ដោយៈឧត្តម
ភ្នំពេញៈ មានមនុស្សជាច្រើនបាន និងកំពុងចាប់អារម្មណ៍លើអាជីពជាភ្នាក់ងារអចលនទ្រព្យ ក្នុងពេលវិស័យអចលនទ្រព្យនៅក្នុងប្រទេសកម្ពុជា ក្នុងរយៈពេលប៉ុន្មានឆ្នាំចុងក្រោយនេះ។
ប៉ុន្តែសម្រាប់ភ្នាក់ងារអចលនទ្រព្យថ្មី ពិតជាពិបាកក្នុងការកសាងបណ្ដាញ ដើម្បី ឱ្យអាជីពមួយនេះ កាន់តែមានភាពងាយស្រួលនិងរីកចម្រើន ។ ដូច្នេះមានយុទ្ធសាស្ត្រមួយចំនួនដែលជាគន្លឹះ សម្រាប់អ្នកប្រកបអាជីពជាភ្នាក់ងារអចលនទ្រព្យថ្មីៗ
ទី១ បង្កើតយុទ្ធសាស្ត្រដើម្បីបានជួបមនុស្សថ្មីៗ
ក្នុងនាមជាភ្នាក់ងារអចលនទ្រព្យថ្មី ត្រូវដឹងពីភាពចាំបាច់ ពីការបង្កើតបណ្ដាញទំនាក់ទំនងជាមួយមនុស្សជុំវិញខ្លួនយើង ហើយនៅថ្ងៃអនាគត ពួកគាត់នឹងផ្ដល់ការងារជាច្រើនឱ្យយើង។
ទី២ បង្កើនជំនឿចិត្តខ្លួនឯង
មុននឹងឈានចូលទៅដល់យុទ្ធសាស្ត្រ ដែលត្រូវប្រើក្នុងបណ្ដាញទំនាក់ទំនង ជាដំបូង យើងត្រូវពិនិត្យមើលការគិត ដែលកំពុងរត់ឆ្លងកាត់ខួរក្បាលរបស់យើង ជាមុនសិន ។ អ្វីដែលយើងត្រូវយកចិត្តទុកដាក់មុនគេបង្អស់នោះ គឺ យើងត្រូវយកឈ្នះអ្វីដែលយើងបានគិតថា បណ្ដាញទំនាក់ទំនងគឺជាពិភពលោកបច្ចុប្បន្ន។
ទី៣ ផ្នត់គំនិត
បើសិនជាយើងព្យាយាមជាខ្លាំង ដើម្បីភ្ជាប់ទំនាក់ទំនងខ្លាំងពេក មានក្តីរំពឹងខ្ពស់ខ្លាំងពេក ក្នុងការចាប់យកពួកគាត់ វាអាចធ្វើឱ្យចំណងមិត្តភាពថ្មី ដែលយើងរៀបនឹងបង្កើតឡើងបាត់បង់ទៅវិញ ដោយសារមិត្តថ្មីដែលយើងត្រៀមបង្កើតនោះ ការយល់ដឹងរបស់គាត់នៅមានកម្រិតនៅឡើយ ។ នេះផ្នត់គំនិតដែលត្រូវផ្លាស់ប្តូរ បើសិនជាបង្កើតបណ្ដាញទំនាក់ទំនងជាមួយមនុស្សកាន់តែច្រើន។
ទី៤ ត្រៀមលក្ខណៈឱ្យរួចរាល់ក្នុងការជួបមនុស្សថ្មីៗ
មុនសម្រេចនឹងឈានជើងចូល ក្នុងទីផ្សារអចលនទ្រព្យត្រូវដឹងថា អាជីពនេះ មិនអាចឱ្យយើងទទួលបានប្រាក់ខែទេ យើងនឹងទទួលបានចំណូល នៅពេលបិទការលក់ហើយទទួលជាកម្រៃជើងសារ ។ ដូច្នេះដើម្បីឱ្យមានការបិទការលក់ យើងត្រូវជួបមនុស្សជាច្រើន ហើយយើងក៏ត្រូវតែត្រៀមខ្លួន ក្នុងការជួបជាមួយមនុស្សជាច្រើនទាំងនោះផងដែរ។
ទី៥ ចូលរួមកម្មវិធីនានាឱ្យបានច្រើន
បើសិនជាចង់បង្កើតបណ្ដាញទំនាក់ទំនង ជាមួយមនុស្សកាន់តែច្រើន យើងត្រូវចូលរួមកម្មវិធីជាច្រើន ដូចជា កម្មវិធីដែលពាក់ព័ន្ធនឹងវិស័យអចលនទ្រព្យ កម្មវិធីជួបជុំបណ្ដាញអ្នកធុរកិច្ចផ្សេងទៀតជាដើម។
ទាំងនេះគ្រាន់តែជាយុទ្ធសាស្ត្រមួយចំនួន សម្រាប់អ្នកដែលទើបចាប់អាជីពជាភ្នាក់ងារអចលនទ្រព្យ តែយ៉ាងណាក៏ដោយ អ្នកខ្លះមានដុងពីកំណើតក្នុងការកសាងបណ្ដាញទំនាក់ទំនងរបស់ខ្លួន ហើយអ្នកខ្លះទៀតត្រូវការសិក្សារៀនសូត្រ និងប្រើពេលយូរដើម្បីបង្កើតជាបណ្ដាញទំនាក់ទំនងបានច្រើន៕
