ដោយៈតារា
ភ្នំពេញៈ រដ្ឋាករទឹកស្វយ័តក្រុងភ្នំពេញ គ្រោងបង្កើនចំណូលពីការធ្វើអាជីវកម្មទឹកស្អាតឲ្យបានជាង៣៤ម៉ឺនលានរៀល ខ្ពស់ជាងឆ្នាំ២០២០ប្រមាណជាង៦ភាគរយ ខណៈនៅក្នុងឆ្នាំ២០២០ ការប្រមូលចំណូលពីទឹកស្អាត បានជាង៣២ម៉ឺនលានរៀលប៉ុណ្ណោះ។
អគ្គនាយករដ្ឋាករទឹកស្វយ័តក្រុងភ្នំពេញលោកស៊ឹម ស៊ីថាបានឱ្យដឹងកាលពីម្សិលម៉ិញនេះថា ការអភិវឌ្ឍវិស័យទឹកស្អាតនេះ ផ្អែកតាមផែនការដែលរដ្ឋាករទឹកស្វយ័តក្រុងភ្នំពេញបានអនុវត្តនាដើមឆ្នាំ និងការអនុម័តនៅក្នុងក្រុមប្រឹក្សាភិបាល ក្នុងនោះការចាំបាច់ គឺត្រូវផ្គត់ផ្គង់ទឹកស្អាតឲ្យគ្រប់ ទៅតាមគម្រោងផែនការដែលបានរៀបចំទុក ជាក់ស្តែងនៅក្នុងស្ថានភាព នៃការរីករាលដាលជំងឺកូវីដ-១៩ រដ្ឋាករទឹកស្វយ័តក្រុងភ្នំពេញ នៅតែជំរុញការផលិតទឹកឲ្យបានគ្រប់គ្រាន់។
លោកបន្តថា នាពេលថ្មីៗនេះ ក្រុមប្រឹក្សាភិបាល បានសម្រេចបង្កើនចំណូលនៅក្នុងឆ្នាំ២០២១ ឱ្យខ្ពស់ជាងឆ្នាំ ២០២០ ដោយផ្អែកទៅលើផែនការ ដែលបានដាក់ចេញ រួមមាន៖ ការផលិតទឹកឲ្យបានច្រើន បង្កើនបណ្តាញចែកចាយ បង្កើនអតិថិជន ដែលជាអ្នកប្រើប្រាស់ និងការបង្កើនកិច្ចការពារ ទប់ស្កាត់ទឹកបាត់បង់។
ក្រៅពីនេះ រដ្ឋាករទឹកស្វយ័តក្រុងភ្នំពេញ ក៏មានចំណូលអំពីការធ្វើសេវាកម្មផ្សេងៗផងដែរ ។
នៅក្នុងឆ្នាំ២០២១នេះ រដ្ឋាករទឹកស្វយ័តក្រុងភ្នំពេញ បានដាក់ទិសដៅផលិតទឹកស្អាតឲ្យបានជាង២២៧លានម៉ែត្រគីប ការបង្កើនអតិថិជនប្រើប្រាស់ថ្មីឲ្យបានចំនួន២៧ពាន់បណ្តាញ ខណៈនៅឆ្នាំ២០២០ ការតបណ្តាញជូនអតិថិជនថ្មី បានត្រឹមជាង១៧ពាន់បណ្តាញ៕
