេះត្រូវកាត់មកចំំណុះរាជធានីភ្នំពេញ ហើយចំណែកនៃតំបន់ខ្លះទៀត កំពុងមានការអភិវឌ្ឍយ៉ាងសកម្មដែលបម្រើដល់វិស័យលំនៅដ្ឋាន និងវិស័យឧស្សាហកម្មផងដែរ”។
លោកម៉ាន់ ចាន់ឌី អគ្គនាយកក្រុមហ៊ុន PREMIUM GROUP បានមានប្រសាសន៍ថា “មិនថាពេលនេះ ឬបន្តទៅថ្ងៃខាងមុខនោះទេ វិស័យលំនៅដ្ឋាននៅតាមតំបន់ជាយក្រុងនៅតែមានតម្រូវការ ដោយសារតែកំណើនប្រជាជន ចូលមករស់នៅរាជធានីភ្នំពេញកាន់តែកើនឡើងជាលំដាប់ ជាក់ស្ដែងនិយាយត្រឹមតែវត្តមានរបស់និស្សិត ដែលមកពីតាមបណ្តាខេត្តនានា ដើម្បីសិក្សាបន្ត និងបម្រើការងារមានរហូតជិតដល់៥ម៉ឺននាក់ក្នុងមួយឆ្នាំ។
លោកបានបន្តទៀតថា “កំណើននៃចំនួននិស្សិត លំហូរនៃចំនួនប្រជាជនចំណូលថ្មីមកកាន់រាជធានីភ្នំពេញ សុទ្ធតែមានតម្រូវការស្នាក់នៅ ខណៈដែលកំណើននៃចំនួនសំណង់លំនៅដ្ឋាននៅពេលបច្ចុប្បន្ន នៅមិនទាន់គ្រប់តម្រូវការនៅឡើយនោះទេ”។លោកបន្តថា “លំនៅដ្ឋានដែលមានទីផ្សារ និងតម្រូវការខ្ពស់បច្ចុប្បន្ននេះ ជាប្រភេទលំនៅដ្ឋានតម្លៃមធ្យម ដែលស្ថិតនៅក្នុងចន្លោះ ជាង៦ម៉ឺន ទៅ៨ម៉ឺនជាង”៕
