ដោយៈ ម៉ាណេត និងគៀតឈូ
សៀមរាបៈ ទោះបីវិបត្តិកូវីដ១៩ បង្កផលប៉ះពាល់វិស័យទេសចរណ៍ខ្លាំងក៏ដោយ ប៉ុន្តែក្រុមការងាររបស់ Tripadvisor នៅតែបន្តតាមដាន និងសិក្សាតំបន់ទេសចរណ៍ និងផ្តល់ពានរង្វាន់ដល់តំបន់ដែលប្រជាប្រិយភាព សម្រាប់ការធ្វើដំណើរកម្សាន្ត ជាក់ស្តែង ទីក្រុងសៀមរាប បានឈ្នះពានរង្វាន់ទេសចរណ៍ប្រណិតលេខ១ ក្នុងឆ្នាំ២០២១។
ទីក្រុងសៀមរាប បានឈ្នះពានរង្វាន់ទេសចរណ៍ប្រណិតលេខ១ លំដាប់ពិភពលោករបស់ Tripadvisor ឆ្នាំ២០២១ [2021 Travellers’ Choice® “Best of the Best” Things to Do Awards] សម្រាប់ដំណើរកម្សាន្តរយៈពេល៣ថ្ងៃ លើទឹកដីអង្គរ ទឹកជ្រោះ ភូមិបណ្តែតទឹក និងប្រាសាទបន្ទាយស្រី។ នេះយោងតាមគេហទំព័រ TTR WEEKLY នៅថ្ងៃទី២៤ ខែមិថុនា ឆ្នាំ២០២១។
គេទំព័រ Tripadvisor បានប្រកាសពីអ្នកឈ្នះរង្វាន់នេះ កាលពីថ្ងៃពុធ សម្រាប់ពាន Travellers’ Choice® “Best of the Best” ឆ្នាំ២០២១។ ដើមឡើយ គេហៅថាពានរង្វាន់ Choice Awards for Experiences បន្ទាប់មកបានប្តូរទៅពានរង្វាន់ Things to Do Awards ដែលទទួលស្គាល់រាល់សកម្មភាពល្អបំផុត លើប្រភេទដំណើរកម្សាន្តជាច្រើន។
បញ្ជីដំណើរកម្សាន្តនេះ រាប់បញ្ចូលទាំងសកម្មភាពផ្តោតលើធម្មជាតិនិងការឡើងភ្នំ រហូតដំណើរកម្សាន្តលើទឹក និងសោធន៍ដំណើរកម្សាន្តជាច្រើនទៀត ដែលឆ្លុះបញ្ចាំងពីសកម្មភាពដែលគួរឱ្យចាប់អារម្មណ៍ ចាប់តាំងពីជំងឺរាតត្បាត។
Tripadvisor ធ្វើបញ្ជីលើសកម្មភាពកម្សាន្ត ក្នុងណោះមានសកម្មភាពជិត៤០០.០០០ ដែលអាចធ្វើការកម្សាន្តបាន។
លោកស្រី អ្នកគ្រប់គ្រងទូទៅរបស់ Tripadvisor បានថ្លែងថា “នៅពេលដែលខ្ញុំគិតអំពីអ្វីដែលធ្វើឱ្យដំណើរកម្សាន្ត មិនអាចបំភ្លេចបាន វាជាសកម្មភាពកម្សាន្ត ដែលមិនគួរឱ្យខកខាន និងប្លែក ដូចជាជិះទូកពេលថ្ងៃលិចជាមួយក្រុមគ្រួសារ ដំណើរកម្សាន្តដោយការជិះកង់ជាមួយមគ្គុទេ្ទសក៍ទេសចរណ៍ដែលគួរឱ្យចង់ស្តាប់ និងមានចំណេះដឹងបំផុត។
កាលពីដើមខែកុម្ភៈ ឆ្នាំ២០២១ គេហទំព័រទេសចរណ៍ដ៏ល្បីល្បាញ TripAdvisor បានចេញបញ្ជីឈ្មោះគោលដៅទេសចរណ៍ប្រជាប្រិយបំផុតប្រចាំឆ្នាំ២០២១ (Popular Destinations-World)។ សៀមរាបស្ថិតក្នុងគោលដៅឈានមុខគេចំនួន២៥ ដែលជាជម្រើសរបស់អ្នកទេសចរ (Travelers’ Choice Best of the Best)។
យោងតាម TripAdvisor បានឱ្យដឹងថា អង្គរវត្ត ប្រាសាទបាយ័ន សារមន្ទីរមីន រមណីដ្ឋាន ទីតាំង និងសកម្មភាព ជាង២០០០ទៀត សុទ្ធតែជាចំណែកទាក់ទាញទេសចរឲ្យទៅកាន់ខេត្តសៀមរាប ជាពិសេសនៅពេលដែលស្ថានភាពវិលទៅប្រក្រតីវិញ ក្រោយវិបត្តិកូវីដ-១៩៕
