ដោយៈសុខុម
ក្រុងរីយ៉ាដ: ក្រុមហ៊ុនបដិសណ្ឋារកិច្ចខ្នាតយក្ស របស់សហរដ្ឋអាមេរិក Marriott International បានចុះកិច្ចព្រមព្រៀងជាមួយក្រុមហ៊ុន Al Saedan Group ដែលជាក្រុមហ៊ុនអចលនទ្រព្យនៅតំបន់មជ្ឈិមបូព៌ា (Middle East) ដើម្បីសាងសង់សណ្ឋាគារប្រណីតចំនួន៣ នៅក្នុងប្រទេសអារ៉ាប៊ីសាអូឌីត ត្រឹមឆ្នាំ២០២៥ ។ នេះបើយោងតាមសារព័ត៌មាន TTG Asia ចុះផ្សាយកាលពីថ្ងៃទី២៤ មីនា។
កិច្ចព្រមព្រៀងពហុគម្រោងនេះ រួមមាន ប្រ៊ែនសណ្ឋាគារ Renaissance Hotel ដំបូងបង្អស់នៅក្នុងប្រទេសនេះ និងនៅក្នុងតំបន់មជ្ឈិមបូព៌ា ប្រ៊ែនសណ្ឋាគារ Aloft Hotel ដែលធំជាងគេបំផុតលើពិភពលោក និងប្រ៊ែនសណ្ឋាគារ Courtyard by Marriott ក្នុងទីក្រុងពិសិដ្ឋ មេក្កា (Mecca) ឬ Makkah ក្នុងលទ្ធិជំនឿនៃសាសនាអ៊ិស្លាម។
តាមការរំពឹងទុក ប្រ៊ែនសណ្ឋាគារ Renaissance Hotels នឹងបង្ហាញវត្តមានជាលើកដំបូងរបស់ខ្លួន នៅក្នុងប្រទេសអារ៉ាប៊ីសាអូឌីត ជាមួយនឹងការបើកសម្ពោធសណ្ឋាគារដែលមានឈ្មោះថា Renaissance Riyadh Hotel ។
ដោយមានទីតាំង ស្ថិតនៅក្នុងសង្កាត់ហិរញ្ញវត្ថុ ស្ដេចអាប់ឌុលឡា (King Abdullah Financial District) ជិតអាកាសយានដ្ឋានអន្តរជាតិក្រុងរីយ៉ាដ (Riyadh International Airport) សណ្ឋាគារRenaissance Riyadh Hotel នឹងមានបន្ទប់ស្វីត (suite) ដ៏ធំទូលាយចំនួន២៦៦បន្ទប់ កន្លែងបម្រើអាហារ និងភេសជ្ជៈចំនួន ៣កន្លែង ស្ប៉ាមួយកន្លែង អាងហែលទឹក និងក្លឹបហាត់ប្រាណមួយ។
ទី២ សណ្ឋាគារ Aloft Makkah Taysir មានទីតាំងស្ថិតនៅក្នុងទីក្រុងពិសិដ្ឋ មេក្កា គ្រោងនឹងក្លាយជាសណ្ឋាគារធំបំផុត នៅក្នុងពិភពលោករបស់ប្រ៊ែននេះ ជាមួយនឹងបន្ទប់គេងរហូតដល់ទៅ ១.០០០ បន្ទប់។
ដោយមានទីតាំងស្ថិតនៅក្នុងសង្កាត់ Taysir និងនៅជិតច្រកចូលមហាព្រះវិហារអ៊ិស្លាម Grand Mosque សណ្ឋាគារនេះ គឺស័ក្ដិសមបំផុតសម្រាប់ភ្ញៀវ ដែលមកចូលរួមក្នុងដំណើរធម្មយាត្រា។
សណ្ឋាគារ Aloft Makkah Taysir នឹងមានកន្លែងទទួលភ្ញៀវធំល្វឹងល្វើយ កន្លែងបម្រើសេវាមុខប្ហូបឆ្ងាញ់២៤លើ ២៤ ម៉ោង និងក្លឹបហាត់ប្រាណបើក ២៤ ម៉ោងលើ ២៤ ម៉ោង។
ទី៣ សណ្ឋាគារ Marriott Makkah Kudai ។ ដោយមានទីតាំងស្ថិតនៅចម្ងាយ២គីឡូម៉ែត្រ ពីច្រកចូលមហាព្រះវិហារអ៊ិស្លាម Grand Mosque សណ្ឋាគារនេះនឹងមានបន្ទប់គេងចំនួន៤៣៨បន្ទប់ កន្លែងបម្រើសេវាមុខប្ហូបឆ្ងាញ់ៗ និងក្លឹបហាត់ប្រាណមួយ។
ទោះជាយ៉ាងណា គ្មានការបញ្ជាក់ជាផ្លូវការអំពីទំហំទុនវិនិយោគ លើគម្រោងសណ្ឋាគារទាំង៣នេះឡើយ។ ប៉ុន្តែបើតាមការប៉ាន់ប្រមាណ គឺប្រហែលជាមិនក្រោមពាន់លានដុល្លារអាមេរិកនោះឡើយ៕
