ដោយដែន ចែងចាំង
ភ្នំពេញ: សមាគមផលិតប្រហុកខ្មែរស្តង់ដារ បានបង្ហាញផែនការថ្មីរបស់ខ្លួន តាមរយៈការរៀបចំគម្រោងមួយដើម្បីកែច្នៃប្រហុកឲ្យមានស្តង់ដារប្រើប្រាស់ក្នុងស្រុក និងជម្រុញការនាំចេញទៅក្រៅប្រទេស។
លោកស្រីបណ្ឌិត កៅ សុជីវី បានមានប្រសាសន៍ឲ្យដឹង ក្នុងពិធីបើកវគ្គបណ្តុះបណ្តាលស្តីពីការលើកកម្ពស់សុវត្ថិភាព អនាម័យល្អ ការផលិតល្អ លើការកែច្នៃប្រហុកនិងស្តង់ដារផលិតផលប្រហុកកម្ពុជា នាព្រឹកថហងៃទី២៨ ឧសភា ឆ្នាំ២០១៨នេះថា វគ្គបណ្តុះបណ្តាលនេះរៀបចំឡើងក្នុងគោលបំណងដើម្បីលើកកម្ពស់គុណភាព និងសុវត្ថិភាពផលផលិតផលជលផល ផ្តល់ចំណេះដឹងនិងបទពិសោធន៍ទៅវិញទៅមកលើកកម្ពស់បច្ចេកកែច្នៃ ផ្អែកលើស្តង់ដារអនាម័យ កាត់បន្ថយការបាត់បង់លើផលផលិតផលជលផល និងកាត់បន្ថយការចំណាយលើសុខភាពសាធារណ:។
លោកស្រីបន្តថា “នាថ្ងៃអនាគត សមាគមផលិតផលប្រហុកខ្មែរស្តង់ដារ នឹងនាំយកផលិតផលប្រហុក ដែលកែច្នៃរួចជាច្រើនប្រភេទទៅដាក់លក់នៅទីផ្សារក្រៅប្រទេស ជៀសវាងមានការបន្លំពីជនខិលខូច”។លោកស្រីបានបន្តថា “ខ្ញុំធ្លាប់បានឃើញមកហើយថា ផលិតផលរបស់ខ្មែរត្រូវបានជនខិលខូចយកទៅកែច្នៃ និងវេចខ្ចប់សារជាថ្មីថាជារបស់ប្រទេសជាតិខ្លួនទៅវិញ”។
ត្រី និង ផលិតផលត្រី មិនត្រឹមតែជាម្ហូបអាហារមួយមុខទេ ថែមដើរតួនាទីយ៉ាងសំខាន់នៅក្នុងសន្តិសុខ ស្បៀង ពិសេសចំពោះប្រជាជននៅតាមជនបទ គ្រួសារដែលមានដីស្រែតិចតួច ឬក៏គ្មានដីសម្រាប់ធ្វើ កសិកម្ម គឺអាចធ្វើការដោះដូរជាមួយម្ហូបអាហារដទៃទៀត ដូចជា ស្រូវ អង្ករ និងពោតជាដើម។
យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ក្នុងរយៈពេល៤ខែដើមឆ្នាំ២០១៨នេះ កម្ពុជាបាននាំចេញផលិតផលនេសាទ ជាង៥០០តោនទៅកាន់ក្រៅប្រទេស៕
