ដោយៈ ប៊ី
ភ្នំពេញៈ គម្រោងហេដ្ឋរចនាសម្ព័ន្ធ និងគម្រោងអភិវឌ្ឍន៍ធំៗចំនួន៤ នឹងជួយលើកកម្ពស់មុខមាត់ប្រទេសកម្ពុជាបន្ថែមទៀត ពិសេសវិស័យអចលនទ្រព្យក៏អាចទាញប្រយោជន៍ពីម្រោងទាំងនេះផងដែរ។
គម្រោងទាំង៤ ដែលបាននិងកំពុងដំណើរសាសង់រួមមានៈ
ទី១) ក្រុមហ៊ុន OCIC បានឱ្យដឹងថា ការសាងសង់នៅអាកាសយានដ្ឋានអន្តរជាតិភ្នំពេញថ្មីត្រូវបានរំពឹងថា នឹងសម្រេចបាន៥០ភាគរយ គិតត្រឹមចុងឆ្នាំ២០២១។ អាកាសយានដ្ឋាននេះ នឹងលាតសន្ធឹងលើផ្ទៃដី២,៦០០ហិកតា ដែលមានទីតាំងស្ថិតនៅខេត្តកណ្តាល នៅខាងត្បូងរាជធានីភ្នំពេញ ហើយគ្រោងនឹងបញ្ចប់ដំណាក់កាលទី១ ទាំងស្រុងនៅឆ្នាំ២០២៣។
គំរោងនេះជាការអភិវឌ្ឈរបស់រដ្ឋាភិបាល ដើម្បីពង្រីកមហិច្ឆតាតភ្ជាប់ផ្លូវអាកាសរបស់ខ្លួនទៅកាន់ពិភពលោក ដើម្បីលើកកំពស់កិត្យានុភាពកម្ពុជាលើឆាកអន្តរជាតិ និងរុញសេដ្ឋកិច្ចកម្ពុជា ទៅកាន់ដំណាក់កាលថ្មីមួយទៀត ពិសេសដើម្បីរុញកម្ពុជាចេញពីប្រទេសមានប្រាក់ចំណូលមធ្យមកម្រិតទាប ទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមានប្រាក់ចំណូលខ្ពស់នៅឆ្នាំ២០៥០។
ទី២) តំបន់បាក់ខែង បានក្លាយជាទីតាំងសម្រាប់ព្រឹត្តិការណ៍ដ៏សំខាន់មួយ ដើម្បីស្វាគមន៍ព្រឹត្តិការណ៍ស៊ីហ្គេមឆ្នាំ២០២៣។
ពហុកីឡដ្ឋានមរតកតេជោ បានបញ្ចប់ការដំឡើងកៅអីចំនួន១២.០០០ ក្នុងចំណោមកៅអីចំនួន៤០.០០០ ហើយដំណើរការសាងសង់ នឹងបញ្ចប់នៅខែឧសភា ឆ្នាំ២០២១។
វានឹងជាព្រឹត្តិការណ៍ប្រត្តិសាស្រ្តលើកដំបួង សម្រាប់កម្ពុជាដែលអាចរៀបចំធ្វើជាម្ចាស់ផ្ទះកីឡាស៊ីហ្គេម ដែលរំពឹងនឹងមានកីឡាករ កីឡាការិនីរាប់ពាន់នាក់ និងភ្ញៀវទេសចរណ៍រាប់ម៉ឺននាក់មកទស្សនាព្រឹត្តិការណ៍នេះ។
ទី៣) ផ្លូវល្បឿនលឿនភ្នំពេញ-ក្រុងព្រះសីហនុ នៅតែបន្តដំណើរការសាងសង់ ទោះបីស្ថិតក្នុងវិបត្តិជំងឺរាតត្បាតកូវិដ១៩ ក៏ដោយ។ នៅថ្ងៃទី២ ខែមីនា ឆ្នាំ២០២១ ការក្រាលកៅស៊ូលើផ្នែកគំរូនៃផ្លូវត្រូវបានបញ្ចប់ ខណៈគម្រោងសាងសង់សម្រេចបាន៤០%ហើយ។ គម្រោងនេះគ្រោងនឹងបញ្ចប់ជាស្ថាពរនៅចុងឆ្នាំ២០២៣។
វាជាផ្លូវនៃគំរោងគំនិតផ្តួចផ្តើមខ្សែក្រវ៉ាត១ ផ្លូវ១របស់ប្រទេសចិន ដែលមានគោលដៅពង្រីកឥទ្ឋិពលសេដ្ឋកិច្ចនៅលើពិភពលោក ពិសេសជាគំរោងជួយដល់រដ្ឋាភិបាលកម្ពុជា ក្នុងការស្តារសេដ្ឋកិច្ច និងសង្គមទៅកាន់កម្រិតរីកចម្រើនថ្មីមួយ។
ទី៤) គម្រោងកាស៊ីណូ និងសណ្ឋាគារណាហ្គា៣ ត្រូវបានរាយការណ៍ថា បានបើកការដ្ឋាន ហើយបានចាប់ផ្តើមដំណើរការការងារសាសង់។ គម្រោងនេះត្រូវបានរំពឹងថានឹងបញ្ចប់នៅឆ្នាំ២០២៤ និងរួមមានកន្លែងកម្សាន្តចម្រុះ ខុនដូបែបសណ្ឋាគារ ឧទ្យានបែបឌីជីថល និងកន្លែងកម្សាន្តផ្សេងៗទៀត។
វាជាអាគារខ្ពស់ជាងគេ និងមជ្ឈមណ្ឌលកំសាន្តធំជាងគេនៅតំបន់អាស៊ាន ដោយបច្ចុប្បន្នអ្នកអភិវឌ្ឍន៍គម្រោងនេះ បានដំឡើងកំពស់អាគារមេNaga World3 ពី៦៩ជាន់ ឡើងដល់កំពស់៧៥ជាន់។
ក្រុមហ៊ុនNaga Cord ដែលជាអ្នកអភិវឌ្ឍន៍គម្រោងនេះបានប្រកាសថា វានឹងក្លាយជាគំរោងខ្ពស់ជាងគេនៅរាជធានីភ្នំពេញ បន្ទាប់ពីបញ្ចប់ការសាងសង់។
អ្នកជំនាញក្នុងវិស័យអចលនទ្រព្យបានលើកឡើងថា ជាធម្មតា នៅពេលមានគម្រោងអភិវឌ្ឍន៍ហេដ្ឋារចនាសម្ព័ន្ធ និងគម្រោងអភិវឌ្ឍន៍ធំៗ នឹងលើកកម្ពស់មុខមាត់ប្រទេស ពិសេសជួយបង្កើនតម្លៃអចលនទ្រព្យ នៅជុំវិញតំបន់អភិវឌ្ឍន៍ និងគម្រោងហេ ដ្ឋារចនាសម្ព័ន្ធនោះ៕
