ដោយគង់ សូរិយា
ភ្នំពេញៈ ក្រុមហ៊ុន OCIC បានបង្ហាញទំហំជាក់លាក់ទីក្រុងកោះនរា ជាផ្លូវការហើយ ខណៈទីក្រុងនេះកំពុងរៀបចំហេដ្ឋារចនាសម្ព័ន្ឋយ៉ាងសកម្ម ដើម្បីឆ្លើយតបនឹងល្បឿននៃការអភិវឌ្ឍរបស់ក្រុមហ៊ុននិងរដ្ឋាភិបាល។
ខណៈសម្លេងគ្រឿងចក្រ និងកប៉ាល់ដឹកខ្សាច់ និងថ្មបានបញ្ចេញសម្លេងយ៉ាងទ្រហឹងអឺងអាប់ នៅតំបន់ការដ្ឋានសាងសង់ទីក្រុងរណបកោះនរា ជាទីក្រុងថ្មីមួយដែលនឹងរួមចំណែកលើកកំពស់ សោភ័ណភាពនៅតំបន់ទន្លេចតុមុខ និងជួយជំរុញកំនើនសេដ្ឋកិច្ចជាតិ។
អគ្គនាយករងក្រុមហ៊ុន OCIC លោកទូច សំណាង បានមានប្រសាសន៍ឲ្យដឹងតាមទូរស័ព្ទកាលពីពេលថ្មីៗនេះថា ទីក្រុងកោះនរាមានទំហំ១២៥ហិកតា ដែលបច្ចុប្បន្ននេះការស្ថាបនាហេដ្ឋារចនាសម្ព័ន្ឋ សម្រេចបានប្រមាណ៣០ភាគរយហើយ ខណៈការស្ថាបនានេះនឹងបញ្ចប់នៅចុងឆ្នាំ២០២៣ខាងមុខ ប៉ុន្តែលោកបានបង្ហើបថា បច្ចុប្បន្នផ្នែកមួយចំនួនដូចជា Zone1, Zone2 បានបញ្ចប់ហើយ ដែលអ្នកទិញដីលើគំរោងនេះអាចចាប់ផ្តើមអភិវឌ្ឍន៍គំរោងរបស់ពួកគេបាន។
លោកបន្តថា “ការសាងសង់ស្ពានតភ្ជាប់ពីទីក្រុងកោះពេជ្រ និងទីក្រុងកោះនរាបានកំពុងដំណើរការយ៉ាងសកម្ម និងគ្រោងបញ្ចប់តាមការគ្រោងទុន ។ លោកបន្តថា “វាជាស្ពានយោងដោយខ្សែកាប ដែលមានរចនាបទខ្មែរហើយទំហំស្ពានធំជាងស្ពានតភ្ជាប់រវាងផ្លូវជាតិលេខ៥ ទៅកាន់ទីក្រុងរណបជ្រោយចង្វារ” ។
ការស្ថាបនាស្ពានតភ្ជាប់រវាងទីក្រុងរណបទាំងពីរនេះ គ្រោងចំណាយទឹកប្រាក់ប្រមាណ ៤០លានដល្លារអាមេរិក ហើយស្ពាននេះនឹងរួមចំណែកសម្រួល ការធ្វើចរាចរណ៍ពីផ្លូវជាតិលេខ១ ដើម្បីតភ្ជាប់មកកាន់រាជធានីភ្នំពេញ។
លោកបន្តថា “ទីក្រុងរណបកកោះនរា មានទស្សនទានផែនការអភិវឌ្ឍន៍ស្រដៀងគ្នានឹងទីក្រុងកោះពេជ្រនាពេលបច្ចុប្បន្ននេះ” ៕
