ដោយៈរ៉ាណេត
ភ្នំពេញៈ មានការលើកឡើងជាច្រើន ដែលនិយាយថាទីផ្សារអចលនទ្រព្យនៅតាមតំបន់មួយចំនួន កំពុងទទួលរងនូវផលប៉ះពាល់ និងមានការធ្លាក់ចុះនោះ សម្រាប់តែទីផ្សារដីធ្លីក្នុងស្រុកកណ្តាលស្ទឹងត្រូវបានប្រតិបត្តិករ និងភ្នាក់ងារលក់មួយចំនួនអះអាងថានៅតែបន្តរក្សាតម្លៃដដែល ពោលគឺមិនស្រុតចុះដោយសារតែវិបត្តិជំងឺកូវីដនោះទេ។
លោកសុខ ឌីណា ជាឈ្មួញរកស៊ីក្នុងវិស័យដីធ្លី ដែលផ្តោតសំខាន់នៅក្នុងភូមិសាស្ត្រខេត្តកណ្តាលមានលើកឡើងថា ដីធ្លីដែលមានទីតាំងល្អ ទោះជាមិនស្ថិតនៅក្បែរគម្រោងសាងសង់ព្រលានយន្តហោះ ប៉ុន្តែនៅជិតគម្រោងអភិវឌ្ឍន៍ប ណ្តុំលំនៅដ្ឋានកម្រិតមធ្យម ស្ថិតនៅក្នុងស្រុកកណ្តាលស្ទឹង គឺនៅតែមានតម្លៃថ្លៃ និងមិនធ្លាក់ថ្លៃដូចមនុស្សមួយចំនួននិយាយនោះទេ។
លោកបន្តថា “អ្នកនិយាយអាចគ្រាន់តែឮតាមគេ ឬអាចជាឈ្មួញនិយាយទម្លាក់ថ្លៃតែប៉ុណ្ណោះ ប៉ុន្តែជាក់ស្ដែងភាគច្រើនដី នៅក្នុងស្រុកកណ្តាលស្ទឹង នៅតែរក្សាតម្លៃដដែល មិនថាចំពោះដីនៅក្បែរគម្រោងព្រលានយន្តហោះ ដីនៅតំបន់ផ្លូវជាតិលេខ២ ឬក្បែរក្រវាត់ក្រុងទី៣នោះទេ” ។ លោកបញ្ជាក់ថា “បើនិយាយថា ការទិញលក់ដីធ្លីធ្លាក់ចុះក្នុងរយៈកាលកន្លងទៅនេះគឺត្រឹមត្រូវ ប៉ុន្តែបើនិយាយថាតម្លៃដីធ្លាក់ចុះ មិនគឺមិនត្រូវនោះទេ” ។
ជាក់ស្ដែងសូម្បីតែដីលិចទឹកមួយចំនួន ស្ថិតនៅក្នុងឃុំគោកត្រប់ ស្រុកកណ្តាលស្ទឹង ក៏មានតម្លៃមិនក្រោ៥០ដុល្លារក្នុងមួយម៉ែត្រការ៉េដែរ ហើយដីនៅក្នុងភូមិដែលមានប្រជាជនរស់នៅផ្លូវដីនៅឡើយ ក៏មានតម្លៃមិនក្រោយ១០០ដុល្លារក្នុងមួយការ៉េ ។ លើសពីនេះ ប្រសើនបើដីដែលស្ថិតនៅតំបន់ ដែលមានមនុស្សរស់នៅច្រើន អាចប្រកបអាជីវកម្ម ឬគៀកទៅនឹងផ្លូវជាតិលេខ២ ឬរង្វង់មូលគួរស្រូវគឺកាន់តែថ្លៃអាចចាប់ពី២០០ដុល្លាររហូតដល់ជាង៣០០ដុល្លារក៏មានផងដែរ។
ជាមួយគ្នានេះ លោកសុខ ឌីណា បានបញ្ជាក់ថា ភាគច្រើនម្ចាស់ដីនៅក្នុងស្រុកកណ្តាលស្ទឹងជាម្ចាស់ដើមនៅក្នុងមូលដ្ឋាន ហើយបើឈ្មួញដីធំៗច្រើនតែជាអ្នកអភិវឌ្ឍន៍គម្រោងលំនៅដ្ឋានតែម្ដង ដូច្នេះការជំរុញលក់ក្នុងតម្លៃទាបជាងទីផ្សារ មិនសូវមាននោះទេ។
លើកឡើងស្រដៀងគ្នានេះ លោកស្រីអាន សុធីតា អ្នកជំនាញក្នុងវិស័យអចលនទ្រព្យកម្ពុជា ធ្លាប់បានមានប្រសាសន៍ប្រាប់សក្ដានុពលដីធ្លី ក្នុងស្រុកកណ្តាលស្ទឹង ជាពិសេសតាមបណ្តោយផ្លូវជាតិលេខ២ កំពុងបង្ហាញពីសក្តានុពល និងអំណោយផលដល់ការវិនិយោគ អភិវឌ្ឍន៍សំរាប់លំនៅដ្ឋាន ក៏ដូចជាការវិនិយោគក្នុងវិស័យឧស្សាហកម្ម។
លោកស្រីបន្តថា “ជាធម្មតានៅពេលដែលមាន គម្រោងអភិវឌ្ឍន៍របស់រដ្ឋាភិបាលគឺតែងអនុគ្រោះដល់ការវិនិយោគ និងអភិវឌ្ឍន៍របស់វិស័យឯកជន។ លោកស្រីបន្តថា “ជាមួយគ្នានេះ សម្រាប់គម្រោងស្ថាបនា និងកែលម្អផ្លូវជាតិលេខ២នៅពេលនេះ ក៏បានជួយធ្វើឱ្យវិសយអចលនទ្រព្យ នៅតំបន់នេះមានភាពរីកចម្រើនផងដែរ ព្រោះនៅពេលដែលមានហេដ្ឋារចនាសម្ព័ន្ធផ្លូវថ្នល់ល្អស្អាត ងាយស្រួលធ្វើដំណើរ វានឹងជំរុញឱ្យមានមនុស្សចូលទៅរស់នៅ ហើយក៏មានរោងចក្រ សហគ្រាសចូលទៅដែរ ព្រោះងាយស្រួលក្នុងការដឹកជញ្ជូន” ។
ដោយឡែកពាក់ព័ន្ធទៅនឹងតម្លៃដីធ្លី ត្រូវបានលោកស្រីអាន សុធីតា ប្រាប់ថា បើគិតពីផ្លូវបំបែកផ្លូវ៦០ម៉ែត្រ មកផ្លូវជាតិលេខ២ តម្លៃដីមានការកើនឡើងថ្លៃពី១០០ ទៅ ៣០០ ដុល្លារអាមេរិកក្នុងមួយម៉ែត្រកការ៉េ ហើយរហូតដល់ផ្លូវបំបែកលេខ២០ ត្រង់រង្វង់មូលគួរស្រូវ គឺឡើងទ្វេងដង បើធៀបនឹង២ឆ្នាំមុន ហើយបន្តិចទៀតអាចនឹងបន្តឡោះងថ្លៃជាងនេះ ព្រោះជាតំបន់សាងសង់លំនៅដ្ឋាន ជាតំបន់ជាយក្រុងងាយស្រួលក្នុងធ្វើដំណើរចូលក្រុង និងងាយស្រួលក្នុងការធ្វើពាណិជ្ជកម្មខ្នាតតំបន់ផងដែរ។
បើគិតពីរង្វង់មូលគួរស្រូវ ទៅចូលស្រុកកណ្តាលស្ទឹង តម្លៃដីនៅតាមបណ្តោយផ្លូវនេះ មិនមានការរឡើងថ្លៃប៉ុន្មានទេ អាចស្ថិតក្នុងចន្លោះពី ៨០ ទៅ ១០០ ដុល្លារប៉ុណ្ណោះក្នុងមួយម៉ែត្រការ៉េ។ យ៉ាងណាក៏ដោយ តម្លៃដីធ្លីវាអាចនឹងប្រែប្រួលទៅតាមប្រភេទដី និងទីតាំងដែលមានសក្តានុពល៕
