ដំណឹងល្អៈផ្សារទំនើបទី១តម្លៃជិត១០លានដុល្លារនឹងបង្ហាញខ្លួននៅ ក្រុងព្រះសីហនុឆាប់ៗនេះ

ដោយ ៖ ស៊ីវ ម៉េង

ភ្នំពេញ ៖ ផ្សារទំនើបដំបូងគេនៅខេត្តព្រះសីហនុ FURI Time Squaresដែលបោះទុនវិនិយោគតម្លៃជិត១០លានដុល្លារអាមេរិក នឹងបើកដំណើរការនៅពាក់កណ្តាលឆ្នាំ២០១៩ខាងមុខនេះ។

នាយកផ្នែកផ្សារនៃក្រុមហ៊ុន FURI Real Estate កញ្ញា លឹម សុខាដាវីន បានមានប្រ​សសន៍ឲ្យដឹងនាព្រឹកថ្ងៃទី៧ កញ្ញានេះថា ផ្សារទំនើបនេះស្ថិតនៅលើផ្លូវឯករាជ្យ សង្កាត់មិត្តភាព ខ័ណ្ឌមិត្តភាព ក្រុងព្រះសីហនុ(ក្បែរវិមានឯករាជ្យ) ដែលមានកំពស់៤ជាន់ និងមានទំហំជាង១២០០០ម៉ែត្រការ៉េ។ ផ្សារទំនើបនេះមានហាងកាហ្វេ អាហារនិងភេសជ្ជៈ រោងភាពយន្ត និង Sky Pub ។កញ្ញាបន្តថា បច្ចុប្បន្នគំរោងនេះបានសាងសង់ហើយ និងគ្រោងបញ្ចប់និង​ដាក់ឲ្យដំណើរការនៅខែមិថុនា ឆ្នាំ២០១៩ខាងមុខនេះ។

កញ្ញាបន្តថា “យើងបាននិងកំពុងនាំយកហាងល្បីៗពីរាជធានីភ្នំពេញ និងពីក្រៅប្រ​ទេសចូលមកកាន់ផ្សារនេះ ដែលវានឹងក្លាយជាផ្សារល្បីឈ្មោះ និងជាផ្សារលើកដំបូងគេ​នៅក្រុងព្រះសីហនុ”។ កញ្ញាបន្តថា “រហូតមកទល់ពេលនេះ យើងទទួលបានអតិថិជនកក់ស្តង់របស់យើងប្រមាណ៥០ភាគរយរួចហើយ ហើយយើងរំពឹងនឹងទទួលបានការជួលអស់ពីអតិថិជននៅពេលឆាប់ៗនេះ”។

កញ្ញា លឹម សុខាដាវីន បានបន្តថា ការសម្រេចចិត្តវិនិយោគគំរោងនេះ ដោយសារ​យើងបានសិក្សាជាមួយដៃគូវិនិយោគរបស់យើង ដែលជាអ្នកវិនិយោគនិងអ្នកជំនាញល្បីឈ្មោះមកពីទីក្រុងហុងកុង និងម៉ាកាវបានរកឃើញថា ខេត្តព្រះសីហនុជាទីតាំងពិសេស ដែលមិនទាន់មានផ្សារទំនើបនៅឡើយ ខណៈកំនើនទេសចរណ៍ និងអ្នកវិនិយោគកាន់តែច្រើនបានចូលទៅកាន់ទីក្រុងនេះ”។

កញ្ញាបន្តថា “យើងបានរកឃើញនូវអ្វីជាចំណុចខ្វះខាត យើងរកឃើញមានតម្រូវការ​ផ្សារទំនើបបែបនេះច្រើន ហេតុនេះក្រុមហ៊ុនរបស់យើងសម្រេចចិត្តបំពេញនូវចំណុច​ខ្វះខាតទាំងនេះ”។

តើអតិថិជនអាចទាក់ទងជួលស្តង់ផ្សារទំនើបនេះតាមរបៀបណា? កញ្ញាដាវីនបានឲ្យដឹងថា អតិថិជនអាចទាក់ទងតាមរយៈលេខទូរស័ព្ទ០១១ ២៩៩ ៩៧៥, ០១៦ ៤១​៩៨៩៨៕