ដោយៈ សហការី
កំពត/កែបៈ ក្នុងស្ថានភាពនៃការរីករាលដាល ក្នុងសហគមន៍នៃជំងឺកូវីដ១៩ នៅក្នុងប្រទេសកម្ពុជាច្រើនយ៉ាងណាក៏ដោយ ក៏មានអ្នកស្វែងនៅតែបន្តរកទិញដីនៅក្នុងខេត្តកំពត និងកែបយ៉ាងសកម្មនៅឡើយ។
លោកលឹម រដ្ឋា ភ្នាក់ងារអចលនទ្រព្យមួយរូបប្រចាំខេត្តកំពត និងកែបបានថ្លែងប្រាប់នៅថ្ងៃទី២៦ ខែកុម្ភៈ ឆ្នាំ២០២១នេះថា ទោះបីជាមានឆ្លងរាលដាលក្នុងសហគមន៍ក្ដី តែភ្ញៀវដែលស្វែងរកដីធ្លី នៅក្នុងខេត្តកំពតនៅតែមាន ហើយរូបលោកក៏នៅតែបន្តជូនភ្ញៀវដើរមើលដីធ្លី បើសិនជាត្រូវគ្នាទៅលើទីតាំង និងតម្លៃគឺនឹងមានការទិញលក់ភ្លាមៗ ហើយសកម្មនេះ នៅតែបន្តមានជារៀងរាល់ថ្ងៃ។
លោកបន្តថា “នេះគឺជាឱកាសសម្រាប់អ្នកដែលចេះឆក់ឱកាស ក្នុងការទិញដីនៅពេលមានវិបត្តិ ព្រោះអ្នកដែលជួបប្រទះ នឹងវិបត្តិហិរញ្ញវត្ថុច្បាស់ជាត្រូវការប្រាក់ ដើម្បីដោះស្រាយបញ្ហាចំពោះមុខ ដូច្នេះតម្លៃល្មមៗក្រោមទីផ្សារពួកគាត់នឹងលក់” ។
លោករដ្ឋាបានបន្ថែមថា អ្នកស្វែងរកទិញដីនៅពេលនេះ ពួកគាត់ទិញដីប្រភេទដីចំការ ដីទំនេរ ឬដីដែលមានសក្ដានុពលវិនិយោគ នៅពេលអនាគត ដូចជានៅតាមមាត់ព្រែក ជាប់ផ្លូវសំខាន់ ផ្លូវជាតិជាដើម។
ចំណែកលោកកែវ សុជាតិភ្នាក់ងារអចលនទ្រព្យ និងជាអ្នកវិនិយោគមួយរូបនៅខេត្តកំពតក៏បានឱ្យដឹងថា ទោះបីជាមានការឆ្លងជាសហគមន៍នៃកូវីដ១៩ ក្នុងពេលនេះក្តី តែជំងឺនេះ មិនទាន់រាលដាលមកដល់ខេត្តកំពតនៅឡើយទេ ដូច្នេះវិនិយោគិនដែលបានចាប់ផ្ដើមសាងសង់ គម្រោងរបស់ខ្លួនក្នុងឆ្នាំ២០២១នេះ នៅតែបន្តដំណើរការ ដោយមិនទាន់មានគម្រោងណាមួយ ត្រូវផ្អាកដោយសារតែការឆ្លងរាលដាល ជាសហគមន៍នៅឡើយទេ។
លោកបណ្ឌិតគីម ហ៊ាងប្រធាន KW Cambodia កន្លងមកបានបញ្ជាក់ថា ក្នុងជំនួញអចលនទ្រព្យដីធ្លី ចង់ជោគជ័យ ត្រូវប្រកាន់ខ្ជាប់នូវទ្រឹស្តីមួយ ទិញនៅពេលគេចង់លក់ ហើយលក់នៅពេលគេត្រូវការទិញ។
លោកនបញ្ជាក់ថា “ទិញនៅពេលគេចង់លក់ គឺយើងនឹងអាចទិញបានតម្លៃទាប និងទីតាំងល្អ ដែលចង់បាន ហើយបើសិនជាចង់លក់វិញ គឺយើងលក់ទៅអ្នកដែលចង់ទិញពិតប្រាកដ” ៕
