ដោយ:ស៊ីវ ម៉េង
ភ្នំពេញៈ គំរោងសាងសង់ខុនដូតម្លៃសមរម្យដំបូងគេរបស់ជប៉ុន ដែលវិនិយោគទឹកប្រាក់៧០លានដុល្លារអាមេរិក នឹងបញ្ចប់ការសាងសង់នៅឆ្នាំ២០២២ ខណៈគំរោងនេះទទួលបានជោគជ័យលើការលក់។
គិតរហូតមកទល់ពេលនេះ ការសាងសង់ដំណាក់កាលទី ១ សម្រេចបានប្រមាណ ៩០ ភាគរយ និងដំណាក់កាលទី ២ បានប្រមាណ ៣០ ភាគរយ ខណៈគម្រោងទាំងមូលនឹងត្រូវបញ្ចប់នៅត្រឹមពាក់កណ្តាលឆ្នាំ ២០២២។
លោក អៀង សុធារ៉ា សហស្ថាបនិកក្រុមហ៊ុន Arakawa Co., Ltd ដែលជាក្រុមហ៊ុនវិនិយោគគម្រោងArakawa Residenceបានមានប្រសាសន៍ឲ្យដឹងថា ក្រុមហ៊ុននេះបានសាងសង់Arakawa Resident លើផ្ទៃដី១,៣៦ ហិកតានៅក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។ គម្រោងដែលបើកការដ្ឋានសាងសង់កាលពីខែវិច្ឆិកា ឆ្នាំ ២០១៧ នេះត្រូវបានចែកចេញជា ២ ដំណាក់កាល ដោយដំណាក់កាលទី១ មានអគារកម្ពស់ ២១ ជាន់ចំនួន ១០ អគារ ស្មើនឹង ១ ៦៨០ យូនីត និងដំណាក់កាលទី២ មាន ៦ អគារ ស្មើនឹង ១ ៤៨៤ យូនីត (ពីមុនមាន ១ ២៨០)។ បន្ទប់ក្នុងគម្រោងនេះមាន ២ ប្រភេទ គឺទំហំ ២៣ ម៉ែត្រការ៉េ និង៤៦ម៉ែត្រការ៉េ។
លោកអៀង សុធារ៉ាបានមានប្រសាសន៍ឲ្យសារព៌តមានក្នុងស្រុកមួយដឹងកាលពីពេលថ្មីៗនជថា ជាមួយនឹងការប្រើប្រាស់កម្លាំងពលកម្មប្រមាណ១០០០នាក់ ក្នុង១ថ្ងៃ និងធ្វើឡើងទាំងថ្ងៃ-យប់ បច្ចុប្បន្នគម្រោងនេះបានបញ្ចប់ដំណាក់កាលទី១ ស្ទើរទាំងស្រុងហើយ ដោយនៅសល់តែការរៀបចំខាងក្នុង និងការសម្អាតប៉ុណ្ណោះ ។ចំណែកខុនដូដំណាក់កាលទី២ បានឡើងដល់ជាន់ទី៧ ហើយគ្រោងនឹងឡើងដល់ជាន់ទី២១ នៅក្នុងខែមិថុនា ឆ្នាំ២០២១។
លោកបន្តថា “តាមការរំពឹងទុក អតិថិជនក្នុងដំណាក់កាលទី១ អាចនឹងចូលស្នាក់នៅបានក្នុងអំឡុងខែកុម្ភៈ ឆ្នាំ២០២១និងដំណាក់កាលទី២ នៅពាក់កណ្តាលឆ្នាំ២០២២។លោកបន្តថា “គំរោងArakawa Residence ជាគម្រោងមានតម្លៃសមរម្យ ដែលត្រូវបានសាងសង់ឡើងប្រកបដោយគុណភាពកម្រិតស្តង់ដា”។
លោកអៀង សុធារ៉ាបានបន្ថែមថា សម្រាប់គម្រោងអគារក្នុងដំណាក់កាលទី២ នឹងត្រូវរួចរាល់នៅអំឡុងខែ ៦ ឆ្នាំក្រោយ ដូច្នេះខ្ញុំគិតថា ត្រឹមពាក់កណ្តាលឆ្នាំ ២០២២ ការសាងសង់គម្រោងទាំងមូលនឹងត្រូវបញ្ចប់ជាស្ថាពរ”។
កត្តាទីតាំង និងតម្លៃបានធ្វើឱ្យការលក់របស់ Arakawa Residence មានដំណើរការទៅមុខយ៉ាងលឿន ជាក់ស្តែងមកដល់ពេលនេះ ការលក់ដំណាក់កាលទី១ សម្រេចបាន ១០០ ភាគរយ និងដំណាក់កាលទី២ បានប្រមាណ២០ភាគរយ។
ទាក់ទងនឹងកែសម្រួលចំនួនយូនីត ក្នុងដំណាក់កាលទី២ ដែលពីមុនមានត្រឹម ១ ២៨០ យូនីត ហើយត្រូវបានកែទៅជា១ ៤៨៤ យូនីតនោះលោកបានប្រាប់ថា ដើម្បីតម្រូវទៅតាមការចង់បានក្នុងទីផ្សារ។
លោក សុធារ៉ា និយាយថា “តម្លៃរបស់ Arakawa Residence បើធៀបនឹងតម្លៃដី តម្លៃសំណង់ និងតម្លៃពលកម្ម គឺគេមិនអាចរកទិញគម្រោងណា ដែលល្អបែបនេះបានទេនាពេលនេះ”៕
