ដោយគង់ សូរិយា
ភ្នំពេញៈ គំរោងកសាងអភិវឌ្ឍន៍តំបន់ទេសចរណ៍ ទីក្រុងរាមក្នុងតំបន់ទេសចរណ៍នាគរាជតម្លៃ១៦ពាន់លានដុល្លារអាមេរិក បាននិងកំពុងចាក់ដីបំពេញឆ្នេរសមុទ្រ ដើម្បីត្រៀមដំណើរការកសាងទីក្រុងដ៏ធំនេះហើយ។
អ្នកនាំពាក្យរដ្ឋបាលខេត្តព្រះសីហនុ លោកឃាង ភារម្យ បានមានប្រសាសន៍ឲ្យដឹងតាមទូរស័ព្ទកាលពីថ្ងៃទី២៨ មករាកន្លងមកថា គំរោងនេះមានវិសាលភាពធំ ដោយមានផ្ទៃដីទំហំ៨៣៤ហិកតា ជាតំបន់ដែលត្រូវចាក់ដីបំពេញលើសមុទ្រ ដើម្បីកសាងទីក្រុងដ៏ធំនេះឡើង។ លោកបន្តថា គំរោងនេះស្ថិតនៅតំបន់រាម ក្បែរព្រលានយន្តហោះកងកេង ខេត្តព្រះសីហនុ។
លោកបន្តថា “គំរោងដែលបានទទួលការអនុម័តពីរដ្ឋាភិបាល នឹងជួយលើកកំពស់មុខមាត់ក្រុងព្រះសីហនុ និងជួយជម្រុញសេដ្ឋកិច្ចក្នុងខេត្តនេះ ឲ្យកាន់តែមានការរីកចម្រើនខ្លាំងនាពេលអនាគត” ។
យោងតាមសេចក្តីប្រកាសព៌តមាន ដែលបានចេញផ្សាយក្រោយកិច្ចប្រជុំគណៈកម្មធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា (គ អ ឆ ក)ដែលដឹកនាំដោយឧបនាយករដ្ឋមន្ត្រីជា សុផារ៉ារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគ អ ឆ ក ដែលបានផ្សព្វផ្សាយ កាលពីថ្ងៃទី១៤ កុម្ភៈ ឆ្នាំ២០២០កន្លងមកបានឲ្យដឹងថា អ អ ឆ ក គាំទ្រគំរោងអភិវឌ្ឍន៍ទេសចរណ៍ “ទីក្រុងរាម” នៅក្នុងតំបន់ទេសចរណ៍នាគរាជ ដែលស្នើដោយក្រុមហ៊ុន CANOPY SANDS Development Co, Ltd លើផ្ទៃដីទំហំ៨៣៤ហិកតា ដែលជាកម្មសិទ្ឋរបស់ក្រុមហ៊ុនក្នុងការរៀបចំទីតាំង និងចាប់ផ្តើមដំណើរការអនុវត្តន៍គំរោង។
សេចក្តីប្រកាសដដែលបានបង្ហាញថា គំរោងនេះត្រូវបានប៉ាន់ប្រមាណថា នឹងមានទុនវិនិយោគរហូតដល់១៦ពាន់លានដុល្លារ ដែលនឹងក្លាយជាតំបន់មានសក្តានុពលបំផុត នៅតំបន់ឆ្នេរសមុទ្រកម្ពុជា រួមចំណែកដល់ការអភិវឌ្ឍសេដ្ឋកិច្ច ផ្តល់ការងារធ្វើជាច្រើនដល់យុវជន និងប្រែក្លាយទៅជាតំបន់អភិវឌ្ឍន៍ទេសចរណ៍បែបគំរូ តាមទស្សនទាន “ស្អាត បៃតង ឆ្លាតវៃ” ។
គំរោងនេះត្រូវបែងចែកជាដំណាក់កាល ដោយត្រូវចាប់ផ្តើមអនុវត្តន៍ពីដើមឆ្នាំ២០២០ រួមមានការរៀបចំហេដ្ឋារចនាសម្ព័ន្ឋនិងសំណង់ផ្សេងៗ ដូចជា សណ្ឋាគារ ភោជនីយដ្ឋាន អាហារដ្ឋាន រមណីយដ្ឋាន អាគារស្នាក់នៅ សាលប្រជុំ សាលសន្និសីទ អាគារស្នាក់នៅរួម មជ្ឈមណ្ឌលពាណិជ្ជកម្ម ហិរញ្ញវត្ថុ មជ្ឈមណ្ឌលកីឡា ក្នុងនោះក៏មានកីឡាវាយកូនហ្គោលផងដែរ។
សេចក្តីប្រកាសព៌តមានបានបន្តថា គំរោងនេះនឹងត្រូវរៀបចំឆ្នេរខ្សាច់ស្អាតពីរកន្លែង ដើម្បីប្រើប្រាស់សាធារណៈ សម្រាប់ការអភិវឌ្ឍនៅតំបន់នោះផង ក៏ដូចជាសាធារណៈជន អាចចេញចូលប្រើប្រាស់តំបន់នោះ ដែលបច្ចុប្បន្នមិនទាន់មានខ្សាច់ស ស្អាតនៅឡើយ៕
