ដោយ ៖ រ៉ាណេត
ភ្នំពេញ ៖ លោកឧបនាយករដ្ឋមន្ត្រីជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានលើកឡើងថា បច្ចុប្បន្នព្រះរាជាណាចក្រកម្ពុជាកំពុងមានការរីកចំរើនលើគ្រប់វិស័យបើទោះបីជាប្រឈមនឹងហានិភ័យនៃវិបត្តិជំងឺកូវីដ១៩ យ៉ាងណាក្តី ហើយភាពរីកចំរើននេះ នឹងនៅតែបន្តបោះជំហានទៅមុខទៀតដើម្បីបង្កើនកិច្ចអភិវឌ្ឍន៍ប្រទេសជាតិ។
លោកឧបនាយករដ្ឋមន្ត្រីបានមានប្រសាសន៍នៅក្នុងកិច្ចសំណេះសំណាលជាមួយមន្ត្រីជាយុវជនក្រសួងរៀបចំដែនដី នគរូបនីយកម្ម និងសំណង់នៅថ្ងៃទី៤ ខែកុម្ភៈ ឆ្នាំ២០២១នេះថា “ជាមួយនឹងភាពរីកចម្រើនក្រោមការអនុវត្តតាមគោលនយោបាយរបស់រាជរដ្ឋាភិបាលកម្ពុជាដែលមានសម្ដេចតេជោ ហ៊ុន សែន ជាប្រមុខដឹកនាំទទួលការសាទរពីប្រជាពលរដ្ឋគ្រប់មជ្ឈដ្ឋាន លើកលែងតែក្រុមអគតិមួយចំនួនដែលមិនសាទរ ឬមិនគាំទ្រចំពោះសមិទ្ធិផលដែលប្រមុខរាជរដ្ឋាភិបាលកម្ពុជា”។
លោកបន្តថា សមិទ្ធផលទាំងអស់នេះរាជរដ្ឋាភិបាលបានកសាងឡើងមកដោយលំបាក ប៉ុន្តែបែរជាខំរិះរកវិធីសាស្ត្របង្កបញ្ហាដើម្បីរាំងស្ទះដល់ដំណើរការអភិវឌ្ឍរីកចំរើនរបស់ប្រទេសជាតិ និងសុខសន្តិភាពស្ថេរភាពនយោបាយទៅវិញ។ ទោះជាយ៉ាងណាក្តីយើងទាំងអស់គ្នានឹងមិនថយក្រោយ ហើយនឹងខិតខំប្រឹងប្រែងបោះជំហានទៅមុខសម្រាប់ជំរុញការអភិវឌ្ឍជាតិ និងស្ថេរភាពក្នុងតួនាទីជាគណបក្សដែលកំពុងកាន់អំណាច។
ជាមួយនឹងកិច្ចអភិវឌ្ឍន៍ប្រទេសជាតិកម្ពុជា កាលពីឆ្នាំ២០២០កន្លងទៅនេះ រដ្ឋាភិបាលទទួលបាន គម្រោងវិនិយោគសរុបចំនួន ២៣៨គ្រោង សរុបទុនវិនិយោគចំនួន ជាង៨ ២៥០លានដុល្លារ។ នៅក្នុងក្នុងគម្រោងវិនិយោគចំនួន ២៣៨គ្រោងដែលបានវិនិយោគនៅកម្ពុជា ឆ្នាំ២០២០ មានវិស័យកសិកម្ម និងកសិ-ឧស្សាហកម្ម ១៣គម្រោងទុនវិនិយោគ ១៤៧លានដុល្លារ, វិស័យឧស្សាហកម្ម និងកម្មន្ដសាល ២០៧គម្រោង ទឹកប្រាក់១ ៤៧០លានដុល្លារ, វិស័យទេសចរណ៍ ៧គម្រោង ទឹកប្រាក់វិនិយោគ ៣ ៨៦០លានដុល្លារ និងវិស័យហេដ្ឋារចនាសម្ព័ន្ធ និងផ្សេងៗ ១១គម្រោង ទឹកប្រាក់វិនិយោគ ២ ៧៧២លានដុល្លារ៕
