ដោយ វុត្ថា
ភ្នំពេញ៖ នៅព្រឹកថ្ងៃនេះ ផ្សារទំនើបលំដាប់អន្តរជាតិដ៏ធំ បានបើកសម្ភោធជាផ្លូវការហើយ ជាសញ្ញាដែលធ្វើឲ្យទីផ្សារទំនើបនៅកម្ពុជា កាន់តែមានភាពរសរវើក និងប្រឈមការប្រកួតប្រជែងជាងមុន។
ពិធីសម្ភោធផ្សារទំនើបលំដាប់អន្តរជាតិនេះ មានការចូលរួមពីឧកញ៉ាល្បីឈ្មោះជាច្រើន ដូចជា ឧកញ៉ាលី យ៉ុងផាត់អគ្គនាយកក្រុមហ៊ុនលី យ៉ុងផាត់គ្រុប ដែលបានវិនិយោ គផ្សារទំនើប MAKRO និងអ្នកវិនិយោគជប៉ុននៅកម្ពុជាជាច្រើនផងដែរ។
អគ្គនាយកផ្សារទំនើប AEON MALL លោក Sheichi Chiba បានថ្លែងឲ្យដឹងក្នុងពិធីបើកសម្ភោធផ្សារទំនើបនេះនាព្រឹកថ្ងៃទី២០ មិថុនានេះថា ទស្សនវិស័យរបស់ផ្សារទំនើបAEON MALL នាំមកនូវភាពភ្ញាក់ផ្អើល ភាពរីករាយ និងកាន់តែរំភើប ដោយផ្សារទំនើបនេះទទួលបានជោគជ័យនៅកម្ពុជា ព្រោះកាលពីឆ្នាំមុនមានមនុស្ស ១៨លាននាក់បានមកកំសាន្តនៅផ្សារទំនើប AEON MALL1 ដែលមានទីតាំងស្ថិតនៅលើបណ្តោយផ្លូវសុធារស ស្ថិតក្នុងសង្កាត់ទន្លេបាសាក់ ខ័ណ្ឌចំការមន រាជធានីភ្នំពេញ។
ការមកដល់ផ្សារទំនើបលំដាប់អន្តរជាតិនេះ បានធ្វើឲ្យផ្សារទំនើបក្នុងស្រុកជាច្រើន ប្រឈមមុខនឹងបញ្ហា ដូចជាផ្សារទំនើប CITY MALL ផ្សារទំនើបដទៃទៀតបានស្ងប់ស្ងាត់អតិថិជន ហើយស្តង់នៃផ្សារទំបនើបមួយចំនួនបានបិទទ្វារជាច្រើន។
ស្ថាបនិកគេហទំព័រ Propertyarea.asia លោក លាងគង់ យិន អ្នកតាមដានដំណើរវិវត្តន៍នៃសេដ្ឋកិច្ច សង្គមកម្ពុជាបានមានប្រសាសន៍ថា ភាពជោគជ័យនៃផ្សារទំនើបរបស់ជប៉ុន មិនមែនកើតឡើងដោយចៃដន្យនោះទេ ផ្ទុយទៅវិញអ្នកវិនិយោគជប៉ុនមុនមកវិនិយោគនៅកម្ពុជា ពួកគេបានសិក្សាច្បាស់លាស់ណាស់លើប្រពៃណី ចំណង់ចំណូលចិត្តរបស់ប្រជាពលរដ្ឋខ្មែរ សិក្សាពីស្ថានភាពទីផ្សារ និងអំណាចនៃការទិញកើនឡើង និងអ្វី ដែលផ្សារទំនើបក្នុងស្រុកមិនទាន់បំពេញបាននៅឡើយ។
លោកបន្តថា “ការសិក្សាលើមូលដ្ឋានប្រពៃណី ចំណូលចិត្តនិងអំណាចនៃទីផ្សារបានធ្វើឲ្យក្រុមហ៊ុននេះរកឃើញមូលដ្ឋានមួយ ដែលពួកគេត្រូវបំពេញ ហេតុនេះការទទួលបានជោគជ័យរបស់ពួកគេ ឈរលើមូលដ្ឋានមានលក្ខណៈវិទ្យាសាស្ត្រមួយ”៕
