ដោយ គង់ សូរិយា
ភ្នំពេញ៖ គំរោងខុនដូប្រណីត AXIS Resident តម្លៃ៧០លានដុល្លារ ដែលវិនិយោគដោយជនជាតិសឹង្ហបុរី ត្រៀមបញ្ចប់ការសាងសង់ជាមួយនឹងទំនុកចិត្ត ដោយសារទីផ្សារខុនដូនៅក្រុងភ្នំពេញ នៅតែមានសញ្ញាល្អប្រសើរ។
អគ្គនាយកក្រុមហ៊ុនអចលនទ្រព្យស្លឹករឹត ដែលទទួលសិទ្ឋលក់ផ្តាច់មុខនៃគំរោងខុនដូ AXIS Resident លោកឃាង ពុទ្ឋីបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី១១ មិថុនានេះថា រហូតមកទល់ពេលនេះគំរោងខុនដូ AXIS Resident បានត្រៀមបញ្ចប់ការសាងសង់ហើយ ជាមួយនឹងការលក់ទទួលបានជោគជ័យ ព្រោះរហូតមកទល់ពេលនេះ យូនីត៦៤២ ក្នុងគំរោងខុនដូដែលមាន៨អាគារនេះបានលក់ អស់ជាង៦០ភាគរយហើយ។
ខុនដូនេះមានផ្ទះចាប់ពី១បន្ទប់ ដល់៣បន្ទប់គេង និងមានផ្ទះបែប Pen House ដោយលក់ក្នុងតម្លៃ ១៤២៨ដុល្លារ ដល់ ១៨៥៧ដុល្លារក្នុងមួយម៉ែត្រការ៉េ។ គំរោងនេះស្ថិតនៅលើវិថីដួង ងៀប៣ ខ័ណ្ឌសែនសុខ រាជធានីភ្នំពេញ។
លោកឃាង ពុទ្ឋីបានបន្តថា “ខុនដូ AXIS មានលក្ខណៈពិសេសជាច្រើន ដោយសារក្រុមហ៊ុនចង់ផ្តល់ឲ្យអ្នករស់នៅមានភាពកក់ក្តៅ និងផាសុខភាព ហេតុនេះទើបគំរោងនេះសាងសង់លើផ្ទៃដីធំទូលាយ និងមានពន្លឺចេញចូលគ្រប់គ្រាន់ក្នុងអាគារ”។ លោកបន្តថា “អ្វីកាន់តែពិសេស ក្រុមហ៊ុនបានផ្តល់សេវាកម្មដល់ អ្នករស់នៅក្នុងគំរោងនេះចំនួន២២មុខ ដូចជា អាងហែលទឹកធំទូលាយ ទីកន្លែងវាយតេនីស សួនកុមារ បណ្ណាល័យអានសៀវភៅ កន្លែងហាត់ប្រាណ ទីតាំងសម្រាប់ជប់លៀងជាដើម”។
គំរោងនេះត្រូវបានវិនិយោគដោយក្រុមហ៊ុន SPRING Development Tte និងក្រុមហ៊ុនSanwah Main Holding មកពីសឹង្ហបុរី។គំរោងនេះនឹងដាក់ឲ្យប្រើប្រាស់នៅខែមករា ឆ្នាំ២០១៩ខាងមុខនេះ។
លោកបន្តថា ទីផ្សារខុនដូនៅកម្ពុជាកាន់តែមានភាពប្រសើរឡើង ប៉ុន្តែអតិថិជនភាគច្រើនបានទិញគំរោងនេះជាជនបរទេស ដែលមានការគ្របដណ្តប់រហូតដល់ប្រមាណ៧០ភាគរយ ខណៈជនជាតិខ្មែរ ហាក់មិនទាន់ពេញនិយមស្នាក់នៅតាមខុនដូច្រើននៅឡើយ ប៉ុន្តែនិន្នាការទីផ្សារកំពុងកើនឡើង។
នាយិកាប្រចាំប្រទេសនៃក្រុមហ៊ុន CBRE Cambodia អ្នកនាងអាន សុធីតាបានថ្លែងថា នៅក្នុងត្រីមាសទី៣ឆ្នាំនេះ គំរោងខុនដូថ្មីៗ មិនសូវបានប្រកាសសាងសង់ច្រើននោះទេ ប៉ុន្តែទីផ្សារខុនដូនៅតែល្អប្រសើរជាធម្មតា សម្រាប់វិនិយោគិនក្នុងនិងក្រៅប្រទេសនៅតែចាប់អារម្មណ៍វិនិយោគ។
អ្នកនាងបន្តថា “ការលក់ខុនដូល្អខ្លាំងសម្រាប់គំរោងដែលស្ថិតនៅទីតាំងល្អ និងគំ រោងខុនដូដែលបានបញ្ចប់ការសាងសង់រួច ឬជិតបញ្ចប់ការសាងសង់ ព្រោះអ្នកវិនិយោគនាពេលនេះ ពួកគេមិនចង់ចំណាយពេលរង់ចាំច្រើននោះទេ”៕
