ដោយ វណ្ណារ៉ា
ភ្នំពេញ៖ នៅក្នុងព្រឹត្តិការណ៍ ២០ កុម្ភៈ នៃការផ្ទុះឡើងនៃការរីករាលដាលនៃ ជំងឺកូវិដ ១៩ បានធ្វើឱ្យអាជីវកម្មនានាទាំងវិស័យសេដ្ឋកិច្ច និងអចលនទ្រព្យនៅក្នុងប្រទេសបាននឹងកំពុងទទួលរងនូវផលប៉ះយ៉ាងធ្ងន់ធ្ងរជាពិសេសអាជីវកម្ម និងក្រុមហ៊ុនតូចៗ ។
លោក ឡុង គឹមសួគ៌ អគ្គនាយកក្រុមហ៊ុនភ្នាក់ងារអចលទ្រព្យ Century 21 Advance បានឱ្យដឹងនៅល្ងាចថ្ងៃទី១៥ ខែមីនា ឆ្នាំ២០១ថា នៅក្នុងព្រឹត្តិការណ៍ ២០ កុម្ភៈ ទទួលរងផលប៉ះពាល់ខ្លាំងជាងព្រឹត្តិការណ៍មុនៗ ជាពិសេសអាជីវកម្មតូច ៗ និងក្រុមហ៊ុនតូចៗ គឺបាត់ចំណូល ដែលមិនអាចនឹងទ្រទ្រង់ឱ្យរឹងមាំងបាន ព្រោះមនុស្សមិនអាចចេញក្រៅបាន និងចចារក្នុងការទិញលក់។
លោក ឡុង គឹមសួគ៌ថ្លែងថា «ក្រុមហ៊ុនតូចៗនាពេលបច្ចុប្បន្ននេះ បាននឹងកំពុងទទួលរងប៉ះពាល់ខ្លាំង ដែលមានការលំបាកក្នុងការឈរជើង ឬទប់ឱ្យហ្នឹង ហើយមិនដឹងថា វាឆ្លងផុតពីព្រឹត្តិការណ៍នេះរួច ឬអត់ទេ ព្រោះ យើងស្ថិតនៅក្នុងភាពមិនប្រាកដប្រជា» ។
បើតាម លោក គឺមសួគ៌ ស្របពេលជាមួយគ្នានេះ ទាំងវិស័យមីក្រូហិរញ្ញវត្ថុ និងធនាគារ ក៏មិននការពន្ធូបន្ថយដែរ ឬ មានការពន្យាពេលក្នុងការបង់ប្រាក់ ដែលធ្វើអោយពួកគាត់កាន់តែមានស្ថានភាពយ៉ាប់យឺនផងដែរ។
ពាក់ព័ន្ធនឹងស្ថានភាពបែបនេះ លោក ឡុង គឹមសួគ៌ ក៏បានអំពាវនាវដល់រាជរដ្ឋាភិបាល គួរតែមានវិធានការសមស្របណាមួយឱ្យ អាជីវកម្ម ឬ ក្រុមហ៊ុនតូចៗ អាចឱ្យពួកគាត់ឈរជើងនឹងនៅក្នុងអំឡុងពេលនេះ ប៉ុន្តែនិយាយជារួមនៅក្នុងអំឡុងពេលនេះ គឺមានការប៉ះពាល់ស្ទើរតែគ្រប់គ្នា។
ទោះជាយ៉ាងណាក៏ដោយ លោក ឡុង គឹមសួគ៌ បញ្ជាក់ថា ដើម្បីឱ្យអាជីវកម្មមួយអាចឈរជើង បាននៅក្នុងអំឡុងពេលនេះគឺត្រូវកាត់បន្ថយការចំណាយ ការផ្សព្វផ្សាយពាណិជ្ជកម្មទៅលើផលិតផលរបស់ខ្លួនឱ្យបានច្រើន ព្រោះក្នុងអំឡុងពេលនេះ ក៏មិនសូវមានអ្នកទិញដែរ ។ មួយទៀតម្ចាស់អាជីវកម្ម ឬក្រុមហ៊ុន គួរតេស្វះស្វែងរកដើមទុនបន្ថែម ដើម្បីទប់ និងចំណាយទៅអ្វីដែលមានការចាំបាច់បំផុត៕
